Read Mongondow PINOGIAPAN 32 Bible Online

PINOGIAPAN 32 - Mongondow bible

PINOGIAPAN 32

¹Suku mita i Ruben bo i Gad kobobiagon inta modamaḷ totok. Naonda in inontong monia kon totok in mopia in butá in Yaezer bo butá in Gilead kon ponombobiagan,

²dá minayádon in mosia kon tayowon i Musa, i Imang Eleazar, bo in itoi mita ibanea nongkon Israel. Mosia in noguman,

³“Butá in kotá mita in Atarot, Dibon, Yaezer, Nimra, Hesybon, Eleale, Sebam, Nebo bo Beon inta ain iḻitúan in Israel takin totuḷung i TUHAN, totuu mopia ponombobiagan. Bo popisí in bobiagon nami modamaḷ totok,

⁵dá kami mopoigum sinbá kon inamidon in butá tanaa mobaḻí tonsilai nami. Donaaidon kaasí potabá in kami mayá in ḷoḷan Ongkag in Yordan.”

⁶Tubag i Musa, “Umpaka yo moiko in tongábí mogutun mako kon naa, bo intau mita inta tobangusamu in mayá moparang?

⁷Nongonu sin baḻíonbí monimu in bangusa Israel moondok in ḷumoḷan kon Ongkag in Yordan bo tumuot kon butá inta ain inogoi i TUHAN kon i monia?

⁸Ki amá mita monimu nomia doman naníon, kon tungkuḷ in mosia pinotabáku nongkon Kades-Barnea sin mayá moḻibu kon butá tatua.

⁹Mosia noidapotdon kon Ḷopá in Eskol bo nokoontong domandon kon butá tatua. Táe kon dodai in mosia nobui, ginogondokdon muna monia in bangusa Israel in tumuot kon butá inta inogoi i TUHAN kon i monia.

¹⁰Dá sinumorúdon in ki TUHAN kon i monia kon dodai intua bo poḷat in Sia noguman, ‘Intau mita tatua diá motoindudui kon i-Nakó. Tuamai in Akuoi nongibot kon nongkon sigad monia tua inta ain umur doyowa nopuḷú notaong bo namonik kon dodai in mosia nonaḷámai kon Mesir, yo diábí tobatúmai in moituot kon butá inta ain pinodandi-Ku kon i Abraham, i Ishak bo i Yakub.’

¹²Bayongan intau kinotugatan in hukuman koḻikudon in ki Kaleb adí i Yepuni, intau in Kenas, bo ki Yosua adí i Nun, sin taya dua in umuran motoḷutui kon i TUHAN.

¹³Ki TUHAN sinumorú kon bangusa Israel dá pinomayá-Neadon mako in bangusa tatua kon padang gurun opat nopuḷú notaong in koonggotnea nodapot in bayongan intau topobiagan inta ain nomarontak kon i-Nia minatoidon komintan.

¹⁴Bo tanaa, moiko momarontak ná tai amá mita monimu! Moiko nion in totuubí kon topaanan in intau mita binaradosa inta mokopomuká kon torú i TUHAN dumoko-dokot bui kon bangusa in Israel!

¹⁵Aka moiko monoḻikud kon i TUHAN, dá bayongan bangusa tanaa in pomayá-Neadon mako modugang moonggot kon padang gurun, bo moikodon in mokopopisí kon koyopúan monia!”

¹⁶Bo intau mita in Ruben bo intau mita in Gad tua dinimiug kon i Musa bo noguman, “Pomayádon mako in kami mogaidpa muna kon ḷantung mita inta dindingon in beton sin pobonuan kon domba mita nami, bo kotá mita inta bentengan sin pogutunan in adí bo buḷoi nami.

¹⁷Kami in mosadiabí sin mayá moparang moyotakin in utat mita nami. Kami in modia kon i monia mayá monubu bo modia kon i monia tumuot kon butá inta mobaḻí kapunyaan monia. Tongá kon dodai intua ki adí bo ki buḷoi nami in motaaupa mogutun kon naa, kon kotá mita inta binentengan, moaman nongkon ponubuan in intau mita inta nogutun kon butá tanaa.

¹⁸Kami in diápabí mobui kon baḷoi nami kon dodai in bayongan bangusa Israel mokouḻídon kon butá inta mobaḻí tonsilai monia.

¹⁹Kami in doíbí motarima kon topiḻikmai nongkon butá monia inta kon ḷoḷan Ongkag in Yordan, sin kami ain notarima kon tonsilai nami kon naa, kon dotá in pomukaan kon Ongkag in Yordan.”

²⁰Tubag i Musa, “Aka moiko totu-totuu moibog mosadia mayá moparang sin kopontingan i TUHAN,

²¹bo bayongan inta kon sigad monimu inta motaaudon moparang ḷumoḷan kon Ongkag in Yordan, bo kon bonu in tongganut i TUHAN monubu kon musung mita modapot in modait kountunan i TUHAN in mosia,

²²modapot in intau mita kon butá tatua motoguondokdon kon i-Nia, dá moiko in motaaudon mobui, bo moiḷuatdon nongkon kowajiban monimu kon i TUHAN bo kon i utat mita monimu, bo ogoidon i TUHAN in butá inta kon dotá in pomukaan tanaa mobaḻí kapunyaanmu.

²³Tongá pokotaau, aka diá intompodan monimu in dandimu, yo baradosaan in moiko kon i TUHAN bo hukumon sin popisí in dosamu tatua.

²⁴Bayádon posindog in kotá mita bo ḷantung mita in dombamu, bo dika mokoḻiong in mogintompod kon onu inta ain pinodandi monimu tua.!”

²⁵Bo intau mita in Gad bo Ruben tua noguman, “Tuang, aidanbí nami onu inta ain pinoki aid i Tuang.

²⁶Adí bo buḷoi nami takin bobiagon nami, sapi bo domba mita in kon naadon, kon kotá in Gilead.

²⁷Táe kami naa in mosadiabí mayá moparang kon bonu in tongganut i TUHAN. Kami in ḷumoḷanbí kon Ongkag in Yordan bo moparang ná inta ain pinoguman i Tuang.”

²⁸Dá ki Musa nobogoi in parenta tanaa kon i Imang Eleazar, kon i Yosua bo kon itoi mita in Israel,

²⁹“Aka intau mita in Gad bo intau mita in Ruben dumudui kon parenta i TUHAN bo ḷumoḷan kon Ongkag in Yordan sin moparang, bo aka moidoyon doman kon totuḷung monia bo mountung poḷat mokoagow in moiko kon butá tatua, dá butá in Gilead musti ogoidon monimu kon i monia mobaḻí kapunyaan monia.

³⁰Táe aka mosia diá ḷumoḷan kon Ongkag in Yordan sin mayá moparang moyotakin monimu, dá mosia in musti motarima kon tonsilai butá in Kanaan, ná doman moiko.”

³¹Tubag mita in intau mita in Gad bo intau mita in Ruben, “Tuang, aidanbí nami onu inta pinarenta i TUHAN.

³²Kon bonu in tongganut i TUHAN kami in ḷumoḷanbí mayá in butá in Kanaan bo mayá moparang, táe igumondon nami in butá kon dotá in pomukaan kon Ongkag in Yordan naa umuran mobaḻí kapunyaan nami.”

³³Bo inogoidon i Musa kon suku mita in Gad bo Ruben bo kon tobotak in suku Manasye in bayongan butá in Sihon, datu in Amori, bo butá in Og, datu in Basan, noitakin doman in kotá mita bo butá kon diugneamai.

³⁴Suku in Gad noposindog bui in kotá in Dibon, Atarot, Aroër,

³⁵Atarot-Sopan, Yaezer, Yogbeha,

³⁶Bet-Nimra, bo Bet Haran nobaḻí kotá mita inta sinondok in benteng bo nobaḻí ḷantung mita in domba.

³⁷Suku i Ruben noposindog bui in kotá mita in Hesybon, Eleale, Kiryataim,

³⁸Nebo, Baal Meon, bo Sebam. Kotá mita inta pinosindog bui monia tua binaḷuiandon monia in tangoinea.

³⁹Inanakan i Makhir, adí i Manasye, nonubu kon butá in Gilead, bo nogagow kon tua bo nopoguntun kon intau mita in Amori inta nogutun kon tua.

⁴⁰Tuamai ki Musa nobogoi in butá in Gilead tatua kon inanakan in Makhir, bo mosia nogutundon notantú kon tua.

⁴¹Ki Yair, nongkon suku Manasye, nonubu bo nogagow kon tongonumai in ḻipú, bo sinangoian monia in “Ḻipú mita in Yair”.

⁴²Ki Nobah nonubu bo nogagow kon Kenat takin ḻipú mita kon diugneamai, bo sinangoian monia Nobah, pinodudui kon tangoinea tontaní.