Read Mongondow PINOGIAPAN 25 Bible Online

PINOGIAPAN 25 - Mongondow bible

PINOGIAPAN 25

¹Kon dodai intua bangusa Israel nogutun kon Ḷopá in Sitim, Intau mita ḷoḷaki monia nomangkoidon nonuaḻing takin bobay mita in Moab inta nogutun kon tua.

²Bobay mita tatua nonongganut kon i monia mayá in bobutungan kuruban sin mohoromat kon i ilah monia. Intau mita in Israel sinumakin doman nokaan kon kaanon kuruban tatua bo nosumba doman kon ilah intau in Moab.

³Popisí in intau Israel nosumbadon kon i Baal Peor, dá ki TUHAN sinumorú kon i monia bo noguman kon i Musa,

⁴“Domokdon in bayongan intau inta nobaḻí itoi mita in bangusa tatua bo ḻimod in mosia kon tayowon in intau mobarong sin moponiata mogaid kon onu inta pinarenta-Ku, sinbá Akuoi in diádon tumorú bui kon bangusa tatua.”

⁵Onda intua ki Musa noguman kon hakim mita in Israel, “Moiko komintan musti moḻimod kon bayongan intau kon bonu in sukumu inta ain nosumba kon Baal Peor.”

⁶Kon dodai in ki Musa bo bayongan in umat mogamuimai kon tayowon in Ḷoḷaigan i TUHAN, mosia in nokoontong kon intau in Israel tobatú nodia kon bobay in Midian tobatú sinumuot kon bonu in ḷoḷaigannea.

⁷Kon dodai in ki Pinehas, adí i Eleazar, ki ompu i Imang Harun nokoontong kon tua, sinimindog in sia bo nonaḷámai kon pinoyosipunan tatua. Ginamánea in ginubat tobatú

⁸bo inaḷowannea in ḷoḷaki bo bobay tatua kon bonu in ḷoḷaigan. Sinakuḷnea in taya dua tua dá nogogaidon in bodito inta noiantug kon Israel dodai intua.

⁹Táe dodai intua ain 24.000 in intau minatoi.

¹⁰Bo ki TUHAN noguman kon i Musa,

¹¹“Ki Pinehas adí i Eleazar, ki ompu i Imang Harun, totokdon in moibog noguntu kon kahoromatan-Ku kon sigad in intau Israel, dá torú-Ku in noinggamádon bo diádon motuoi-Ku yopúon in bangusa tatua.

¹²Dá pogumandon kon i Pinehas kon Akuoi in mogaid kon dodandian tobatú takinnea.

¹³Sia bo buínea in tantúon-Kudon umuran mobaḻí imang, sin sia aindon noramuji totok noguntu kon kahoromatan-Ku, ki Allahnea, bo ain doman nomia kon pondamean kon dosa in intau Israel.”

¹⁴Intau in Israel inta iḻimod pinoyotakin in bobay intau in Midian tatua tangoinea in ki Zimri, adí i Salu, tongguḷu in inanakan tobatú nongkon suku in Simeon.

¹⁵Bobay tatua tangoinea in ki Kozbi; sia in ki adí i Zur, itoi tobatú in inanakan kon Midian.

¹⁶Ki TUHAN nobogoi in parenta tanaa kon i Musa,

¹⁷“Tayowaidon in intau in Midian, bo yompatdon in mosia

¹⁸sin raat inta ain nobaḻí tomayá monia kon i monimu kon Peor, bo popisí in ki Kozbi adí in tongguḷu tobatú in inanakan kon Midian. Ki Kozbi tua in bobay inta minatoi iḻimod kon dodai in nobaḻí in bodito sin onu inta nobaḻí kon Peor.”