Read Mongondow PINOGIAPAN 30 Bible Online

PINOGIAPAN 30 - Mongondow bible

PINOGIAPAN 30

¹Ki Musa nobogoi in atorang mita tanaa kon itoi mita in suku mita in bangusa Israel.

²Aka ḷoḷaki tobatú modandi takin mongibot kon i TUHAN, dá sia in sinumogotdon kon tobatú dandi, sia in musti mogaid kon onu inta ain pinodandinea tatua, bo diábí motaau in monginggamá kon onu inta ain siningognea.

³Aka ede in mongodeaga tobatú inta nogutun kon baḷoi i amánea nodandi kon i TUHAN, bo sinumogotdon kon dandi tobatú, bo ki amánea in diábí nondoí kon tungkuḷ in nokodongog kon tua, dá ede in mongodeaga tatua in mogintompod kon bayongan inta pinodandinea tatua.

⁵Táe aka kon tungkuḷ in nokodongog kon tua in ki amánea bo nondoí, dá ede in mongodeaga tatua in diábí noitogot kon dandinea. Ki TUHAN in mongampungbí kon inia, sin sia in inimaḷowan i amánea.

⁶Aka bobay tobatú inta diápa pinobuḷoi nodandi andeka sinumogot kon dandinea, pinomayá munadon irainea kinopira andeka tongábí noipikirmai mako natua, dá sia in noitogotdon kon dandinea tatua. Aka kon singgai moiduduimai in sia pobuḷoiondon, dá sia in umuranpabí noitogot kon dandinea tatua, asaḷbo ki buḷoinea in diá mobogat in gina kon tungkuḷ in nokodongog kon tua.

⁸Táe aka kon tungkuḷ in nokodongog in ki buḷoinea bo poḷat nogimaḷow kon inia, dá sia in diá bidon noitogot kon dandinea tatua. Ampunganbí i TUHAN in sia.

⁹Aka boba-bobay tobatú andeka bobay inta ain ginaat i buḷoinea nodandi takin sinumogotdon kon dandinea tatua, dá sia in noitogotdon kon dandinea tatua bo musti in sia mogintompod kon tua.

¹⁰Aka bobay tobatú inta ain pinobuḷoi nodandi bo sinumogotdon kon dandinea,

¹¹dá sia in mustibí mogintompod kon onu inta pinodandinea tatua, asaḷ bo diá mobogat in gina i buḷoinea kon dodai in sia nokodongog kon tua.

¹²Táe aka kon dodai in ki buḷoinea nokodongog bo poḷat nogimaḷow kon inia, dá bobay tatua in diádon noitogot kon dandinea tatua. Ampunganbí i TUHAN in sia, sin sia in diá inogoi i buḷoinea.

¹³Buḷoi ḷoḷaki kohak mobogoi andeka momopat kon dandi inta pinomia i buḷoinea bobay.

¹⁴Táe aka kon dodai in sia nokodongog kon tua, bo ki buḷoinea diábí mobogat in gina, dá bobay tatua in mustibí mogintompod kon onu inta pinodandinea tatua. Ki buḷoinea ḷoḷaki in noibogbí kon dandinea tatua tuamai in diábí nobogat in ginanea kon dodai in nokodongog kon tua.

¹⁵Aka kon singgai moiduduimai bo ki buḷoinea tua monginggamá kon dandi i buḷoinea bobay, dá ki buḷoineadon ḷoḷaki tatua in mobaba kon bungai in aidnea tatua.

¹⁶Tuata in atorang mita inta inogoi i TUHAN kon i Musa kon soaḷ in dandi inta pinomia in ede in mongodeaga tobatú inta nogutun kon baḷoi i amánea, andeka in bobay tobatú inta ain pinobuḷoi.