Read Mongondow PINOGIAPAN 33 Bible Online

PINOGIAPAN 33 - Mongondow bible

PINOGIAPAN 33

¹Naonda in bangusa Israel nonaḷámai kon Mesir, kon pipidan podudui in suku bangusa monia kon bonu in tongganut i Musa bo i Harun, mosia nongandu-ngandup mako kon tongonumai in tampat.

²Ki TUHAN nokipais kon i Musa in bayongan tampat inta pinongandupan monia.

³Bangusa Israel nonaḷámai kon Mesir kon singgai impuḷú bo ḻima buḷan imitánea, tosinggai kon naonda in nopaḷut mako in Paska inta muna-munamai. Kon bonu in totuḷung i TUHAN mosia nonaḷámai kon kotá in Rameses, koonto-ontong in bangusa Mesir,

⁴inta koyogot moḷobongmai kon i adí mita guya-guyang monia inta iḻimod i TUHAN. Oaid tatua, pinoponiataan i TUHAN kon Siabí in moropo-ropot nongkon ilah mita in Mesir.

⁵Naonda in bangusa Israel nonaḷámai kon Rameses, mosia nononḷoḷaigan kon Sukot.

⁶Bo mosia nobuat bui nongkon tua bo nononḷoḷaigan bui kon Etam, kon bingkí in padang gurun.

⁷Nongkon tua mosia nobui kon Pi-Hahirot, kon dotá in pomukaan Baal-Zepon, bo nononḷoḷaigan kon diug in Migdol.

⁸Onda intua mosia nonaḷámai kon Pi-Hahirot, iḷumoḷan kon dagat bo sinumuot kon padang gurun Etam; naonda in toḷudon nosinggai kon binayáan, mosia nononḷoḷaigan kon Mara.

⁹Nongkon tua mosia nongingguput kon binayáan bo nomia kon ḷoḷaigan kon Elim; kon tua oyúon in bokaká mopuḷú bodoyowá bo pitu nopuḷú in pangkoi in kurma.

¹⁰Onda intua mosia nonaḷámai kon Elim bo nomia kon ḷoḷaigan kon diug in Teluk Suez.

¹¹Noiduduimai kon tua mosia nomia kon ḷoḷaigan kon padang gurun Sin, bo kon diug in Dopka, nopaḷut mako kon tua kon Alus, bo noiduduimai kon tua kon Rapidim, táe kon tua diá in tubig inumon.

¹⁵Nongkon Rapidim mosia minayá in Buḷud in Hor bo nomia kon ḷoḷaigan kon tampat mita tanaa: padang gurun Sinai, Kibrot-Taawa, “Pinoḷobongan popisí in Turá”. Hazerot, Ritma, Rimon Peres, Libna, Risa, Kehelata, Buḷud Syaper, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion Geber, padang gurun Zin, bo Buḷud in Hor, kon pinosigadan in butá in Edom.

³⁸Podudui in parenta i TUHAN, ki Imang Harun notakod kon Buḷud in Hor. Kon tua minatoi in sia kon singgai imitánea buḷan noginḻima kon taong noginggopat nopuḷú naonda in umat Israel nonaḷámai kon Mesir. Umur i Harun kon dodai in minatoi in 123 notaong.

⁴⁰Kon dodai intua datu in Arad, kon butá in Negeb, Kanaan Toḷatan, nokouḻí kon habar kon umat in Israel taya-taya mangoidon mopoangoi in butánea.

⁴¹Kon binayáan nongkon Buḷud in Hor nopobayá ná rata in Moab, intau in Israel nononḷoḷaigan kon tampat mita tanaa: Zalmona, Punon, Obot, kinorumbunan in Abarim kon butá in Moab, Dibon-Gad, Almon-Diblataim, Buḷud in Abarim kon diug in Buḷud Nebo, bo kon ḷopá in Moab kon bingkí in Ongkag in Yordan, kon diug in kotá in Yerikho, kon sigad in Bet-Yesimot bo Ḷopá in Sitim.

⁵⁰Kon rata in Moab tatua, kon bingkí in Ongkag in Yordan, kon diug in kotá in Yerikho, ki TUHAN nobogoi kon i Musa

⁵¹in parenta mita tanaa kon bangusa Israel, “Aka moiko ḷumoḷan kon Ongkag in Yordan sin tumuot kon butá in Kanaan,

⁵²moiko musti mopoguntun in intau inta nogutun kon butá tatua. Yompatdon in bayongan berhala monia inta nongkon batu bo logam takin tampat mita pooibadaan monia.

⁵³Butá tatua musti agowon monimu bo poḷat ḻitúai, sin ogoi-Kudon kon inimu.

⁵⁴Onda intua musti silaion monimu in tonsilai in kaummu mita takin momaké in undi. Aka kon inanakan inta mobarong musti moḷoben doman in silai ogoi kon i monia, bo kon inanakan inta moyakag, mointok doman tonsilai in ogoi.

⁵⁵Táe aka intau kon ḻipú tatua bo diá poguntunon monimu, yo intau mita inta umuran nogutun kon tua in mopororigamaidon kon i monimu naonda bo bungaion kon mata monimu andeka naonda bo dugi kon sioḷmu. Bo kon singgai moiduduimai mosiadon tua in monubu kon i monimu.

⁵⁶Aka diá poguntunon monimu in mosia, yo yopúon-Ku in moiko ná tomayá-Ku kon i monia.”