Read Mongondow PINOGIAPAN 35 Bible Online

PINOGIAPAN 35 - Mongondow bible

PINOGIAPAN 35

¹Kon rata in Moab, kon bingkí in Ongkag in Yordan, kon diug in kotá in Yerikho, ki TUHAN noguman kon i Musa,

²“Potaaudon kon bangusa Israel kon nongkon butá tonsilai inta bain tarimaan monia tua, tongonumai in kotánea takin rawang in bonok kon diugneamai musti ogoi monimu kon intau in Lewi sinbá mosia motaau mogutun kon tua.

³Kotá mita tatua in nobaḻídon kapunyaan in intau in Lewi sin baḻíon pogogutunan monia. Rawang in bonok kon diugneamai in nobaḻí popokaanan in bobiagon monia.

⁴Rawang in bonok tua kooḷadnea in 450 nometer ḻibu-ḻibu, inukur nongkon dinding in kotá.

⁵Dá butá intau in Lewi notonggopat, inta ukurannea in tumososiow nogatut nometer, bo kotánea in kon yua-yuaknea.

⁶Intau in Lewi musti ogoian monimu in kotá pogogadopan onom sin baḻíon tampat poḷoḷaguian in intau inta diá sinumuod noḻimod kon intau ibanea. Kon ḻikud intua intau in Lewi musti ogoian doman in kotá ibanea opat nopuḷú bodoyowá

⁷takin rawang in bonoknea. Dá kobayongnea komintan in opat nopuḷú bo waḷu in kotá ogoi kon intau in Lewi.

⁸Kobayong in kotá mita in intau in Lewi kon bonu in wilayah in batúan suku in Israel musti tantúon podudui kon kobayong in kotá bo koḷoben in wilayah tatua.”

⁹Ki TUHAN nopotabá kon i Musa

¹⁰mopotaau kon bangusa Israel in tosingogon mita tanaa, “Naonda in mopaḷut mako ḷumoḷan kon Ongkag in Yordan bo tumuotdon kon butá in Kanaan,

¹¹musti tantúon monimu in kotá mita pogogadopan, sinbá intau mita inta diá sinumontuon noḻimod kon intau ibanea, motaau in moḷagui mayá intua.

¹²Kon kotá mita tatua intau tatua moaman nongkon ginaḷum in intau inta kinoḻimodan tua inta moibog motuḻí. Sin intau inta pinoponapudan noḻimod kon intau ibanea, diábí motaau in ḻimodon aka pelekaranea diápa muna sidangon kon pongadilan kon bayongan intau.

¹³Tantúdon in kotá pogogadopan onom,

¹⁴toḷu in kon dotá in pomukaan kon Ongkag in Yordan bo toḷu doman in kon butá in Kanaan.

¹⁵Kotá onom tatua mobaḻí kotá pogogadopan monimu, intau in Israel, bo kon intau ango-angoi andeka inta nogutun notantú kon yua-yuak monimu. Ki inekabí inta diá sinumontuon noḻimod kon intau ibanea, motaaubí in mayá moḷagui kon tobatú in kotá tatua.

¹⁶Tongá aka intau tobatú bo nopomakédon in pakakat uatoi andeka batu andeka kayu sin poḻimod kon intau ibanea, dá intau tatua in totuubí kon moḷoḻimod; sia tua in kotaḷá bo musti hukumon dapot in matoi.

¹⁹Ginaḷum inta modaginpa totok in intau inta iḻimod tua motaaubí in mopoaid in hukuman matoi tatua. Aka mouḻínea in intau inta noḻimod tatua, motaaubí ḻimodonnea.

²⁰Aka intau tobatú moyaat in ginanea kon intau ibanea, bo poḷat moḻimod kon intau tatua takin mopomobak kon inia andeka mopogarab in barang tobatú kon inia,

²¹andeka mongoyungkum, yo intau tatua in moḷoḻimod; sia tua in kotaḷá bo musti hukumon matoi. Ginaḷum inta totokpa in modagin in intau inta iḻimod tatua motaaubí in mopobayá in hukuman matoi tatua. Aka moyodungkuḷnea in intau inta noḻimod tatua, yo motaaubí in ḻimodonnea.

²²Tongá oyúonbí doman in mobaḻí intau tobatú in diábí sinumontuon noḻimod kon intau inta diábí kinoyaatnea, pinomayá nopomobak kon intau tatua andeka nopogarab in barang kon intau tatua.

²³Ande oyúon in inta mobaḻí intau tobatú in diá noindoi muna, bo noḷabú kon batu tobatú inta nokopopisí kon kinopatoian in intau ibanea inta deeman musungnea, bo diábí doman in makusudnea mopobodito kon intau tatua.

²⁴Kon pelekara mita ná tatua kon poyodungkuḷan in umat musti mopoyotutui kon intau inta ain noiḷaut noiḻimod, bo intau inta moibog motuḻí kon kinopatoian in intau inta ain kinoḻimodan.

²⁵Poyodungkuḷan in umat musti moḷukad kon intau inta diá sinumontuon noḻimod tatua kon gogondok in ginaḷum in intau inta kinoḻimodan tatua. Intau tatua musti diaan bui pobayá in kotá pogogadopan, tampat pinoḷaguiannea tatua. Musti in sia mogutun kon tua modapot in intau inta tungkuḷ intua nobaḻí Imang Moḷoben matoidon; bain tua bo motaaudon in sia mobui kon ḻipúnea tontaní. Tongá aka sia monaḷámai kon kotá pogogadopan inta pinoḷaguiannea tatua, bo noyodungkuḷbí bo poḷat iḻimod in ginaḷum in intau inta kinoḻimodan tatua, dá aid notuḻí tatua in deemanbí pinoḻimodan.

²⁹Atorang mita tatua pakéon kon i monimu bo kon buímu, kon ondakabí in pinogutunan monimu.

³⁰Kon pelekara poḻimodan, intau inta sinapudan noḻimod, motaau poponiata kon kotaḷá bo ḻimodon aka aidnea tatua motaau popobukiag takin oyúon in sakusi intau doyowa andeka noiḻiu. Tobatú in sakusi tua in diápabí tugat mopobukiag kon onu inta pinonapud tatua in totuu.

³¹Moḷoḻimod tobatú in mustibí hukumon matoi. Diábí motaau tobutonnea in doit in hukuman tatua.

³²Aka intau tobatú noḷagui kon kotá pogogadopan tobatú, dikabí ogoi in sia mobogoi in doit sinbá motaaudon in sia mobui kon baḷoinea kon dodai in ki Imang Moḷoben diápa minatoi.

³³Aka aidan monimu in natua, yo moiko in nokoporomúdon kon butá inta pinogutunan monimu. Poḻimodan mokoporomú kon butá; dá diábí in aid ibanea mondarit in butá tatua koḻikudbí in monginggamá kon kobiagan in intau inta noḻimod tatua.

³⁴Donaai moporomúmai in butá inta pinogutunan monimu, sin Akuoi ki TUHAN, bo Akuoi in nogutun kon yua-yuak in bangusa Israel.”