Read Mongondow MIKHA 3 Bible Online

MIKHA 3 - Mongondow bible

MIKHA 3

¹Indongogaidon, ei mongongawasa mita in Israel! Sabanarnea in bá kotaauanbí monimu onu inta moadil,

²táe nouḻí magí kinodoí bidon monimu onu inta mopia, bo mopia in gina monimu kon inta moraat. Bangusaku in iningkuḻitan monimu sibiag, bo iyambit monimu in tapúnea nongkon tuḷannea mita.

³Kinaan monimu in bangusaku. Kuḻitnea in binera-berak monimu bo tuḷannea mita in irimumud monimu. Pinongko-pongkó monimu in mosia naonda bo nomongkó kon tapú inta bonuon kon kuyon.

⁴Moiangoibí in wakutunea moiko in momaḷú mokituḷung kon i TUHAN, táe Sia in doíbí motubag. Sia in doíbí mokidongog kon sambayangmu mita, popisí in moiko in nogaidon kon inta moraat.

⁵Bangusaku inakaḷan in nabi mita inta nonoḻindap kon inta mopia kon intau inta mobogoi in doit, táe mosaturu bo mopoompámai kon intau inta diá mobogoi. Kon i monia nabi mita inta natua, ki TUHAN in noguman,

⁶“Ei nabi, motoyongdon in wakutumu; mata in singgaimu koyogotdon in tumoyop. Moiko in diá bidon bui mokouḻí kon oontongon inta moponiata kon tomayá-Ku mita. Moiko in diá bidon bui mokotoḻindap kon onu bo onu.”

⁷Intau mita inta monoḻindap kon singgai moiduduimai in mooyábí popisí in toḻindapnea tatua in diá moitugat. Mosia komintan in mooyá bidon sin ki Allah in diábí motubag kon i monia.

⁸Táe soaḷ akuoi naa, ki TUHAN in nopogonúdon in Roho bo kawasa-Nea. Akuoi in inogoian-Nea in pomomangaḻe soaḷ kooadil, bo kabaranian doman moponiata kon intau in Israel kon soaḷ dosa mita inta ain inaidannea.

⁹Indongogaidon in singogku mita tanaa, ei moiko pongawasa in Israel inta mondoí kon kooadil bo monuui kon inta mobanar.

¹⁰Moiko in moposindog in Yerusalem, kotá i Allah, podoyon kon poḻimodan bo aid diá moadil.

¹¹Mongongawasa mita in kotá momarenta mokiigum in doit pomompon kon bibig, imang mita in motundú kon hukum i TUHAN sin motayak kon tondan pogaidan, bo nabi mita mopoigum in topotundú nongkon i Allah sinbá mokouḻí kon doit — bo kai monia kamai dá ki Allah in dinumotábí kon i monia. Mosia in moguman, “Ki TUHAN in oyúon kon yua-yuak naton; kita in diábí koantugan in anib.”

¹²Popisí in aid moraatmu tatua, dá Sion in pajekoon naonda bo gobá, Yerusalem in mobaḻí bontuyungan in apug, bo tombuḷud in Baḷoi TUHAN in mobaḻídon kayuon in bo bonganga.