Read Mongondow MIKHA 1 Bible Online

MIKHA 1 - Mongondow bible

MIKHA 1

¹Ki Mikha nongkon kotá mointok tobatú tangoinea in Moresyet. Kon tungkuḷ in butá in Yohuda pinarenta noyodudu-duduimai i Datu Yotam, i Ahas bo i Hizkia, ki Mikha in notarima kon koyow i TUHAN soaḷ Samaria bo Yerusalem.

²Indongogaidon, ei bangusa mita! Taridiaidon, ei intau mita kon sinangkub in dunia! Ki TUHAN Inta Totok in moḷantud mamangoi saḷaku sakusi moḷawang kon i monimu komintan! Indongogai in Sia mosingog nongkon Baḷoi-Nea inta motusi kon soroga.

³Sia in noponag nongkon pinogutunan-Nea inta motusi bo maya-mayá kon tudu in buḷud kon butá.

⁴Buḷud mita ḷumoḷayat kon paḷad in sioḷ-Nea naonda bo lilin kon bonu in tuḷú inta modokot; butánea in moḻitu moibonu kon oyuknea mita, naonda bo tubig kon tudu in tombuḷud inta moiḻig monag.

⁵Bayongan tua in mobaḻíbí popisí in intau in Israel binaradosa bo nomarontak kon i Allah. Ki ine in nokopopisí kon Israel binaradosa? Tuata in Samaria inta ki iná in kotánea tontaní! Ki ine in nokopopisí kon Yohuda nosumba kon berhala? Yerusalembí tontaní ah!

⁶Manangka intua ki TUHAN in noguman, “Baḻíon-Kubí in Samaria bontuyungan in apug kon rawang, bo tampat pomomuḷaan in intau kon pangkoi in anggur. Rumbun in kotá tatua in pogonag-Kubí kon bonu in oyuknea, bo apadnea mita in toko kaḻion-Ku.

⁷Patongnea mita inta mongomahaḷ in rimumudon, bo bayongan in pakakat inta ogoi kon bobay mita inta mopobayá in oaidannea kon kuil in tubáan, takin bayongan in berhalanea in yompaton. Tua mita in nouḻí monia kon pinoibadaannea kon i dewa in koḷumbaan. Tanaa bayongan intua akutondon in musungnea mita sin posumbadon mobaḻí sukur kon dewa mita monia.”

⁸Tuamai in akuoi, ki Mikha, morobonoḷdon in ginaku bo mogamui. Akuoi in mayá takin diá mogiḷambung bo diá in aip in sioḷ sin moponiata kon totok in morobonoḷ in ginaku. Akuoi in mogayowdon naonda bo ungkú in kayuon bo mogayow naonda bo ḷagapan unta.

⁹Popisí in kekeb mita in Samaria diádon koundaman, bo Yohuda in koantugan doman in ukur inta motongkai. Bodito in noiyaputdon kon Yerusalem, bonawang in butá in bangusaku.

¹⁰Dikadon potaau kon musung mita naton inta kon Gat in onu inta noiantug kon i naton; dika mopomayá mako kon i monia moindoi kon i monimu mongombaḷ. Ei intau in Bet-Le-Apra, [1] ponangkuḻitodon kon bonu in ḷobud saḷaku tomponuot kon kinodaitandon in kamang!

¹¹Moiko intau i Sapir, pobuatdon bayá in poḷumbúan takin diá mogiḷambung bo takin oyá! Intau mita in Zaanan in diá mokobaḻí in ḷumuai nongkon kotá monia. Karak in intau in Bet-Haezel in mopoontong kon inimu kon tua in diádon in oḻiungan bui.

¹²Anib nongkon i TUHAN in noidapotdon kon tayowon in bonawang in Yerusalem! Tuamai, diábí doman intau in Marot mogoḷatpa mako kon totuḷung.

¹³Moiko intau in Lakhis, pasdon in kabaḷo kon kereta in parang! Moiko in dinumayan kon dosa mita inta inaidan kon Israel dá nokopopisí kon Yerusalem in binaradosa domandon.

¹⁴Tanaa, ei intau in Yohuda moiko in kobuḻiandon in kotá in Moresyet-Gat. Datu mita in Israel diá bidon mokouḻí kon totuḷung bui nongkon kotá in Akhzib.

¹⁵Ei intau in Maresya, Ki TUHAN in moposarakan kon i monimu kon musung inta mopotungkud in kotámu. Itoi mita in Israel inta nongawasa in mogadop kon bonu in angob mita kon Adulam.

¹⁶Ei intau in Yohuda, gonsingaidon in buokmu mobaḻí tomponuot kon pinonogumatoian kon adí mita monimu inta kinotabi monimu. Karugaidon in uḷumu modapot in moḷogat naonda bo ḷagapan mokokaan kon mahaḷuk minatoi, sin ki adí mita monimu in akuton kon poḷumbúan.