Read Mongondow MATIUS 1 Bible Online

MATIUS 1 - Mongondow bible

MATIUS 1

¹Nanaa in asaḷ-usuḷ i Yesus Kristus, buí i Daud inta buí i Abraham.

²Ki adí i Abraham ki Ishak, ki adí i Ishak ki Yakub, ki adí i Yakub ki Yohuda bo ki utatnea mita, ki adí i Yohuda kon i Tamar ki Peres bo ki Zerah, ki adí i Peres ki Hezron, ki adí i Hezron ki Ram, ki adí i Ram ki Abinadab, ki adí i Abinadab ki Nahason, ki adí i Nahason ki Salmon, ki adí i Salmon kon i Rahab ki Boas, ki adí i Boas kon i Rut ki Obed, ki adí i Obed ki Isai, ki adí i Isai ki Datu Daud.

⁶Nongkon i Daud nodapot in masa pinoḷumbúan kon bayongan intau in Israel kon Babel naa in tangoi mita inta pinais: Ki adí i Daud nongkon i buḷoi Uria, ki Salomo, ki adí i Salomo ki Rehabeam, ki adí i Rehabeam ki Abia, ki adí i Abia ki Asa, ki adí i Asa ki Yosapat, ki adí i Yosapat ki Yoram, ki adí i Yoram ki Uzia, ki adí i Uzia ki Yotam, ki adí i Yotam ki Ahas, ki adí i Ahas ki Hizkia, ki adí i Hizkia ki Manasye, ki adí i Manasye ki Amon, ki adí i Amon ki Yosia, ki adí i Yosia ki Yekhonya bo ki utatnea mita.

¹²Mosia nobiag kon wakutu in hukum kon Babel. Nongkon masa inta bayongan intau Israel iḷumbú kon Babel noidapot i masa kinolahiran i Yesus tanaa in tangoi mita inta pinais: Ki adí Yekhonya ki Sealtiel, ki adí i Sealtiel ki Zerubabel, ki adí i Zerubabel ki Abihud, ki adí i Abihud ki Elyakim, ki adí i Elyakim ki Azur, ki adí i Azur ki Sadok, ki adí i Sadok ki Akhin, ki adí i Akhin ki Elihud, ki adí i Elihud ki Eleazer, ki adí i Eleazer ki Matan, ki adí i Matan ki Yakub, ki adí i Yakub ki Yusup ki buḷoi i Maria. Bo ki Maria tuata inta nopononggadí kon i Yesus inta sinangoi ki Kristus.

¹⁷Koantónea komintan pinangkoi kon i Abraham noidapot kon i Daud, mopuḷú bo opat nopobuían, bo pinangkoi nongkon i Daud noidapot in dinia kon Babel mopuḷú bo opat doman nopobuían, natua doman nongkon Babel noidapot kon i Kristus mopuḷú bo opat doman nopobuían.

¹⁸Nanaa in ouman kinolahiran i Yesus Kristus: Kon wakutu in ki Maria ki iná-Nea bagupa kinantangan i Yusup, mangaḻenea taya dua naa diápabí notonibuḷoi, táe naanta ki Maria ain bidon sidia. Tongá adí inta kon siannea tua in nobaḻí lantaran kawasa in Roho i Allah.

¹⁹Táe ki Yusup ki buḷoinea naa in intaubí inta motuḻid in gina dá doíbí in sia moporaatmai kon tangoi buḷoinea kon tayowon intau moantó sahingga naonda in nokotaaumai kon natua, niatonnea gaaton in ki Maria táe diábí potaa-taaunea mako kon intau mita ibanea.

²⁰Tongá kon wakutu in sia koyogot nopomiki-mikirmai kon makusudnea tatua, malaekat i Tuhan namangoi kon inia kon bonu in togoindop bo noguman: “Yusup, buí i Daud, donaaibí moondok iko motonibuḷoi takin i Maria, sin adí inta kon bonupa in siannea tua in nobaḻí sin kawasabí in Roho i Allah.

²¹Sia in mopononggadí in adí ḷoḷaki bo Sia tangoianmu ki Yesus, sin Sia tuata inta moposaḷamat kon umat mita baradosa.”

²²Tua in mobaḻí sinbá motompodon onu inta pinoguman i Tuhan kon nabi-Nea, nanaa:

²³“Tobatú mongodeaga in modia kon sian bo mopononggadí kon tobatú adí ḷoḷaki bo adí tatua tangoian monia ki ‘Imanuel’, inta mangaḻenea: Ki Allah kotaki-takin naton.”

²⁴Naonda in ki Yusup nobangon, dinuduiannea onu inta aindon pinoguman in Malaekat i Tuhan kon inia. Sinonibuḷoinea in ki Maria.

²⁵Táe diápabí siniugannea in ki Maria nodapot in adí tatua pinononggadí. Bo naonda in adí ḷoḷaki tatua pinononggadídon, dá sinangoian i Yusup ki Yesus in Sia.