Read Mongondow PINOGIAPAN 6 Bible Online

PINOGIAPAN 6 - Mongondow bible

PINOGIAPAN 6

¹Ki TUHAN nopotabá kon i Musa

²mopotaau in atorang mita tanaa kon intau in Israel. Bayongan intau ḷoḷaki andeka bobay inta nodandi kon tongádon mobobiag kon i TUHAN mobaḻí nazir,

³diábí motaau in sia monginum kon anggur andeka bungai in ayop ibanea. Sia in diá doman motaau mokaan kon bungai in anggur inta bagu sinipú andeka inta ain noingkag, andeka onu kabí inta nongkon pangkoi in anggur; batoḷnea andeka tongákabí daunnea diábí motaau kaanonnea.

⁵Kon bonu in sia nodandi diábí in sia motaau mokigonsing andeka mokibangkuḷug. Kon bonu in sia mopobayápa in oaidannea tatua, buoknea andeka kuminea musti pomayáneadon mako in koḷanggóannea. Sia noitogotpa kon dandinea modapot in oaidannea kon i TUHAN mopaḷut.

⁶Buoknea tua in mobaḻí tomponuot kon sia tua in pinotondídon kon i Allah. Kon bonu in dandinea tatua sia in diábí motaau moponajis in awaknea; sia in diábí motaau in dimiug kon intau minatoi, umpakabí ki amánea tontaní in minatoi, andeka ki inánea, andeka ginaḷumnea.

⁸Kon bonu in sia nobaḻí nazir, yo sia tua in intaubí inta ain sinantú kon i TUHAN.

⁹Aka buok in nazir tobatú inta ain sinantú kon i TUHAN tua bo nobaḻídon nonajis popisí in sia baḷú noidiug kon intau minatoi, dá musti in sia mogoḷat pitu nosinggai in koonggotnea; bain mopaḷut mako kon tua sia mokibangkuḷug in uḷu bo kuminea, bain tua bo mobaḻí in sia modarit.

¹⁰Kon singgai noginwaḷu musti in sia modia mangoi kon doyowa in ḷagapan paḷoma andeka tarangkuku kon i imang kon ngara in Ḷoḷaigan i TUHAN.

¹¹Ḷagapan inta tobatú musti posumba i imang mobaḻí kuruban potobut kon dosa, bo inta tobatú in baḻíon kuruban ponginggamá kon inta monajis kon inia. Kon singgai doman tatua sia in musti mopotondí in buoknea bui kon i TUHAN

¹²bo monoimbagu kon poposarakan in awaknea mobaḻí intau tobatú nazir. Singgai mita inta ain kinotaḻiban diá bidon poyoiapon popisí in sia ain nobaḻí nonajis. Bo inta mobaḻí kuruban toḻiu in karugian sia in musti moposumba in adí in domba tobatú inta umurdon totaong.

¹³Aka wakutu intau tatua mopaḷutdon, musti pomiaan in upacara tanaa. Intau tatua musti atodon kon ngara in Ḷoḷaigan i TUHAN

¹⁴takin kodia-dia in bobiagon toḷu inta totok in mopia bo diaan mayá kon i TUHAN: domba koḷakian tobatú umur totaong in baḻíon kuruban payongon, adí in domba kobaayan tobatú inta umur totaong in baḻíon kuruban potobut kon dosa, bo domba koḷakian tobatú doman in baḻíon kuruban dodamean.

¹⁵Sia musti doman moposumba in roti tokompé inta diá iragian, roti noḻimbung inta pinomia nongkon topong inta binauian in ḷana zaitun, bo kukis monipit inta iḻepoan in ḷana zaitun. Koḻikud intua sia musti doman moposumba in kuruban oḷudon bo kuruban inumon.

¹⁶Musti daiton i imang diaan intua kon tayowon i TUHAN, bodongka moposumba in kuruban pongampung kon dosa bo kuruban payongon.

¹⁷Poyotakinon in roti tokompé tatua, sia in musti moposumba in domba koḷakian tatua kon i TUHAN mobaḻí kuruban pondamean. Bo kuruban doman oḷudon bo kuruban inumon tatua musti doman posumbanea kon i TUHAN.

¹⁸Nazir tatua musti mokibangkuḷug in buoknea kon ngara in Ḷoḷaigan i TUHAN, bo pogambatnea kon tuḷú inta koyogot pinotubaan kon kuruban pondamean tatua.

¹⁹Mopaḷut mako kon tua, aka paa in domba koḷakian inta kon dotá in muna tua ain dinungú, ki imang in musti mogamá kon tua bo ukatonnea poyotakinonnea in roti noḻimbung tobatú bo kukis nonipit tobatú inta kon kompé tatua, bo popokadainea kon nazir tatua.

²⁰Bo ki imang musti moguman kon kaanon tatua in nobaḻídon oogoi inta ain sinantú kon i TUHAN; tua in silai motusi inta nobaḻí silai i imang, dodob bo paa in domba koḷakian tua in nobaḻí silai i imang podudui in atorang. Bain mopaḷut mako kon tua nazir tatua motaaudon monginum kon tubig in anggur.

²¹Tuata in nobaḻí atorang kon tobatú nazir; táe aka nazir tobatú bo nopodandi in kuruban inta noiḻiu kon sarat mita in dandinea, sia musti mogaid kon ná inta pinodandinea tatua.

²²Ki TUHAN nopotabá kon i Musa

²³mopotaau kon i Harun bo kon i adínea mita kon mosia in musti mosingog kon tosingogon mita tanaa kon dodai in mosia momarakat kon bangusa Israel:

²⁴Poigumon mako ki TUHAN momarakat bo moḷukad kon i monimu.

²⁵Poigumon mako ki TUHAN monimbayag kon i monimu bo mobogoi in barakat kon inimu;

²⁶Poigumon mako ki TUHAN motabi kon i monimu bo mobogoi kon i monimu in kobiagan modame.

²⁷Bo ki TUHAN noguman, “Aka mosia monangoi kon tangoi-Ku sin momarakat kon bangusa Israel, yo barakatan-Ku in mosia.”