Read Mongondow ZAKHARIA 11 Bible Online

ZAKHARIA 11 - Mongondow bible

ZAKHARIA 11

¹Ei Libanon, bukádon in ngaramu mita, sinbá tuḷú momokak kon pangkoi mita in arasmu! [13]

²Ei pangkoi in daru, pogamuidon, sin noobatdon in pangkoi mita in ḷokuyú, pangkoi mita inta mongotoyang ain noumpag. Ei pangkoi mita mongoḷoben kon Basan, pongombaḷdon. Sin kayuon mita moḷoben sinokotaḷunandon komintan.

³Indongogaidon in amui in pongawasa mita noinggamádon in ponango-nangoian kon i monia! Indongogaidon in ganggor in singa mita kon kayuon; sin nogoguyaatdon in pinogutunan monia kinoouput in Ongkag in Yordan.

⁴Ki TUHAN Allah in noguman kon inakó, “Pogaidon naonda bo iko in gombala [14] inta noḷukad kon domba inta bain ratáan.

⁵Mototaḷuinea mita noḻimod kon domba mita tatua táe diábí ihukum. Mosia inta nopotaḷui in tapú in domba mita tatua in noguman, ‘Dinayo-dayowdon in ki TUHAN! Tanaa in nodugangdon nooyúon in kita!’ Gombala mita tatua in diábí in tabi kon domba mita inta biniag monia.

⁶Akuoi in diá bidon motabi kon i inekabí kon butá tanaa. Akuoi tontaní in moposarakan kon bayongan in intaunea mita kon pongawasa mita. Mosia tua in morimumud kon butá tanaa, bo Akuoi in diá bidon mogagow bui nongkon kawasa monia.”

⁷Akuoi, ki Zakharia, inuboḻian in mopopotaḷui mita kon domba sin moḷukad kon domba mita inta ratáan. Oyúon in tungkudku; tobatú in sinangoianku “Totabi” bo tobatú in “Bogotan”. Onda intua akuoi in nomangkoidon noḷukad bo nonompia kon domba mita tatua.

⁸Toḷu in gombala inta doí kon inakó nokoinggamá kon sabarku. Mosia in pinoguntunku kon bonu in tongobuḷan monag.

⁹Onda intua akuoi in noguman kon paanan in domba tatua, “Akuoi in doídon moḷukad kon i monimu. Inta musti matoi in biódon mako in matoi, bo inta musti moyopú, in biódon in moyopú. Bo kiagatnea in motaaudon in mosiḻimodan.”

¹⁰Bo tungkud inta sinangoianku “Totabi” tatua in ginamáku poḷat pinutoḷku sin morabut kon dodandian inta pinomia i TUHAN takin bayongan in bangusa.

¹¹Kon singgai doman tatua dodandian tatua irabutdon. Mopopotaḷui mita in domba tatua monaridimai kon inakó, bo mosia in nonotaaudon kon ki TUHAN in koyogotdon in mosingog pinongin bayongan in aidku.

¹²Akuoi in noguman kon i monia, “Aka tai tuang mita moibog, yo ogoidon in tondan in pinogaidanku, aka diá, dá dikadon.” Bo inogoian monia in akuoi in doit saḷaka toḷu nopuḷú tondan in pinogaidanku. Ki TUHAN in noguman kon inakó, “Bonu in doit tatua kon kas kon Baḷoi-Ku.” [15] Dá binonuku in doit saḷaka toḷu nopuḷú tatua kon kas kon Baḷoi i TUHAN. Tongábí natuata in ponghargaan monia kon inakó!

¹⁴Nopaḷut mako kon tua pinutoḷku in tungkudku inta nogindua, inta sinangoianku “Bogotan”. dá nobotakdon in pinonobatúan in Yohuda bo Israel.

¹⁵Bo ki TUHAN in nogumandon kon inakó, “Pogaidon komintanpa naonda bo iko in gombala, táe kon tanaa in mobaḻí gombala inta diá mopia.

¹⁶Sin Akuoi in mopotabábí in gombala tobatú sin moḷukad kon paanan in domba-Ku, táe diábí pandungonneamai in domba inta nobuḻi; diábí tayakonnea in domba inta noiḷangkam, diábí doman mongundam kon domba inta kinekeban, bo diá mopokaan in domba inta nobiagpa. Nodapotbí in siadon tontaní in nokaan kon tapú in domba inta totok in noḷomumu bo norabut kon konuku mita in mahaḷuk tatua.

¹⁷Kinutukdon totok in gombala inta diá baraguna tatua! Sia in nonaḷámaidon kon paanan in dombanea. Parang in mogimpaḷut kon kawasanea. Kokaḷnea in moḻemédon bo mata koḷanannea in mobilogdon.”