Read Mongondow HABAKUK 1 Bible Online

HABAKUK 1 - Mongondow bible

HABAKUK 1

¹Naadon in koyow inta pinoniata i TUHAN kon i Nabi Habakuk.

²O TUHAN modapot in toonu degá in akuoi in musti momaḷú mokituḷung? Toonu in Iko in mokidongog bo moposaḷamat kon inami nongkon pinororigaan?

³Nongonu sin tongábí pomayá-Mu mako in akuoi in mokoontong kon námai tua in kobayong in aid moraat? Yo umpaka dá mokotahang in Iko in mokoontong kon námai tua in aid diá moitutui? Kon bayongan in tampat oyúon in porimumudan bo aid motontogat, poropatoian bo yogenggengan.

⁴Hukum in diá pinandungmai bo inta moadil in diábí pinosindog. Intau moraat in moiḻiu kon intau inta mojujur, dá inta moadil in poyotuuion.

⁵Onda intua ki TUHAN in noguman kon umat-Nea, “Taridiaika in bangusa mita kon diugmumai, dá moherangbí in moiko bo Moitongau. Sin kon dodai in iko nobiag oyúonbí in aidan-Ku, inta diábí pirisayaan monimu aka tongá oumanon kon inimu.

⁶Bangusa in Babel inta morongang bo mopokaan tatua in baḻíon-Ku bangusa inta mongongawasa. Mosia in mopipid in ḷumuai nongkon butánea bo moḻibu kon sinangkub in dunia sin mopotungkud kon bangusa mita ibanea.

⁷Kon bayongan in tampat mosia in mokopomuká kon ondok; moidoyon kon ḷoḷatú mosia in mondoí kon bayongan in hukum koḻikudbí in inta moidudui kon ibog monia.

⁸Kabaḷonea in moḻika-ḻikat in macan tutul, bo moromu-romú nongkon serigala inta gogoyon. Tontaranea mita inta tumakoi kon kabaḷo in mamangoi nongkon butá mita moyayú; mosia in mamangoi naonda bo boniá inta mondagit kon kokaanonnea.

⁹Tontaranea in monubu sin mogaid kon diá mopia, bayongan in intau moondok in mokoontong kon koangoian monia. [1] Dinakop monia diádon koiyapan in kobayongnea.

¹⁰Mosia in moningkuḻe kon datu mita bo kosingan monia in pogawai mita moḷantud. Inanggapnea diá in mangaḻenea in bayongan in benteng, bo binumbunannea in butá bodongka inagownea in benteng tatua.

¹¹Bo ná koḻikat in tompot nobuatdon in intau mita inta nopongata in ropotnea tontaní tatua.”

¹²TUHAN, nongkon koḻipodpabímai Ikobí in ki Allah. Iko in ki Allahku inta motusi bo mononoi.[2] TUHAN, Allahku bo moḷoḷukadku, bangusa in Babel tatua in piniḻí-Mu bo binaḻí-Mu noropot sin mohukum kon inami.

¹³Táe naondabí sin Iko in mokotahangbí in moindoi mako kon intau mita moraat bo moḻingá tatua? Kinotaauanku kon Iko in noiḻiubí kon motusi in moindoi kon aid moraat! Kinotaauanku kon mototukabí in Iko in mokoontong kon aid diá moadil! Dá, nongonu sin Iko in tongábí kibio-biómai kon tungkuḷ in intau motoḷutui irimumud in intau moraat?

¹⁴Nongonu sin intau in inanggap-Mu naonda bo toyá kon dagat, bo naonda bo toyom inta diá in itoinea?

¹⁵Bangusa in Babel nodomok kon intau mita mopomaké in kail, naonda bo mosia tua in toyá. Intau mita tatua in inugut kon bonu in ḷaḷa mita bo intau in Babel mopia in gina monia kon onu inta nouḻí monia.

¹⁶Onda intua ḷaḷa tatua in sinumba monia bo inogoian monia in sosumba kuruban, sin pinongin ḷaḷa tatua mosia in nokouḻídon kon rijiki nobayong totok bo nobaḻídon notomomon.

¹⁷Dá umpaka yo mosia in umuranbí mopotaan mako in kedangnea bo moḻimod kon bangusa mita, takin diábí in ampung?