Read Mongondow ZAKHARIA 7 Bible Online

ZAKHARIA 7 - Mongondow bible

ZAKHARIA 7

¹Kon singgai inggopatnea kon buḷan Kislew, inta buḷan noginsiow, kon taong inggopatnea kon pinomarentaan i Datu Darius, ki TUHAN nobogoi in koyow bui kon inakó.

²Intau in Betel ain nopotabá kon i Sarezer bo kon i Regem-Melekh takin intau monia minayá in Baḷoi i TUHAN Inta Totok in mokawasa sin mopoigum in barakat-Nea.

³Mosia in pinotabá doman noḻibó kon imang mita bo nabi mita, nanaa, “Paraḷupa degá in kami mogamui kon kinorimumudan in Baḷoi i TUHAN takin mopuasa kon pomuḷoi in buḷan noginḻima ná inta ain inaidanmai nami kon taongannea?”

⁴Naa in koyow i TUHAN inta namangoi kon inakó.

⁵Kai-Nia, “Potaaudon kon bayongan intau kon butá tanaa bo kon imang mita, kon puasa bo amui inta pinobayá monia kon buḷan noginḻima bo noginpitu kon bonu in pitu notaong naa deemanbí mohoromat kon i-Nakó.

⁶Natua doman kon dodai in mosia nongaan bo nonginum, mosia in tongábí mopoorop in ibog monia tontaní.”

⁷Tuata in siningog i TUHAN pinongin nabi mita kon tungkuḷ intua kon dodai in Yerusalem inutunanpa bo intaunea in nobiagpa notomomon. Kon dodai intua intau in diábí tongá mogutun kon ḻipú mita kon diugmai in kotá táe nodapotbí in kon dotá in toḷatan bo kon obagaanmai in tombuḷud kon dotá in toyopan.

⁸Ki TUHAN Inta Totok in mokawasa nobogoi in koyow tanaa kon inakó,

⁹“Kon taong mita inta ain noitaḻib inogoi-Ku in parenta tanaa kon umat-Ku, ‘Moiko in mustibí mokopoadil, kototabi bo mopia in gina kon tumpaḷa intau.

¹⁰Dikabí mondorot kon intau boba-bobay, adí uno-unon, intau mita ango-angoi inta nogutun kon yua-yuak monimu, andeka ki ineka in nobiag noyempeng. Bo dika doman monomayá kon moraat kon tumpaḷa intau.’

¹¹Táe umat-Ku motontogat in uḷu bo totokbí in doí mokidongog; mosia in nomaḷon kon bongoḷan monia sinbá diá mokodongog.

¹²Mosia in sinumontogat dá gina monia in nádon onda bo batu. Akuoi in sinumorú totok popisí in mosia doídon dumudui kon totundú mita inta inogoi-Kudon kon i monia pinongin nabi mita dungkuḷmai.

¹³Akuoi in doíbí notubag kon sambayang monia, sin mosia doman in doí mokidongog kon tungkuḷ in Akuoi nosingog.

¹⁴Naonda bo deḷang, Akuoi in nongaitdon kon i monia dá pakisadon in mosia nogutun kon butá mita in intau. Butá inta mopia tanaa ain nobaḻí noingongow diádon in mogogutun bo noḷogatdon.”