Read Mongondow ZAKHARIA 3 Bible Online

ZAKHARIA 3 - Mongondow bible

ZAKHARIA 3

¹Kon oontongon ibanea doman, ki TUHAN in nopoontong kon inakó in Imang Moḷoben ki Yosua inta simindog mako kon tayowon in malaekat i TUHAN. Kon diugmai i Yosua sinimindog mako in Ibilis [2] inta nosadiadon moponapud kon inia.

²Malaekat i TUHAN [3] in noguman kon Ibilis, “Igumon mako ki TUHAN in mohukum kon inimu ei Ibilis! Igumon mako ki TUHAN inta notabi kon Yerusalem in mohukum kon inimu. Intau tanaa in naonda bo kayu topongkó inta inugut nongkon yuak in tuḷú.”

³Ki Yosua in sinimindog kon tua nogiḷambung in ḷambung inta totok in nokotor.

⁴Dá nogumandon in malaekat tatua kon mobobantung mita kon soroga, “Ḷumbúdon in ḷambung nokotor inta pinaké in intau tanaa.” Bo sia in noguman kon i Yosua, “Dosamu in iḷumbúkudon, iko in ogoiankudon in ḷambung mobagu.”

⁵Sia in ḷagidon nopotabá kon mobobantungnea mita mopoḷutud [4] serban inta nodarit kon uḷu i Yosua. Mosia in dinumudui bo onda intua pinopoḷutudon monia in ḷambung mobagu tatua kon inia koḷuka-ḷukad in malaekat i TUHAN.

⁶Onda intua malaekat i TUHAN nopotaau in tosingogon i TUHAN kon i Yosua,

⁷“Aka iko tumoḷutui kon hukum-Ku mita bo mopobayá in oaidan mita inta inogoi-Ku kon inimu, dá modapot in kon singgai moiduduimai iko umuran motaau mobaḻí itoi kon bonu in Baḷoi-Ku bo monompiamai kon palasnea. Akuoi in mokidongogbí kon sambayangmu mita, naonda bo Akuoi mokidongog kon sambayang in malaekat inta kon diug-Ku.

⁸Indongogaidon ei Imang Moḷoben Yosua, bo moiko doman imang mita inta nobaḻí yobayatnea mita, moiko komintan in nobaḻí lambang in singgai moiduduimai inta mopia. Kon singgai tatua Akuoi in mopotabá kon bobantung-Ku inta sinangoi ‘Tokat’.

⁹Inukat-Ku kon tayowon i Yosua in batu tobatú inta notompitu inta kinurigan-Ku in pais mita. Tongá tosinggai monag tua ḷumbúon-Ku in dosa nongkon butá tanaa.

¹⁰Aka singgai tatua moiangoi, pomuḷoi in intau in mogoiníbí kon topodiugneamai sin mamangoi motarima kon dame bo kobiagan motompia kon yua-yuak in gobá mita in anggur bo pangkoi mita in aramu.”