Read Mongondow ZAKHARIA 13 Bible Online

ZAKHARIA 13 - Mongondow bible

ZAKHARIA 13

¹Ki TUHAN Inta Totok in mokawasa in noguman, “Kon singgai tatua momukábí bokaká tobatú sin mopotusi kon buí i Daud bo intau inta nogutun kon Yerusalem nongkon bayongan in dosa bo posumbaan kon berhala inta ain inaidan monia.

²Kon singgai tatua popatan-Kudon in tangoi in berhala mita nongkon butá tanaa, dá diádon tobatúmai in mokotoropa kon tua. Bayongan intau inta mongaku kon nabi in sia poguntunon-Ku takin i monia inta kinokawasaan in dimukud inta motombogá.

³Bo aka oyúonpa doman in intau inta noguman kon sia in mopotaau in koyow, yo ki amá bo ki ináneadon tontaní in moguman kon inia kon sia in musti hukumon dapot in matoi, sin uboḷbí in siningognea tua, sia in tumbukonbí i amá bo inánea tontaní modapot in matoi.

⁴Kon singgai tatua, nabi mita in angoianbí in oyá in mogaid naonda bo nabi. Mosia in diá bidon mogiḷambung in nabi sin monguboḷ bo dumodia kon oontongon monia.

⁵Noyotoḻikudon kon tua mosia in mogumandon, ‘Akuoi in deemanbí nabi. Akuoi in tongábí monononggobá inta nogaid kon gobá kinoouput in kobiagan.’

⁶Bo aka intau moḻibó kon inia, ‘Kekeb onu in kon dodobmu nion?’, sia in motubagbí, ‘Akuoi in kinotugatan in kekeb tatua kon baḷoi in yobayatku.’ ”

⁷Ki TUHAN Inta Totok in mokawasa in noguman, “Sindogdon, ei kedang, bo tubudon in gombala [17] inta nogaid kon kopontingan-Ku! Ḻimodon in sia, dá domba mita in moiraritdon. Tubuon-Kubí in umat-Ku,

⁸bo kon sinangkub in butá 2/3 in intaunea in matoibí.

⁹Tongádon 1/3 nea in mosaḷamat. Bo mosia tua in potusion-Ku naonda bo saḷaka inta pinomurni in tuḷú. Mosia in ujion-Kubí naonda bo intau moguji kon buḷawan. Bo mosia in mosambayang kon i-Nakó, bo tubagan-Ku in mosia. Akuoi in moguman kon i monia kon mosia in umat-Ku, bo akúon doman monia kon Akuoibí in ki TUHAN Allah monia.”