Read Mongondow PINOGIAPAN 5 Bible Online

PINOGIAPAN 5 - Mongondow bible

PINOGIAPAN 5

¹Ki TUHAN noguman kon i Musa,

²“Potaau in parenta tanaa kon intau Israel: Bayongan in intau kinotugatan in takit in kuḻit inta mokobahaya, andeka takit kon dodiaan, andeka inta ain noḻiai kon intau minatoi, musti poḷuaion kon pinononḷoḷaigan intau in Israel.

³Mosia tua in musti pokiḷuaian, sinbá diá mokonajis kon ḷoḷaigan, tampat inta pinogutunan-Ku takin umat-Ku.”

⁴Intau in Israel dinumudui kon parenta tatua bo nopoḷuai in bayongan intau ná tatua nongkon ḷoḷaigan.

⁵Ki TUHAN nopotaau kon i Musa

⁶in atorang mita tanaa kon intau Israel: Aka intau tobatú diá motoindudui kon i TUHAN, poḷat mogaid kon inta moitaḷá kon intau ibanea,

⁷dá intau tatua musti mongaku kon dosanea bo mobogoi kon bayongan tontobutnea, poḷat dugangan in doyowa nopuḷú noporsen, kon intau inta pinoruginea.

⁸Táe aka intau inta pinorugineamai tatua minatoidon bo diá koginaḷum modagin, dá tontobutnea tatua musti ogoi kon i TUHAN, bo mobaḻí silai in imang. Tobutan tatua in diápabí pinoyotakin in domba koḷakian inta pakéon kon upacara potobutan kon dosa in intau inta kotaḷá tatua.

⁹Nongkon onukabí inta pinosumba in intau Israel kon i TUHAN, sosumba pinonangoinea tatua nobaḻí silai in imang inta notarima kon sosumba tatua.

¹⁰Onu inta pinosumba in intau tobatú kon i TUHAN, in nobaḻíbí silai in intau tatua. Tongá onu inta ain inogoi kon imang tobatú, in nobaḻí bidon silai i imang tatua.

¹¹Ki TUHAN nopotabá kon i Musa,

¹²nobogoi in atorang mita tanaa kon intau in Israel. Oyúon in mobaḻí, ḷoḷaki tobatú mopoiyan kon i buḷoinea. Kainiamai in ki buḷoinea tatua diá mosatia kon inia bo ain noporomúmai kon inia popisí in nosiugdon takin ḷoḷaki ibanea. Táe ḷoḷaki tatua diá in bukti inta motaau kadaianneamai kon totuu intua, popisí in tongá pomiaan i buḷoinea takin umuni-uni mako; diá doman in nokoontong, bo diá doman kinoumaannea. Ande kain singog mako natua ki buḷoinea ḷoḷaki mopoiyan kon i buḷoinea bobay, bokaka diábí in ki buḷoinea nomia kon natua.

¹⁵Kon doyowa nopasaḷ tatua ḷoḷaki tatua musti modia kon i buḷoinea mayá kon i imang. Sia in musti doman modia kon sosumba inta pakéon, tuata in topong gandum tokilo. Topong tatua diábí motaau butakan in ḷana zaitun andeka bubudan in dupa, sin nobaḻí sosumba in aid moiyan, tobatú sosumba inta nobaḻí tomponuot in pinopoiyanan i buḷoinea ḷoḷaki kon i buḷoinea bobay.

¹⁶Ki imang musti mopotabá in bobay tatua kon tayowon in mezbah bo simindog tumayow kon i TUHAN.

¹⁷Bo ki imang musti mogamá kon palo butá tobatú bo momonu in tubig topiḻik. Mopaḷut mako kon tua musti in sia mogamá kon ḷobud topiḻik nongkon taḷog in Ḷoḷaigan i TUHAN bo bonuonnea kon tubig tatua.

¹⁸Onda intua buok in bobay tatua daitonnea taidon poonag, bo pokikadaian in topong inta nobaḻí sosumba pinopoiyanan, bo ki imang tatua musti doman mokadai kon tubig mopait inta mokopoangoi kon butung.

¹⁹Mopaḷut mako kon tua ki imang musti mokipongibot kon bobay tatua takin moguman kon bobay tatua: “Aka totuu iko diá nokituaḻing, yo iko in diábí kotugatan in butung inta poangoi in tubig tanaa.

²⁰Táe aka iko ain nokituaḻing,

²¹poigumon mako baḻíon i TUHAN in tangoimu mobaḻí ibot butung kon sigad in bangusamu. Poigumon mako baḻíon-Nea in paamu imintok bo sianmu in ḷumoben.

²²Tubig inta mokopoangoi kon butung tanaa in tumuot kon sianmu bo mokobunsit kon sian bo mokointok kon paamu.” Bobay tatua musti motubag, “Moibog in akuoi; Igumon mako ki TUHAN momia kon natua.”

²³Bo ki imang musti momais kon butung tatua kon ḻitodan in karatas bo popatannea in tubig pait tatua.

²⁴Ki imang mokiinum kon bobay tatua in tubig pait inta mokopoangoi kon butung. Aka inumon, tubig tatua mokopopisí kon monakit.

²⁵Ki imang in musti mogamá kon sosumba topong tatua, bo tonggóonnea kon tayowon i TUHAN, bodongka diaannea kon mezbah.

²⁶Bo sia in musti mogamá kon topong toyoyangkom mobaḻí tomponuot kon bayongan topong tatua aindon pinosumba, bo payongonnea kon tudu in mezbah. Pangabisannea tubig tatua poinumdon kon bobay tatua.

²⁷Aka bobay tatua bo totuu kon ain nokituaḻing, tubig tatua mokopopisí kon inia mokorasa kon monakit totok; siannea kumutad bo paanea imintok. Tangoinea in mobaḻí ibot butung kon sigad in bangusanea.

²⁸Táe aka sia diá kotaḷá, yo sia in diábí kotugatan in butung bo buipabí in sia mononggadí.

²⁹Natua in atorangnea aka ḷoḷaki tobatú mopoiyan kon i buḷoinea bo mocuriga kon ki buḷoinea aindon nokituaḻing bo nokoporaatmaidon kon inia tontaní. Ḷoḷaki tatua musti modia kon i buḷoinea tatua kon tayowon i TUHAN bo imang musti mopoaid in atorang tatua kon inia.

³¹Ḷoḷaki tatua moiḷuat nongkon taḷá, táe ki buḷoinea, aka moniata kon kotaḷá, yo musti mobaba kon bungai in aidnea.