Read Mongondow ZAKHARIA 9 Bible Online

ZAKHARIA 9 - Mongondow bible

ZAKHARIA 9

¹Naa in koyow i TUHAN. Sia in nonantúdon kon mohukum kon negara in Hadrakh bo kotá in Damsyik. Deemanbí tongá suku mita in Israel, táe ibukotá in Siria in ki TUHAN kitogi.

²Hamat inta noyosigad in Hadrakh in ki TUHAN doman in kitogi, natua doman in kotá mita in Tirus bo Sidon takin bayongan kototaau in intaunea.

³Tirus in noposindogdon in dinding mita pogoḻingoi kon inia bo nomontuyung kon buḷawan bo saḷaka kino bayong totok dá naondadon bo pakakat biasa ná bungaion bo yoná kon daḷan.

⁴Táe baḻíonbí i TUHAN mobiag mobogá. Bayongan in kaoyúonan in kotá tatua in ḷumbúon-Neabí kon bonu in dagat bo kotá tatua tontaní in modaitbí kaanon in tuḷú.

⁵Kotá in Askelon bo Gaza in mokoontongbí kon inia bo angoian in ondok. Ekron in mokoontongbí doman bo kobuḻian in bayongan in kamangnea. Gaza in kobuḻian in datunea, bo Askelon in mobaḻí moingongow diá in mogogutun.

⁶Asdod in pogutunanbí in intau mita nongkon bangusa mita inta noyagi-yagimai. Ki TUHAN in noguman, “Intau in Pilistin inta moḷoḷatú in yompaton-Kubí.

⁷Mosia in diá bidon mokaan bui kon ponoyá inta oyúonpa in dugú andeka kaanon ibanea inta pinoton. Bayongan intau inta kiagatneapa in mobaḻí umat-Ku bo inanggap kiagat in suku in Yohuda. Ekron in mobaḻídon umat-Ku, naonda bo intau in Yebus [11] kon dungkuḷmai.

⁸Ḷukadan-Kubí in butá-Ku bo ḷonggaian-Kubí in tontara mita ango-angoi inta tumaḻib kon tua. Diá bidon ogoi-Ku in monondorot mononggata kon umat-Ku. Sin roriga monia in inontong-Kudon.”

⁹Ei intau in Sion, pokoḷungangadon! Ei intau in Yerusalem, ponggoḷokapdon! Indoiaika! Datumu in mamangoi takin nountung! Sia in datu moadil inta nodia kon kasaḷamatan. Táe moompá totok in dodia sia in noiyaput sinumakoi kon keledai, keledai batánea.

¹⁰Ki TUHAN in noguman, “Kereta mita in parang nongkon Epraim in ḷumbúon-Kubí, bayongan in kabaḷo kon Yerusalem in yopúon-Kubí bo bayongan in piot in tokorimumudon-Kubí. Datumu in mopotaaubí in dodamean kon sigad in bangusa mita. Nongkon dagat mopobayá in dagat siabí in mongawasa, nongkon Ongkag in Eprat nodapot in popod in dunia.”

¹¹Ki TUHAN in noguman kon umat-Nea, “Pinodoyon kon dodandian inta pinomia-Ku takin i monimu, dodandian inta pinosah in dugú in kuruban sosumba, poḷuat-Kudon in rayatmu inta nororiga kon pinoḷumbúan naonda bo intau inta kon bonu in parigí inta noingkag.

¹²Pobuidon ei intau mita iḷumbú, tanaa in oyúondon in kamang monimu. Pobuidon kon pononiunganmu Akuoi in umuranbí momarakat kon i monimu. Indongogaika: Kodua noguntuḷ in kobayongnea ogoi-Ku in barakat popisí in bayongan roriga inta ain kinorasaan monimu.

¹³Yohuda in baḻíon-Ku piot in pahlawan, bo Israel in mobaḻí piot inta sinadiadon popiot. Intau mita in Sion pakéon-Ku mobaḻí kedang; kedang tatua in pakéon-Ku pondudur kon intau mita in Yunani.”

¹⁴Ki TUHAN in mokipogontongbí kon umat-Nea, naonda bo kilat in piot-Nea mita pinoḷutam-Nea. Ki TUHAN Inta Totok in moḷantud in mogirupbí kon torompet tomponuot monubu bo mayá kon bonu in deḷang nongkon toḷatan.

¹⁵Umat-Nea in notantú bidon kon ḷukadan-Nea, dá bayongan in musung modait taḷowon monia. Naonda bo kokow in intau inta noḷoḷangu in oinumon, natuata in kokow monia kon in parang. Naonda bo dugú in kuruban inta pinoburé kon tudu in mezbah, natuata in dugú in musung moibutak.

¹⁶Aka singgai tatua moiangoi, ki TUHAN in moposaḷamatbí kon umat-Nea, naonda bo gombala moposaḷamat in dombanea nongkon anib. Mosia in monindarbí kon butá i TUHAN, naonda bo permata mahkota inta mopouḻi-uḻinag.

¹⁷Totuu mopia in butá i TUHAN kon singgai moiduduimai, totuu mopia bo moḷunat! Kon tua anggur bo gandum motoḷubú in kobobiagnea, mokoropot kon tayowmobiag bo mongodeaga.