Read Mongondow HAGAI 2 Bible Online

HAGAI 2 - Mongondow bible

HAGAI 2

¹Kon singgai indoyowa nopuḷú bomitá, buḷan nogimpitu kon taong doman tatua, ki TUHAN in nosingog pinongin i Nabi Hagai.

²Ki TUHAN in nopotabá kon i Hagai noyosingog i Gubernur Zerubabel, i Imang Moḷoben ki Yosua, takin rayat sin mopotaau in koyow tanaa,

³“Oyúon degá in kon sigad monimu in nokotoropa kon naonda in kogogaga in Baḷoi-Ku tungkuḷ intua? Tanaa in naonda in kaadaannea, podudui kon inimu? Totokbí in diá mokosanang kon gina!

⁴Tongá, donaaidon moinggamá in kamang, ei moiko komintan! Ingguputaidon in oaidan tatua, sin Akuoi in umuranbí motuḷung kon i monimu.

⁵Kon dodai in moiko iḻumuai nongkon Mesir, Akuoi in nodandidon kon umuranbí moḷukad kon i monimu. Bo dapot in tanaapa Akuoi in umuranpabí doman moḷukad mako kon i monimu. Dá, dikadon moondok.

⁶Kon modiugmai naa guguron-Kudon in ḷangit bo butá, toba bo dagat.

⁷Bayongan in bangusa in podoḻiokon-Kubí bo kapunyaan monia in diaandon mamangoi, dá Baḷoi-Ku in mopuḻing in kaoyúonan monia.

⁸Bayongan in buḷawan bo saḷaka kon dunia naa in Akuoibí in kitogi.

⁹Baḷoi-Ku inta mobagu in mogagabí nongkon inta muna, bo kon naa Akuoi in mobogoi in kobiagan moodom bo kotomoman kon bangusa-Ku.” Ki TUHAN Inta Totok in mokawasa ain nosingog.

¹⁰Kon singgai indoyowa nopuḷú bo opat buḷan in siownea kon taong nogindua kon pinomarentaan i Datu Darius, ki TUHAN Inta Totok in mokawasa in nosingog bui kon i nabi Hagai.

¹¹Kai-Nia, “Poigumdon kon bontow in tosingogon kon imang mita kon soaḷ tanaa:

¹²Aka kuma bo oyúon in intau in nogamá kon tobonsig in ponoyá kuruban inta pinosumba kon i TUHAN, bodongka dinianea nobui bo binakut in jubahnea, bo onda intua kopake-paké doman in jubah tatua sia in noḻiai kon roti andeka inta dinungú, andeka anggur, andeka ḷana zaitun, andeka kaanon onukadon, yo degá tua komintan mobaḻí doman motusi?” Naonda in iḻibó i Hagai intua, imang mita in notubag, “Diá.”

¹³Onda intua ki Hagai in noḻibó bui, “Aka kuma bo oyúon in intau inta nobaḻí nonajis popisí in noḻiai kon mayat, bo onda intua sia in noḻiai kon tobatú kokaanon tatua, yo degá kaanon tatua in mobaḻídon monajis doman?” Imang mita in notubag, “Oo, notantú bidon!”

¹⁴Onda intua ki Hagai in noguman bui, “Ki TUHAN in noguman kon atorang tatua in pakéon doman kon umat in Israel kon butá tanaa bo kon bayongan in yagi-yagi inta nouḻí monia. Dá, onu inta pinosumba monia kon mezbah tanaa in nonajis.”

¹⁵Ki TUHAN in noguman, “Tungkuḷaika, taridiai onu inta ain nobaḻí kon singgai koḷabung, kon dodai in Baḷoi-Ku tanaa diápa sinompia bui! Naonda in kaadaanmu kon dodai intua?

¹⁶Moiko in minayádon noindoi kon bonturungan in gandum bo kai monimu kamai dá mokouḻíbí kon 200 nokilo in gandum, táe noniata magí tongábí 100 nokilo. Moiko in minayá sin monayuk kon 100 noliter in anggur kon tong in anggur, táe tongábí 40 noliter in oyúon.

¹⁷Akuoi in nopoonagdon in tompot mopatú bo uyan batu sin morimumud kon bayongan in bungai in pinomuḷa kon gobámu, táe moiko in doí doman mobui kon i-Nakó.

¹⁸Kon singgai tanaa, singgai indoyowa nopuḷú bo opat buḷan in siownea, dodatoḷan in Baḷoi-Ku noḷapatdon pinoḻitú! Taridiai onu in mobaḻí pangkoion kon tanaa mako.

¹⁹Umpaka diádon in kiagat in gandum, bo pangkoi in anggur, pangkoi in ara, pangkoi in delima bo pangkoi in zaitun diápa nomungai, táe pinangkoi kon tanaa Akuoi in momarakatdon kon i monimu!”

²⁰Kon singgai doman tatuata, kon singgai indoyowa nopuḷú bo opat kon buḷan in siownea, ki TUHAN in nobogoi in koyow induanea kon i Hagai,

²¹sin potaau kon i Gubernur Zerubabel. Guman i TUHAN, “Diádon moonggot ḷangit bo butá in guguron-Ku,

²²dodatuan mita in umpagon-Ku bo kawasa monia in rimumudon-Ku. Kereta mita in parang takin mododianea in tokokaḻintuangon-Ku; bayongan in kabaḷo in matoi bo tumotakoinea in mosiḻimodandon.

²³Kon singgai tatua iko Zerubabel, mogogundoi-Ku, in baḻíon-Ku pomarenta podoyon kon tangoi-Ku. Sin ikobí inta ain piniḻí-Ku.” Ki TUHAN Inta Totok in Mokawasa ain nosingog.