Read Mongondow PINOGIAPAN 21 Bible Online

PINOGIAPAN 21 - Mongondow bible

PINOGIAPAN 21

¹Arad tua in kotá tobatú inta kon dotá in toḷatan butá in Kanaan. Naonda in kinodongogan in datu in kotá tatua kon intau in Israel mamangoi mongin daḷan Atarim, dá minayádon in sia nonubu kon i monia bo poḷat nodomok kon tongonumai in intau kon sigad monia.

²Bo intau in Israel nodandi nanaa kon i TUHAN, “Aka totok in pountung-Mu in kami nongkon bangusa tatua, dá mosia takin kotá mita monia in daitonbí nami yompaton.”

³Sinarima i TUHAN in oigum in intau Israel bo sinuḷungan-Nea in mosia nonaḷow kon intau in Kanaan. Dá intau mita in Israel noyompat kon bayongan intau in Kanaan takin kotá mita monia, bo tampat tatua sinangoian monia in Horma. [5]

⁴Onda intua intau in Israel nonaḷámai kon Buḷud in Hor, bo nomiḻí kon daḷan inta nopobayá in Teluk Akaba, sin moḻibu kon butá in Edom. Táe kon yuak in daḷan, bangusa tatua kinodaitandon in sabar monia,

⁵bo nongunsingogdon kon i Allah bo kon i Musa. Mosia noguman, “Nongonu sin diniamubí in kami iḻumuai nongkon Mesir? Eta degá makusud moḻimod kon inami kon padang gurun tanaa? Kon naa in diábí in kaanon, bo diá doman in tubig. Motompokdon in kami mokaan kon kaanon ḻiaw nanaa!”

⁶Dá pinopoangoidon i TUHAN kon yua-yuak in bangusa tatua in uḷag mita inta mongobisa. Nobarong intau in Israel in minatoi sinobak in uḷag mita tatua.

⁷Bo bangusa tatua namangoi kon tayowon i Musa bo noguman, “Binaradosadon in kami sin ain nongunsingog kon i TUHAN bo kon inimu. Posambayangpa kon i TUHAN sinbá uḷag mita tanaa poyayúdon kon inami.” Dá sinambayangandon i Musa in bangusa tatua.

⁸Bo pinoki aidan i TUHAN in ki Musa in uḷag tobatú nongkon logam bo inukatnea kon oigi tobatú. Bayongan in intau inta tobakon in uḷag, mopia aka mokoontong kon uḷag inta pinomia nongkon logam tatua.

⁹Dá pinomiadon i Musa in uḷag tobatú nongkon tambaga bo inukatnea kon tudu in oigi tobatú. Bayongan in intau inta sinobak in uḷag tatua, in mopia aka imindoi kon uḷag tambaga tatua.

¹⁰Intau in Israel bui nobuat, bo nononḷoḷaigan kon kotá in Obot.

¹¹Naonda in nonaḷámai kon tampat tatua, mosia nononḷoḷaigan kon kinorumbunan in Abarim kon padang gurun kon dotá in pomukaan butá in Moab.

¹²Onda intua mosia nononḷoḷaigan kon Ḷopá in Zered.

¹³Nongkon tua mosia bui nobuat bo nononḷoḷaigan kon ḷoḷan in Ongkag in Arnon, kon padang gurun bo inta iḻumuai nongkon butá in intau Amori. Ongkag in Arnon tatua in nobaḻí sigad in butá in intau Moab bo butá in intau in Amori.

¹⁴Tuamai kon bonu in ‘Buk pinoparangan i TUHAN’ pinais: “… Ḻipú in Waheb, kon butá in Supa bo ḷopánea mita; Ongkag in Arnon

¹⁵bo oyuk in ḷopá mita inta nobayag nodapot kon ḻipú in Ar bo mopobayá in posigadan butá in intau in Moab.”

¹⁶Nongkon tua mosia minayá in tampat inta sinangoian Beer, mangaḻenea parigí mita. Kon tua ki TUHAN perna noguman kon i Musa, “Pokisipunaidon in umat; Akuoi mobogoi in tubig kon i monia.”

¹⁷Kon dodai intua bangusa in Israel nopodondong in dondong tanaa, “Ei, parigí mita, poḷuaidon in tubigmu, bain tomuon nami in dondong.

¹⁸Parigí inta kinaḻi in tongganut mita bo in itoi mita in bangusa kinaḻi in tungkud in dodatuannea bo tungkud inta nobaḻí tomponuot in kawasa monia.” Nongkon padang gurun mosia nomamping kon Matana,

¹⁹bo nongkon tua nomamping kon Nahaliel, bo nopobayá in Bamot,

²⁰onda intua minayá in ḷopá in butá intau in Moab, kon ḻimonag in Buḷud in Pisga inta noitayow kon padang gurun.

²¹Bo intau mita in Israel nopotabá kon totabá mita minayá kon i Sihon, datu in Amori, sin mopotaau in koyow tanaa,

²²“Ogoipa in kami tumaḻib kon butá i Tuangku. Kami takin bobiagon nami diábí tumabat kon daḷan bo diábí doman tumuot kon butá mita in tudunea andeka gobá mita in anggur andeka monginum kon tubig mita in parigí mita tatua. Kami in diábí tumabat kon daḷan moḷoben dapot in kami moiḷuai kon butá i Tuangku.”

²³Táe diá inogoi i Datu Sihon in intau mita in Israel tumaḻib mongin butánea. Sinipunnea in tontaranea mita bo minayá kon i Yahas kon padang gurun bo nonubu kon intau in Israel kon tua.

²⁴Táe kon pinoparangan tatua nobarong intau in Amori in iḻimod in intau Israel. Bo kinawasaandon in intau Israel in butá monia nongkon Ongkag in Arnon nodapot in Ongkag in Yabok, inta pinosigadan in butá in intau in Amon, sin pinosigadan tatua totok in moropot in pinoḷoḷukad monia.

²⁵Natuata in pinongongagow in intau in Israel kon bayongan butá intau in Amori, noitakin doman in Hesybon bo bayongan kotá mointok inta kon diugneamai, bo nogutundon in mosia kon tua.

²⁶Hesybon tua in ibukotá in Datu Sihon. Sia perna noparang takin i datu Moab bo nogagow kon butánea nodapot in kinoouputbí Ongkag in Arnon.

²⁷Tuamai in momomantun nomais nanaa, “Angoidon kon Hesybon, kon kotá in Datu Sihon. Kami in moibog moindoi kon kotá tanaa posindogon bo toimbaguon bui.

²⁸Nokoimontandon nobaḻí nongkon kotá tanaa tontara in Sihon nonubu naonda bo tuḷú. Inta nokorimumud kon kotá in Ar kon Moab, bo nongawasa kon buḷud mita inta kinoouput in Arnon.

²⁹Ei bangusa in Moab, mobodito in iko! Mososumba kon Kamos, moyopú in iko! Iko pinomayá mako i dewamu nobaḻí ḷagu-ḷagui, intaumu mita bobay nobaḻí intau inta dinakop i datu in Amori.

³⁰Táe naa in noyopúdon in buí monia, kon kinoouput in daḷan nongkon Hesybon nopobayá ná Dibon, nongkon Nasyim nopobayá in Nopah kon diug in Medeba.”

³¹Natuata in bangusa Israel nogutun kon butá intau in Amori.

³²Onda intua ki Musa nopotabá kon intau mita minayá notayak kon daḷan inta totok in mopia sin monubu kon kotá in Yaezer. Bo intau in Israel nokoagow kon kotá tatua takin doman kotá mita inta nongointok kon diugneamai bo nopoguntun kon intau mita in Amori inta nogutun kon tua.

³³Nopaḷut mako kon tua intau mita in Israel nomurow bo nongin daḷan nopobayá in Basan. Datu in Og nongkon Basan minayá takin tontaranea sin monubu kon intau mita in Israel kon kotá in Edrei.

³⁴Ki TUHAN noguman kon i Musa, “Dika moondok kon inia. Pountung-Ku in iko. Taḷowonmubí in sia bo takin intau inta nogutun kon butánea. Pomiadon in sia ná pinomomiamu kon i Datu in Sihon inta nomarenta kon Hesybon.”

³⁵Dá intau in Israel nonaḷow bo noḻimod kon i Datu in Og, takin ki adínea mita bo bayongan rayatnea mita; diá in kinotaḻiban. Onda intua iḻitúandon monia in butá tatua.