Read Mongondow ZAKHARIA 12 Bible Online

ZAKHARIA 12 - Mongondow bible

ZAKHARIA 12

¹Naa in koyow i TUHAN soaḷ Yerusalem. Ki TUHAN inta nomukat kon ḷangit, nomaḻí kon dunia naa bo nobogoi in kobiagan kon intau, in noguman,

²“Baḻíon-Ku in Yerusalem naonda bo palo binonuan in anggur; butá mita topodiugneamai monginumbí kon tua bo moibaya-bayá mako naonda bo intau noḷoḷangu. Bo aka Yerusalem ḻibutan, kotá mita kon butá in Yohuda inta oyúonpa, in ḻibutan doman.

³Táe aka singgai tatua moiangoi, baḻíon-Ku in Yerusalem naonda bo batu inta mobogat; bangusa taondaka in moḷongasi mobuat kon tua yo moboditobí. Bayongan in bangusa kon dunia in dumugangbí sin monubu kon Yerusalem.

⁴Kon singgai tatua bayongan in kabaḷo potoboḻinguon-Kubí bo tumotakoinea mita in pobundaion-Ku, intau in Yohuda in ḷukadan-Ku, táe bayongan in kabaḷo in musungnea in bilogan-Kubí.

⁵Bo motoḷuadí mita in Yohuda in mosingogdon kon bonu in gina, ‘Ki TUHANbí Inta Totok in mokawasa in nobogoi kon ropot kon umat-Nea inta nogutun kon Yerusalem.’

⁶Kon singgai tatua motoḷuadí mita in Yohuda in baḻíon-Ku naonda bo tuḷú kon bonu in bonturungan kayu pondungú andeka poḷombow nodokot kon ḻimonag in pangkoi mita in gandum, mosia in moyopúbí kon bangusa mita topodiugneamai. Táe intau in Yerusalem in umuranbí mogutun kon bonu in kotá takin moodom.

⁷Akuoi, ki TUHAN, in muna-munamai mopountung kon tontara in Yohuda, sinbá kahoromatan inta sinarima in buí i Daud takin intau in Yerusalem in diá moiḻiu kon kahoromatan inta sinarima in intau in Yohuda ibanea.

⁸Kon singgai tatua Akuoi in mogoḻiung kon intau inta nogutun kon Yerusalem; bo inta totok in moyangkó kon sigad monia in mobaḻí ná koropot i Daud. Mosia in kapitonbí in buí i Daud naonda bo malaekat-Ku, nodapotbí in naonda bo Akuoi tontaní in nokapit.

⁹Kon singgai tatua Akuoi in moyompat kon bayongan in bangusa inta monungkuḷ monubu kon Yerusalem.

¹⁰Onda intua buí i Daud takin intau mita inta nogutun kon Yerusalem ogoian-Kudon in gina inta kototabi bo moibog mosambayang. Mosia in imindoibí kon inia inta ain sinumbuk monia bo ombaḷan monia naonda bo intau mongombaḷ kon kinopatoian i adínea tuḷong. Mosia in mongombaḷbí imibo-ibog, naonda bo intau inta ain kinobuḻian i adínea guya-guyang.

¹¹Kon singgai tatua oyúonbí in ombaḷ motoyang kon Yerusalem, naonda bo amui kon Hadad-Rimon [16] Kon Ḷopá in Megido.

¹²Bo pomuḷoi in motoḷuadí kon butá tatua in mongombaḷ tonta-tontaní; motoḷuadí buí Daud, motoḷuadí buí i Natan, motoḷuadí buí i Lewi, motoḷuadí buí i Simei, bo bayongan in motoḷuadí ibanea. Pomuḷoi in motoḷuadí in mongombaḷ tonta-tontaní, bo ḷoḷaki mita nongkon batúan in motoḷuadí in mongombaḷbí kon tampat inta noyotontaní in bobay mita.”