Read Mongondow PINOGIAPAN 31 Bible Online

PINOGIAPAN 31 - Mongondow bible

PINOGIAPAN 31

²“Potuḻídon kon intau in Midian podudui kon onu inta ain inaidan monia kon bangusa Israel. Mopaḷut mako kon tua matoidon in iko.”

³Dá ki Musa noguman kon bangusa in Israel, “Posadiadon sin moparang; moiko musti monubu kon intau in Midian sin mopouma in hukuman i TUHAN kon i monia.

⁴Nongkon batúan in suku bangusa Israel, musti in moiko mosadia kon tontara toribu sin mayá moparang.”

⁵Dá piniḻídon in intau tumongoribu kon batúan in suku bangusa Israel, tua komintan kobayongnea in mopuḷú bodoyowá noribu inta nosadiadon mayá moparang.

⁶Ki Musa nopotabá kon i monia mayá moparang moyotakin i Pinehas adí i Imang Eleazar. Ki Pinehas in nodia kon barang mita motusi bo torompet mita inta baḻíon tomponuot mita.

⁷Podudui in parenta i TUHAN kon i Musa, intau in Israel nonubu kon intau in Midian bo noḻimod kon bayongan intau ḷoḷaki monia,

⁸noitakin domandon in datu in Midian taya ḻima, inta ki Ewi, ki Rekem, ki Zur, ki Hur bo ki Reba. Ki Bileam, adí i Beor, iḻimod doman.

⁹Intau mita in Israel nodakop kon bobay mita bo adí mita in intau in Midian, bo nogagow kon bayongan bobiagon, takin bayongan in kapunyaan monia.

¹⁰Kotá mita bo pinononḷoḷaigan mita monia sinurub doman.

¹¹Onda intua intau mita in Israel nogamá kon bayongan inta inagow monia tua, noitakin doman in intau mita inta sinoko dakop kon parang bo bobiagon,

¹²bo dinia kon i Musa bo kon i Imang Eleazar bo kon bayongan umat in Israel. Kon tungkuḷ intua mosia in koyogot nononḷoḷaigan kon rata in Moab, kon bingkí in Ongkag in Yordan, kon diug in kotá in Yerikho.

¹³Dá ki Musa, ki Imang Eleazar bo bayongan in itoi ibanea nongkon umat in Israel iḻumuai nongkon pinononḷoḷaigan sin motomu kon tontara in Israel.

¹⁴Sinorúan i Musa in tontara mita inta pangkat mongoḷantud, itoi mita in tontara bo tongguḷu in parang inta bagu nobui kon pinoparangan.

¹⁵Gumannea kon i monia, “Nongonu sin biniaganpabí monimu in bobay mita tanion?

¹⁶Diá kinotaauan monimu kon bobay mita tatua in dinumudui domandon kon tonggina i Bileam, inta nodondouḷugdon kon umat Israel kon Peor sin monaḷámai kon i TUHAN? Bo tuata in nokopopisí kon umat i TUHAN kinoantugan in bodito!

¹⁷Dá, naa in ḻimodon in bayongan adí ḷoḷaki bo bobay mita inta ain pinobuḷoi.

¹⁸Táe bayongan bobay inta diápa pinobuḷoi motaaudon gamáan monimu bo pobuḷoion.

¹⁹Bo moiko komintan inta ain noḻimod kon intau andeka inta ain noḻiai kon intau minatoi in musti mogutun kon ḷuai in pinononḷoḷaigan pitu nosinggai in koonggotnea. Kon singgai nogintoḷu bo noginpitu moiko bo bayongan bobay inta sinokodakop monimu tatua musti momia kon upacara pondaritan kon awak.

²⁰Bayongan in pakeang bo onukabí in nongkon kuḻit, bubuḷ in domba andeka kayu, in musti doman potusion.”

²¹Onda intua ki Imang Eleazar noguman kon intau mita inta bagu nobui nongkon pinoparangan tatua, “Naa in atorang mita inta inogoi i TUHAN kon i Musa.

²²Bayongan in yagi-yagi inta diá kaanon in tuḷú, ná buḷawan, saḷaka, tambaga, uatoi, tangat mobudó bo tangat morondí, musti potusion kon tuḷú. Onda intua barang mita tatua in musti potusion doman in tubig in upacara ponusian sinbá diádon monajis bui. Bayongan in barang ibanea inta mopokak musti potusion in tubig upacara ponusian.

²³

²⁴Kon singgai noginpitu moiko in musti momatá kon pakeangmu, bain tua bo moiko in diádon nonajis, bo motaaudon tumuot kon pinononḷoḷaigan.”

²⁵Ki TUHAN noguman kon i Musa,

²⁶“Iko bo ki Imang Eleazar, moyotakin in itoi mita ibanea nongkon umat in Israel, musti mogiap kon bayongan inta inagow kon parang, noitakin doman in bayongan intau inta dinomok bo bobiagon.

²⁷Tua mita musti silaion monimu doyowa inta kotongkaion kobayongnea; tongosilai in kon tontara mita inta ain minayá noparang, bo tongosilai doman in kon umat ibanea.

²⁸Aka bobogoi podudui inta ain sinantú kon i-Nakó, ki TUHAN, bo tonsilai in tontara mita tua in musti pogamáanmu kon tumongo batu kon pomuḷoi in ḻima nogatut — pinomayá intau mita inta sinokodomok kon parang, andeka sapi, keledai, domba bo bembé.

²⁹Popoabatdon intua kon i Imang Eleazar mobaḻí sosumba inta sinondí kon i-Nakó, ki TUHAN.

³⁰Nongkon tonsilai inta inogoi kon umat Israel, musti pogamáanmu tumongo batu kon pomuḷoi in ḻima nopuḷú, pinomayá intau mita inta sinoko domok kon parang, andeka sapi, keledai, domba bo bembé. Poabat intua kon intau in Lewi inta noḷukad kon Ḷoḷaigan-Ku.”

³¹Ki Musa bo ki Imang Eleazar nogaid kon ná inta pinarenta i TUHAN.

³²Koḻikud in inta ain ginamá in tontara mita kon i monia tontaní, bayongan inta inagow tatua kobayongnea: Domba bo bembé kobayongnea in 675.000, sapi in 72.000, keledai in 61.000 bo mongodeaga mita inta diápa pinobuḷoi in 32.000

³³

³⁴

³⁵

³⁶Tongosilai kon tua inogoi kon tontara mita, nanaa in pinososilai: 337.500 in domba bo bembé, bo 675 in inogoi nobaḻí sosumba inta ain sinondí kon i TUHAN; nongkon 36.000 in sapi, 72 in sapi inogoi nobaḻí sosumba inta ain sinondí kon i TUHAN; nongkon 30.500 in keledai, 61 in inogoi nobaḻí sosumba inta ain sinondí kon i TUHAN; nongkon 16.000 in mongodeaga, 32 in inogoi binaḻí sosumba inta ain sinondí kon i TUHAN.

³⁷

³⁸

³⁹

⁴⁰

⁴¹Bo ki Musa nopoabatdon in sosumba inta ain sinondí tua kon i Imang Eleazar sin posumba kon i TUHAN, ná inta ain pinarenta i TUHAN.

⁴²Tonsilai kon rayat notongkai in kobayongnea in tonsilai in tontara mita: 337.500 in domba bo bembé, 36.000 in sapi, 30.500 in keledai, bo 16.000 in mongodeaga.

⁴³

⁴⁴

⁴⁵

⁴⁶

⁴⁷Ná inta ain pinarenta i TUHAN, ki Musa nogamá kon tumongo batu kon pomuḷoi in ḻima nopuḷú in intau inta sinoko dakop kon parang bo bobiagon mita, bo pinosarakan kon intau mita in Lewi inta nopobayá in oaidan kon Ḷoḷaigan i TUHAN.

⁴⁸Onda intua porwira mita inta ain nodia kon tontara mita in intau Israel, minayá kon tayowon i Musa

⁴⁹bo noguman, “Tuang, kami ain nogiap kon tontara mita inta kon ḻimonagan nami. Noniata magí dá kobayong monia tua in diábí nogaat, diábí in tobatúmai in nobuḻi.

⁵⁰Tuamai in kami nodia kon ḷambá mita buḷawan, ḻingkit in ḻima, ḻingkit in sioḷ, sising, nganti-nganting bo boboḷ inta ain ginamá monia kon batúannea. Bayongan naa posarakandon nami kon i TUHAN mobaḻí sosumba nami sinbá Sia umuran moḷukad kon inami.”

⁵¹Bo ki Musa takin ki Imang Eleazar notarima kon buḷawan tatua, tua komintan in gigíbí ḷambá.

⁵²Sosumba in porwira mita tatua kobogatnea in gogió bo doyowa nogatut nokilo.

⁵³Táe tontara mita tatua kon batúannea ain nogamá kon onu inta inagow monia sin kon i monia tontaní.

⁵⁴Dá ki Musa bo ki Imang Eleazar nodia kon buḷawan tatua kon Ḷoḷaigan i TUHAN sinbá ki TUHAN umuran moḷukad kon bangusa Israel.