Read Mongondow NAHUM 3 Bible Online

NAHUM 3 - Mongondow bible

NAHUM 3

¹Moboditodon in kotá tanaa inta nopuḻing in uboḷ bo poḻimodan; nopuḻing in pakakat inta sinokoagow andeka dinomok.

²Indongogaidon goḷotup in sambok bo koḷangká in roda, goḷopak poribatukan in kabaḷo bo koḷangká mako in kereta.

³Tontara mita inta sinumakoi kon kabaḷo monubu imibo-ibog, kedang monindar bo pandong in mopouḻi-uḻinag. Intau matoi diádon koiapan, mayat monia moyo-moyoguntuḷ, dá intau mita in moipintudon.

⁴Niniwe sundaḷ tatua yogotdon popoḷabúan in hukuman. Koḷoḷunatnea in totok in mokoangá. Nobayong in bangusa ain sinihirnea, bo dinondouḷugan [8] pinodoyon kon dondouḷugnea.

⁵Ki TUHAN Inta Totok in mokawasa in noguman, “Ei Niniwe, iko in rorigaan-Ku! Pilangan-Ku in iko kon tayowon in bangusa mita, dá kororaatmu koontongan monia.

⁶Pomiaan-Ku in iko naonda bo pakakat mokorongó, Arabon-Ku in iko in taai; Baḻíon-Ku in iko ḻiḻianmai in intau.

⁷Inta mokoontong kon inimu in yumayú bo moguman, ‘Niniwe in dongkadon apug diá in mangaḻenea! Ki ine in dumudui kon inia monogumatoi? Diábí in moibog mopoḻipoi kon inia.’ ”

⁸Ei Niniwe, yo umpaka dá ikobí in mopia-pia nongkon Tebe, ibukotá in Mesir? Tebe in noiukat doman kon bingkí in ongkag inta nogoḻingoi kon inia saḷaku dinding. Oo, Ongkag in Nil tatuata in benteng poḷoḷukadannea.

⁹Tebe in nomarenta kon Sudan bo Mesir, bo kawasanea in mononoi; Libia bo Put in notobatúnea.

¹⁰Umpaka natua, intau in Tebe dinakop bo inakut kon poḷumbúan. Kon bayongan in poyotangaan in daḷan, ki adínea mita bouton dapot in matoi. Intau mita moḷobennea sinogot in rante bo sinila-silai kon sigad in mododakop kon i monia.

¹¹Ei Niniwe, iko in togopuḷongonbí doman popisí in noḷoḷangu. Iko in moḷongasibí doman sinbá moiḷagui nongkon musungmu mita.

¹²Bayongan in bentengmu in nádon onda bo pangkoi in ara inta nongoḷutúdon mita in bungainea. Aka pangkoinea tatua bo guguron, yo bungainea mita in moḷabúbí kon bonu in bibig in intau mita inta moibog mokaan kon bungainea.

¹³Tontaramu mita in mongoyangkó naonda bo bobay bo ḻipúmu in diábí mokopongonu in monayow kon musung. Tuḷú in momagongbí kon bonoboi mita in bonawangmu.

¹⁴Ponangkobdon kon tubig mobaḻí tongkaaḷmu kon dodai in iko kopungon, bo irigonaidon in bentengmu mita! Ritakaidon in yoná sin aidan tela, bo sadiadon in dodoyonannea!

¹⁵Onukabí in aidanmu, diábí in mangaḻenea, sin iko in notantúbí modait mopagong bo andeka matoi kon poparangan. Iko in moinggamábí naonda bo bungai in boyó kon gobá inta nodait kinaan in pangkoḷá. Iko in nobaḻídon nobayong naonda bo pangkoḷá!

¹⁶Mopopotaḷuimu in moanto-antódon kon tundi kon ḷangit in kobayongnea! Táe tanaa in diádon in mosia, naonda bo pangkoḷá inta nosongkádon kon koḻikipnea bo dongka iḷumayug minayá.

¹⁷Intau mita moḷoben bo pojabatmu in naonda bo paanan in pangkoḷá inta nogadop kon dinding mita kon dodai in notumping. Táe naonda in nomukádon in mata in singgai, mosia in baḷúdon iḷumayug bo minayá; diábí tobatúmai in intau in nonotaau mongo kon onda in binayáan monia.

¹⁸Ei datu in butá in Asyur! Gubernurmu mita in minatoidon, bo bupatimu mita in noisiugdon diádon moibango-bangon. Rayatmu in noiraritdon kon buḷud mita, bo diá tobatúmai in intau in mokopodia kon i monia mobui mangoi.

¹⁹Ḷogit in awakmu diábí motaau undaman, bo kekebmu mita diádon mopia. Bayongan in intau inta mokodongog kon habar kinorimumudanmu monggoḷokap pia in gina. Sin bayongan in intau aindon nororiga popisí in aidmu moraat inta diá modai-dait tua.