Read Mongondow HABAKUK 3 Bible Online

HABAKUK 3 - Mongondow bible

HABAKUK 3

¹Naa in sambayang i Nabi Habakuk: [7]

²O TUHAN, dinongogkudon onu inta inaidan-Mu, dá moodom in korasaanku kon gina. Igumon mako aid moḷoben tatua in bui aidan-Mu bo poniata-Mu kon kinobiagan nami naa. Igumon mako kotabi-Mu in kami umpakabí mopatú in gina-Mu.

³Iko in ki Allah Inta Totok in motusi namangoi nongkon Téman, [8] Iko in namangoi nongkon buḷud in Paran. Ḷangit kinokoḷoban in koagung-Mu; butá nopuḻing in dodayow kon ini-Mu.

⁴Iko in namangoi takin bayag motarang, nongkon ḻima-Mu ḷumuai in sindar nobayag, kon tuata in pinobunian-Mu kon kawasa-Mu.

⁵Pinotabá-Mu in panyaki minayá inumuna kon ini-Mu bo popatoi in dumuduianmai kon tumi-Mu.

⁶Aka Iko tumogon, moḷundan in butá; aka Iko mobobui, yo modoḻiok in bangusa mita. Buḷud mita inta mononoi in mobota-botak; tombuḷudpa mita inta mononoi in umompábí doman, kon tombuḷud mita tatuata Iko in mayá nongkon dungkuḷpabímai.

⁷Inontongku in rayat in Kusyan inaputan in ondok, bo intau in Midian urot mako.

⁸O TUHAN, popisí degá in dagat bo sinumorú in Iko? Ongkag mita degá in nokopopisí kon ini-Mu sinumorú? Sinakoian-Mu in goḷom naonda bo kabaḷo bo kereta in parang, kon dodai in umat-Mu pinountung-Mu.

⁹Puḷu in piot-Mu in sinadia-Mudon, piot-Mu aindon sinadia popopiot. [9] Bo butá in binotak-Mu nobaḻí ongkag mita.

¹⁰Nokoontongmai kon ini-Mu, buḷud mita in nodandú nongkon ḷangit noḷabú in uyan naonda bo pinopobutak. Tubig kon ḻimonag in butá moboḷontung in singognea, bokoḷnea in molitodanmai bo monomburá.

¹¹Sindar in piotnea mita moḻikat totok, ginubat-Mu mopouḻi-uḻinag, dá nogogaidon in mata in singgai bo buḷan kon tampatnea.

¹²Takin torú Iko in noḻibu kon butá; bangusa mita iruntai-Mu takin yaat in gina.

¹³Iko in minayá inumuna sin mopoḷuat kon umat-Mu bo moposaḷamat kon datu inta piniḻí-Mu. Binout-Mu nodapot in noḷabú in itoi in intau moraat, nodait-Mu iyompat in bayongan dumoduduinea.[10]

¹⁴Piot-Mu mita noiḷambai kon itoi in tontara in musung kon tungkuḷ in tontaranea namangoi ná koropot in deḷang, sinbá kami in porariton. Mosia in kinumosing takin ḷunganga in gina naonda bo intau inta umado-adop mondorot kon intau inta bogá. [11]

¹⁵Takin kabaḷo-Mu iritakan-Mu in baḷangon bo dagat inta nobudó in nonomburá.

¹⁶Nokodongogmai kon tua, inagían in ondok in akuoi bo bibigku in motondodaḷó. Akuoi in nobaḻí noḻemé diádon in ropot, sioḷku in noipintud, [12] kon ondaka in bayáanku. Oḷatonkubí takin gina moodom in hukuman i Allah kon mononubu.

¹⁷Umpaka pangkoi in ara diá in bungainea bo pangkoi in anggur diá in anggurnea, umpaka bungai in zaitun diá in notuoi bo bungai in gandum kon gobá mokokudai kon gina, umpakabí domba mita minatoidon komintan bo kobang in bobiagon diá in bonunea,

¹⁸ginaku in umuranbí moḷunganga, sin Iko in ki TUHAN mopoposaḷamatku.

¹⁹Iko in nobogoi in ropot kon inakó naonda bo sioḷ in rusa, sioḷku in iniyotonan-Mu. Kinapit-Mu in akuoi sinbá moodom kon dodai in minayá kon buḷud.