Read Mongondow ZEPANYA 1 Bible Online

ZEPANYA 1 - Mongondow bible

ZEPANYA 1

¹Ki Zepanya in ki adí i Kusyi. Uput in inanakannea nongkon ḻimonag bo mopoonik in ki Kusyi, ki Gedalya, ki Amazia bo ki Datu Hizkia. Naa in koyow i TUHAN kon i Zepanya kon tungkuḷ in ki Datu Yosia ki adí i Amon nomarenta kon Yohuda.

²Ki TUHAN in noguman, “Daiton-Kubí yompaton in bayongan onu inta kon butá:

³bayongan in intau bo bobiagon, moitakin doman in ḷagapan bo toyá. Intau moraat in yompaton-Kubí. [1] Bayongan umat intau in yompaton-Kubí, diábí tobatúmai in intau in pomayá-Ku mako in mobiag. Akuoi, ki TUHAN, ain nosingog.

⁴Hukumon-Kubí in intau in Yerusalem bo bayongan in Yohuda. Kiagat mita in pinosumbaan kon Baal in inggamáan-Kubí nongkon tua. Imang mita inta nogundoi kon Baal in ḻiongon bidon totok.

⁵Daiton-Kubí kaitan in ki inekabí in moponik kon atop sin mosumba kon mata in singgai, buḷan bo tundi mita. Yompaton-Kubí doman mosia inta nosumba kon i-Nakó bo inta nongibot motoindudui kon i-Nakó, táe nongibot doman pinodoyon kon tangoi i Dewa Milkom.

⁶Yompaton-Kubí in mosia inta diá namangoi kon i-Nakó andeka inta mokikapit kon i-Nakó bo inta ain nonaḷámai kon i-Nakó bo doídon dumudui kon i-Nakó.”

⁷Singgai i TUHAN in nodiugdon, kon singgai tatua oyúonbí in pomiaan i Allah; tuamai in kibio-biómaidon kon tayowon-Nea. Ki TUHAN in nosadiadon momatoi kon umat-Nea naonda bo kuruban sosumba bo Sia in nogoinídon kon musung mita in Yohuda.

⁸“Kon singgai pomatoian tatua,” guman i TUHAN, “Akuoi in mohukum kon intau mita moḷoben, ki adí ḷoḷaki i datu, bo bayongan in intau inta dinumudui kon aid in intau angoi-angoi.

⁹Akuoi in mohukumbí kon bayongan in intau noibada naonda bo intau inta diá nonotaau kon i-Nakó, bo inta nonakow poḷat noḻimod sin momonu kon baḷoi i tuang monia [2] takin pakakat mita inta inagow.”

¹⁰“Kon singgai tatua,” natuata in guman i TUHAN, “kodongoganbí in ombaḷ kon Bonawang in Toyá. Singog in amui in kodongoganbí nongkon ḻipú mobagu, bo singog in koumpagan inta motoyang in modoradá mako in kon tombuḷud mita.

¹¹Pogamui bo pongombaḷdon kon dodai in moiko mokodongog kon tua, ei intau inta nogutun kon kotá kon dotá in ḻimonag, sin bayongan in mopopotaḷui bo intau mita inta nopoḷuan in doit in minatoidon kinoḻimodan!

¹²Kon oras tatua Akuoi in mogamá kon poḷombow, bo moḻikai kon kotá in Yerusalem. Hukumon-Kubí in intaunea mita inta diá mopandungmai tatua takin inta noorop in onu inta kon inia tontaní, bo inta norai kon Akuoi, ki TUHAN in diábí kon dodai in onda in mogaid kon nanaa andeka natua.

¹³Kapunyaan monia in agowonbí bo baḷoi mita monia in rimumudon. Mosia in mobaḷoibí, táe diábí koutunannea. Mosia in momuḷabí kon anggur táe diábí moiinum kon tubignea.”

¹⁴Singgai pohakiman i TUHAN in nodiugdon, oo totokdon in nodiug, sedang bo ḷagi bidon moiangoi. Singgai tatua in nopuḻing in robonoḷ in gina, nodapot in tontara mita inta totok in motorindogpa [3] in kumokowbí totok popisí in kobuḻiandon in kamang!

¹⁵Singgai tatua in singgai torúan, mororiga bo mosusa, singgai koumpagan bo porimumudan, singgai mosindip bo monggoḷom, singgai inta modingungui bo mobayong in topuot.

¹⁶Kinoouput in singgai tatua kodongogan singog in torompet bo kokow in parang nongkon intau mita mopoparang inta nonubu kon kotá mita inta sinokodinding bo oyúon in ḷangkeang mita poḷoḷukadan inta mongoḷantud.

¹⁷Ki TUHAN in noguman, “Akuoi in mopoangoibí in bodito mobayong kon umat intau, dá mosia in mongokapdon naonda bo intau bilog. Mosia in binaradosadon kon i-Nakó, bo tanaa in dugú monia in moibutakdon naonda bo tubig, bo mayat mita monia in mobongkogdon kon tudu in butá.”

¹⁸Kon singgai inta motoyang tatua ki TUHAN in mopoontongbí in torú-Nea, dá bayongan in buḷawan bo saḷaka monia in diábí mokoposaḷamat kon i monia. Sinangkub in dunia in morimumudbí moḷoḷayat tubáan in tuḷú in torú-Nea. Bo daḻi-daḻíbí rabuton-Nea in bayongan nyawa kon butá tanaa.