Read Mongondow ZAKHARIA 10 Bible Online

ZAKHARIA 10 - Mongondow bible

ZAKHARIA 10

¹Aka sempodon in pononubú, poigumdon kon uyan kon i TUHAN. Dá sipunondon i TUHAN in goḷom morondí, bo mopoḷabú in uyan morogot dá gobá mita in ḷumunowdon bo moḷumbá kon bayongan in intau.

²Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

³Ki TUHAN in noguman, “Akuoi in tumorú totok kon pongawasa inta nomarenta kon umat-Ku, bo mosia in hukumon-Ku. Táe intau in Yohuda in Akuoi in kitogi, bo Akuoi, ki TUHAN Inta Totok in mokawasa in moḷukad kon i monia. Mosia in baḻíon-Ku kabaḷo in parang inta motorindog kon i-Nakó.

⁴Nongkon sigad monia piḻíon-Ku in pongawasa, bo panglima inta momarenta kon umat-Ku.” [12]

⁵Intau mita in Yohuda in mountungbí naonda bo pojuang mita inta moruntai kon musung naonda bo yoná kon daḷan. Mosia in totokbí in moḷongasi popisí in Akuoi, ki TUHAN in moduḷu kon i monia, bo tontara in musung inta sinumakoi kon kabaḷo in taḷowonbí monia komintan.

⁶“Intau in Yohuda in iropotan-Kubí, umat in Israel in posaḷamaton-Ku. Diaan-Ku in mosia mobui mangoi kon butánea popisí in Akuoi motabi kon i monia. Popoaid-Kubí kon i monia naonda bo bangusa inta diá kon dodai in onda in iḻiong-Ku. Akuoibí in ki TUHAN Allah monia, bayongan in sambayangnea in indongogan-Kubí bui.

⁷Umat in Israel in naonda bo pahlawan inta moropot, naonda bo intau inta nonginum kon anggur, mopiabí in gina monia. Buí monia nongkon zaman mopobayá in zaman diábí koḻiongan in kauntungan tanaa inta inogoi-Ku. Mosia in moḷungangabí popisí in aid-Ku kon i monia.

⁸Umat-Ku in oiníon-Ku bo sipunon-Ku tobatúon. Mosia in poḷuaton-Ku bo baḻíon-Ku mobayong ná dungkuḷmai.

⁹Umpaka pinobaya-bayá-Ku mako in mosia kon yua-yuak in bangusa mita, mosia in umuranbí monorop kon i-Nakó kon tua. Mosia in mosaḷamatbí, natua doman in ki adínea mita bo mobui moyotakin kon butánea.

¹⁰Nongkon Mesir bo Asyur, mosia in popobui-Ku. Kon butánea tontaní mosia in popoutun-Kubí. Diaan-Ku in mosia mayá in Gilead bo kon Libanon doman, dá sinangkub in butá mopuḻingdon i monia.

¹¹Aka mosia bo ḷumoḷan kon dagat in roriga, Akuoi, ki TUHAN in momobak kon bokoḷ mita, dá apad in Ongkag in Nil moingkagdon totok. Bangusa in Asyur inta mododia in poompáan, bo Mesir inta motorindog in kobuḻiandon in kawasa.

¹²Akuoi in moginropotbí kon umat-Ku, mosia in tumoḷutuibí in mosumba kon i-Nakó. Akuoi, ki TUHAN, ain nosingog.”