Read Mongondow HABAKUK 2 Bible Online

HABAKUK 2 - Mongondow bible

HABAKUK 2

¹Akuoi in moibog moponik kon ḷangkeang poḷoḷukadanku, bo mogoḷat mongo onu in poguman i TUHAN kon inakó, bo naonda in tubag-Nea kon amuiku.

²Ki TUHAN in notubag kon inakó nanaa, “Kurigdon kosimantag kon butá ḷamentong tobonsig, onu inta poponiata-Ku kon inimu, sinbá mopia bacaan.

³Paisdon intua, sin deemanpabí orasnea in naa. Táe oras tatua in ḷagi bidon moiangoi, bo onu inta poponiata-Ku kon inimu in notantú bidon kon mobaḻíbí. Umpaka koontongan in ná moonggotpa, táe oḷatdon mako! Oras tatua in notantúbí kon moiangoibí bo diá bidon pampingon.

⁴Bo pokoingatdon: Intau inta moraat in diábí mosaḷamat, [3] táe intau inta mogaid kon onu in kinoibog i Allah in mobiagbí popisí in kotoinduduinea kon i Allah.”

⁵Kaoyúonan [4] tatua in umuranbí mongakaḷ kon intau. Intau inta motamaa tatua in moḷoḷatú bo mogagawang. Naonda bo popatoi, sia in diábí doman kon dodai in onda in moorop; bayongan in bangusa tokorambitonnea.

⁶Táe bayongan inta ain pinotungkudnea tatua in monigidbí bo mopoḷoḻeke kon inia. Mosia in moguman nanaa, “Kinutukdon in iko sin nomontuyungdon kon pakakat inta deeman iko in kitogi! Dapotpa in toonu in iko in mopooyúon kon inimu tontaní pongin aid momakisa kon intau mita inta koboḻi kon inimu moguboḻi kon boḻi monia?”

⁷Táe diá kinotaa-taauanmumai, iko inta ain nopotungkud kon intau ibanea, in monomboḻibí doman bo pakisaanbí doman moguboḻi kon indugangnea. Musungmu mita in mamangoibí bo iko in angoiandon in ondok. Mosia in mogagowbí kon kapunyaanmu!

⁸Iko in nogagowdon kon nobayong in bangusa, táe bangusa mita inta nokoḷagui in mogagowbí bui kon inimu, popisí in pinoḻimodan inta ain inaidanmu, bo popisí in koḷoḻingámu kon ḻipú mita, bo kon kotá mita takin intaunea mita kon tua. [5]

⁹Kinutukdon in iko! Iko in mopooyúon in motoḷuadímu pongin kauntungan inta nouḻímu pinodoyon kon aid moḻingá, sinbá baḷoimu tontaní in moodom bo moiḷagui nongkon susa bo bodito.

¹⁰Táe tomayámu tatua in tongábí mokopooyámai kon motoḷuadímu. Takin mogagow kon mobayong in bangusa, iko in moporugibímai kon inimu tontaní.

¹¹Nodapotbí in batu mita kon dinding momaḷú sin mongutuk kon inimu, bo oigi mita in baḷoi mopobaḷú in natua.

¹²Kinutukdon in iko! Iko in moposindog in kotá pinodoyon kon aid moraat bo mobaḷoi pongin poḻimodan.

¹³Bangusa mita inta pinotungkudmu yumoyiga totok táe diá in mangaḻenea, bo bayongan inta posindogon monia nodait kinaan in tuḷú. Tua komintan in noidoyonbí kon ibog i TUHAN Inta totok in Mokawasa.

¹⁴Táe naonda bo dagat inta nopuḻing in tubig, yo natua doman in butá in mopuḻingbí in sinotaau soaḷ ki TUHAN bo kawasa-Nea.

¹⁵Kinutukdon in iko! Iko in moningkuḻe bo nokopooyámai kon topodiugmumai mita; binaḻímu in mosia moipape magí-mako naonda bo intau noḷoḷangu.

¹⁶Yo tanaa in noiyaputdon in wakutumu pokopooyáanmai, bo deemanbí horomaton. Kahoromatanmu in mobaḷui mobaḻí kohohina. Ki TUHAN in momakisa kon inimu monginum nongkon palo inta bonunea in hukuman kon inimu. Iko in monginumbí bo moipape magí mako.

¹⁷Iko in monaḷun kon kayu mita kon kayuon in Libanon, bo tanaa in ikodon tontaní in pupuḷon. Iko in noḻimod kon bobiagonnea mita, bo tanaa in bobiagon mita tatua in mokoondokdon kon inimu. Tua komintan in mobaḻí popisí in pinoḻimodan bo koḷoḻingá inta ain inaidanmu kon ḻipú mita, kon kotá mita bo kon intaunea mita. [6]

¹⁸Kinutukdon in iko! Iko in noguman kon kayu topongkó, “Pobangondon!” andeka kon batu moḷoben tobatú, “Sindogdon!” Degá patong tobatú motaau moguman kon inimu? Umpakabí patong tatua inoḻitan in buḷawan andeka saḷaka, táe diábí in nyawa kon inia. Onubí in mangaḻenea in patong berhala? Tua in tongábí mia in intau. Inta mouḻímu kon inia in tongábí komintan uboḷ. Diábí in mangaḻe in pirisaya in mogogaid kon berhala kon onu inta pinomianea tatua, inta diá motaau mosingog tua.

²⁰Ki TUHAN in kon bonu in Baḷoi-Nea inta motusi; maníka bayongan in intau kon dunia naa in kibio-biómai kon tayowon-Nea.