Read Mongondow PINOGIAPAN 34 Bible Online

PINOGIAPAN 34 - Mongondow bible

PINOGIAPAN 34

¹Ki TUHAN nobogoi kon i Musa in

²parenta mita tanaa kon bangusa Israel, “Topiḻikpa bo moiko tumuot kon butá in Kanaan, butá inta ogoi-Ku kon i monimu mobaḻí tonsilai. Naa in sigad in butá mita tatua.

³Kon toḷatan, sigadnea pangkoion kon padang gurun Zin tumaḻib mongin Edom. Kon dotá in pomukaan sigadnea pinangkoi kon popod in toḷatan Laut Mati,

⁴momurow ná toḷatan mopobayá in Daḷan Akrabim bo turus kon Zin nodapot kon Kades-barnea kon toḷatan. Nongkon tua momurow mopobayá in barat laut modapot kon Hazar-Adar, bo turus kon Azmon.

⁵Kon tua momurow mopobayá ná ḷopá kon pinosigadan in Mesir bo nodapot kon Dagat Toyuak.

⁶Dagat Toyuak in nobaḻí sigad in butámu kon dotá in toyopan.

⁷Kon utuan, sigadnea pinangkoi kon Dagat Toyuak mopobayá in Buḷud in Hor

⁸bo nongkon tua mopobayá in Daḷan Hamat, bo tumurus mayá in Zedad

⁹bo mopobayá ná Zipron bo modapot kon Hazar-Enan.

¹⁰Kon pomukaan, sigadnea pinangkoi kon Hazar-Enan mopobayá ná Sepam.

¹¹Nongkon tua mosiḻig kon Ribla kon dotá in pomukaan kon Ain, bo tumurus kon buḷud mita kon pintad in pomukaan kon Danow in Galilea,

¹²bo mopobayá ná toḷatan kinoouput in Ongkag in Yordan nodapot kon Laut Mati. Tuata in butámu pinodudui kon sigadnea mita inta noiḻibu.”

¹³Ki Musa noguman kon bangusa Israel, “Tuata in butá inta bain tarimaanmu podudui in undi, butá inta podudui in parenta i TUHAN in musti silaion kon siow bo tobotak in suku bangusa Israel.

¹⁴Suku mita i Ruben bo i Gad takin tongobotak in suku Manasye ain notarima kon tonsilai monia, bo butá tatua ain doman sinilai kon koluarga mita monia.

¹⁵Butá tonsilai monia tatua kon dotá in pomukaan kon Ongkag in Yordan, kon diug in kotá in Yerikho.”

¹⁶Ki TUHAN noguman kon i Musa,

¹⁷“Inta musti mosilai kon butá tatua kon sigad monimu nion in ki Imang Eleazar, bo ki Yosua adí i Nun.

¹⁸Tundúdon doman in itoi tobatú nongkon batúan suku sin mobantung kon i Eleazar bo kon i Yosua sin mosilai kon butá tatua.”

¹⁹Naa in tangoi in intau mita tatua: [Suku] — [Itoi] Yuda — Kaleb adí i Yepune Simeon — Samuel adí i Amihud Benyamin — Elidad adí i Kislon Dan — Buki adí i Yogli Manasye — Haniel adí i Epod Epraim — Kemuel adí i Siptan Zebulon — Elisapan adí i Parnah Isakhar — Paltiel adí i Azan Asyer — Ahihud adí i Selomi Naptali — Pedael adí i Amihud

²⁹Tuata in intau mita inta pinoki silaian i TUHAN in butá tonsilai kon bangusa in Israel kon butá in Kanaan.