Read Mongondow PINOGIAPAN 36 Bible Online

PINOGIAPAN 36 - Mongondow bible

PINOGIAPAN 36

¹Tongguḷu mita in motoḷuadí kon inanakan in Gilead, adí i Makhir, inta ki ompu i Manasye, adí i Yusup, minayá kon i Musa bo kon itoi mita ibanea.

²Mosia in noguman, “Ki TUHAN nokisilai kon i monimu in butá tatua kon intau in Israel mopomaké in undi. Sia doman in nopotabá kon i monimu mobogoi in butá tonsilai i utat nami ki Zelapehad kon i adínea mita bobay.

³Tongá dika koḻiongan kon aka mosia tua pobuḷoiondon in ḷoḷaki ibanea nongkon suku ibanea, dá butá tatua in moiḷabúdon kon suku tatua. Bo aka natua butá inta ain sinantú nobaḻí wilayah nami in mogaatdon.

⁴Kon Taong Popobuian, kon dodai in bayongan kapunyaan inta ain pinotaḷui pobuion kon i toginea inta muna, butá i adí mita bobay i Zelapehad tatua in umuran bidon mobaḻí kapunyaan i buḷoi mita monia ḷoḷaki, dá suku nami in koinggamáandon in butá tatua.”

⁵Bo ki Musa nopotaaudon kon bangusa Israel in parenta inta nongkon i TUHAN naa, “Onu in pinoguman in intau mita inta buí mita i Yusup tua in totuubí,

⁶bo manangka intua ki TUHAN noguman kon ki adí mita bobay i Zelapehad motaaubí in mokipobuḷoi kon i inekabí in kinoibog monia, asaḷ tongosuku monia doman.

⁷Butá tonsilai in batúan intau Israel in umuranbí kantangan in sukunea.

⁸Pomuḷoi in bobay inta mogabat kon butá tonsilai kon tobatú suku in bangusa Israel, yo musti doman mobuḷoi kon intau inta kon suku tatua doman. Dá bayongan intau in Israel in mogabatbí kon butá tonsilai in mogoguyangnea,

⁹dá butá tonsilai tatua diá bidon moipamping magí mako nongkon suku tobatú moibayá in suku ibanea. Batúan in suku bangusa Israel in umuranbí mokadai kon butá tonsilainea tontaní.”

¹⁰Dá podudui in parenta i TUHAN kon i Musa, ki adí i Zelapehad bobay taya ḻima inta ki Mahla, ki Tirza, ki Hogla, ki Milka bo ki Noa pinobuḷoi in intau mita inta ginaḷumpa kon dotá i amá monia.

¹²Mosia pinobuḷoi in intau mita nongkon inanakan kon bonu in suku bangusa Manasye, adí i Yusup. Dá butá tonsilai monia umurandon nobaḻí kapunyaan in suku bangusa i amá monia.

¹³Tuata in atorang mita bo katatapan inta inogoi i TUHAN kon bangusa Israel pinongin i Musa, kon tungkuḷ in bangusa Israel kon rata in Moab kon bingkí in Ongkag in Yordan, kon diug in kotá in Yerikho.