Read Mongondow ZAKHARIA 6 Bible Online

ZAKHARIA 6 - Mongondow bible

ZAKHARIA 6

¹Akuoi in nokoontong kon oontongon ibanea. Tanaa inontongku in kereta in parang opat inta iḻumuai nongkon sigad in buḷud porunggu doyowa.

²Kereta mita tatua in inugut in kabaḷo tododoyowa, kereta inta dungkuḷ in kabaḷo nopura, kereta nogindua in kabaḷo norondí,

³kereta nogintoḷu in kabaḷo nobudó bo kereta inta noginggopat in kabaḷo nobaḷam-baḷang.

⁴Akuoi in noḻibó kon malaekat tatua, “Tuang, onu in mangaḻe in kereta mita in parang tanaa?”

⁵Sia in notubag, “Mosia in nobuat minayá ná opat nopobayáan naonda in namangoi mako kon tayowon i TUHAN inta nomaḻí kon dunia naa.

⁶Kereta in parang inta inugut in kabaḷo norondí in nopobayá in Babel kon utuan. Kabaḷo nobudó nopobayá ná toyopan bo kabaḷo inta nobaḷam-baḷang nopobayá ná negara kon toḷatan.”

⁷Kon dodai in kabaḷo inta nobaḷam-baḷang tatua iḻumuai, koontongan nádon diá mokotahang in mosia in mayá monaridi kon dunia. Malaekat tatua in noguman, “Bayádon sin monaridi kon dunia!” Dá minayádon in mosia.

⁸Onda intua malaekat tatua noguman kon inakó, “Kabaḷo inta minayá in Babel tatua in nopoonow kon torú i TUHAN.”

⁹Ki TUHAN in nobogoi in koyow tanaa kon inakó.

¹⁰Kai-Nia, “Gamádon in sosumba inta inogoi i Heldai, i Tobia bo i Yedaya, intau mita inta bagu nobui nongkon pinoḷumbúan kon Babel. Ḷagidon dia in sosumba monia tatua kon baḷoi i Yosia ki adí i Zepanya.

¹¹Nongkon buḷawan bo saḷaka inta inogoi monia tatua, pomiaaidon in mahkota tobatú bo popoḷutud kon uḷu i Imang Moḷoben ki Yosua ki adí i Yozadak.

¹²Potaau kon inia kon Akuoi ki TUHAN Inta Totok in mokawasa in noguman, ‘Intau inta dinonoi ki Inta Tokat, in mokoḷongasidon kon tampat inta pogutunannea bo sia in moposindog bui in Baḷoi i TUHAN.

¹³Siabí tua inta bain moposindog in Baḷoi-Ku bo motarima kon kahoromatan naonda bo datu tobatú, bo sia in momarenta kon rayatnea. Imang tobatú in umapidbí kon inia bo mosia in mogaidon moyotakin takin pia-pia mako.’

¹⁴Mahkota tatua in tagúon kon Baḷoi-Ku sin monorop kon i Heldai, [7] kon i Tobia, kon i Yedaya, bo kon i Yosia. [8]

¹⁵Intau mita in mamangoibí nongkon tampat inta moyayú bo moduḷu moposindog in Baḷoi-Ku. Aka baḷoi tatua moḷapatdon, yo kotaauandon monia kon Akuoi ki TUHAN Inta Totok in mokawasa in nopotabádon kon inimu namangoi kon i monia. Tua komintan in mobaḻíbí aka mosia in totu-totuu dumudui kon parenta-Ku, ki TUHAN Allah monia.”