Read Mongondow ZAKHARIA 8 Bible Online

ZAKHARIA 8 - Mongondow bible

ZAKHARIA 8

¹Ki TUHAN Inta Totok in mokawasa in nobogoi in koyow tanaa kon inakó,

²“Akuoi in moibog totok motuḷung kon Yerusalem popisí in Akuoi totok in motabi kon intaunea mita, bo popisí in tabi-Ku tatua, moyaat in gina-Ku kon musung mita in kotá tatua.

³Akuoi in mobui mangoi kon Yerusalem, kotá-Ku inta motusi tatua, bo mogutun kon tua. Yerusalem in kotaauandon saḷaku kotá inta motoindudui, bo tombuḷud i TUHAN Inta Totok in mokawasa [9] in tangoionbí tombuḷud inta Motusi.

⁴Kon lapangan in kotá in Yerusalem, in ḻimitúbí bui in aki mita bo baay mita inta ain nogoguyangdon totok dá monungkudon in mayá.

⁵Daḷan mita kon kotá in mopuḻingbí in mongoadí mita inta moyambámai.

⁶Soaḷ tatua in koontongan diá kumaan kon akaḷ kon intau mita inta nobiagpa nongkon bangusa tanaa, táe diábí in diá kumaan kon akaḷ-Ku.

⁷Akuoi in moposaḷamat in umat-Ku nongkon butá mita inta ain pinogakutan kon i monia,

⁸bo modia bui kon i monia nongkon pomukaan bo nongkon toyopan, dá mosia in mogutun kon Yerusalem bui. Mosia in mobaḻí umat-Ku bo Akuoi in ki Allah monia. Akuoi in momarenta kon i monia takin satia bo moadil.”

⁹Ki TUHAN in noguman kon umat-Nea, “Koropot in ginamu! Tanaa moiko in nokodongogdon kon tosingogon mita inta ain doman siningog in nabi kon dodai in dodatoḷan inukat, sin moposindog bui in Baḷoi-Ku.

¹⁰Kon dodai in deemanpa oras tatua diábí mokotondan kon tonaga in intau andeka mahaḷuk, bo diábí in mokorasa kon moaman nongkon indoyó in musung. Pinoropatoi-Kudon in intau tobatú takin intau ibanea.

¹¹Táe tanaa intau mita inta nobiagpa nongkon bangusa tanaa moyoposidon in koḻipod in poaid-Ku kon i monia.

¹²Mosia in moponimboibí in bibit takin dame. Pangkoi mita in anggur monia in momungaibí, butá in mopoḷuaibí in bungainea, bo uyan in umuranbí morogot. Bayongan in barakat tatua in ogoi-Kubí kon bangusa mita inta nobiagpa nongkon bangusa tanaa.

¹³Ei intau in Yohuda bo Israel! Kon tungkuḷ intua, aka intau ango-angoi mosikutukandon, yo mosia in moguman, ‘Igumon mako bodito inta noiuma kon Yohuda bo israel in moiuma doman kon inimu!’ Táe Akuoi in moposaḷamatbí kon i monimu, dá intau mita ango-angoi tatua in mosigumanan, ‘Igumon mako barakat inta moiponag kon Yohuda bo Israel, moiponag doman kon inimu!’ Tuamai in koropotdon in ginamu bo dika moondok!”

¹⁴Ki TUHAN Inta Totok in mokawasa in noguman, “Kon dodai in mogoguyangmu nokopopisí kon i-Nakó sinumorú, sinantú-Kudon kon hukumon in mosia kobogaton. Diábí binaḷuian-Ku in tosingogon-Ku tatua, táe pinobayá-Kubí.

¹⁵Táe tanaa barakatan-kudon in intau in Yohuda. Dá dikadon moondok.

¹⁶Naa in parenta mita inta musti aidan monimu: Aka mosingog, singogdon inta totuu kon tumpaḷa intau. Ogoi in bontow in tosingogon inta moadil bo inta modia kon modame.

¹⁷Dika monomayá kon inta moraat kon tumpaḷa intau. Dika mongibot kon uboḷ. Kodoí-Ku in inta uboḷ bo inta diá moadil bo aid moromú.”

¹⁸Ki TUHAN Inta Totok in mokawasa nobogoi in koyow tanaa kon inakó ogoi kon umat-Nea,

¹⁹“Puasa inta pinobayá kon buḷan noginggopat, noginḻima, noginpitu, bo nogimpuḷú in mobaḻíbí poramean mita inta mokoḷunganga bo mokosanang kon intau in Yohuda. Kotá bidon in inta moitutui bo inta modame!”

²⁰Ki TUHAN Inta Totok in mokawasa in noguman, “Orasnea in moiangoibí intau nongkon nobayong in kotá [10] in mamangoibí in Yerusalem.

²¹Intau mita nongkon kotá tobatú in moguman kon intau kon kotá ibanea, ‘Igai mayá in kita mosumba kon i TUHAN Inta Totok in mokawasa bo mopoigum in barakat-Nea. Duduidon takin inami!’

²²Bo mobayong in intau bo bangusa inta moropot in mamangoi in Yerusalem sin mosumba kon i-Nakó ki TUHAN Inta Totok in mokawasa bo mopoigum in barakat-Ku.

²³Kon singgai mita tatua mopuḷú in intau ango-angoi in mamangoi kon intau in Yahudi tobatú bo moguman, ‘Kami in moibogbí doman in mopia ná moiko; sin dinongogdon nami kon ki Allah in nomarakat kon i monimu.’ ” Ki TUHAN Inta Totok in mokawasa ain nosingog.