Read Mongondow MATIUS 10 Bible Online

MATIUS 10 - Mongondow bible

MATIUS 10

¹Ki Yesus in nogoiní kon murí-Nea inta mopuḷú bodoyowá tua bo nobogoi in kawasa kon i monia sin poguntun kon dimukud mita moraat bo pongundam kon bayongan takit bo roriga.

²Naa in tangoi monia mopuḷú bodoyowá tua: Ki Simon (inta dinonoi ki Petrus) bo ki Andreas ki utatnea, ki Yakobus ki adí i Zebedeus bo ki Yohanes ki utatnea.

³Ki Pilipus bo ki Bartolomeus, ki Tomas bo ki Matius inta mononagi kon pajak, ki Yakobus ki adí i Alpeus, ki Tadeus;

⁴ki Simon intau in Zelot bo ki Yudas Iskariot inta nomaḻidawan kon i Yesus.

⁵Taya mopuḷú bodoyowá tua pinotabá-Nea takin koyow nanaa: “Donaai moiko mayá in ḻipú in intau ibanea inta deeman Yahudi. Andeka mayá in ḻipú intau in Samaria.

⁶Táe bayádon kon intau mita in Israel, inta nongoiḷaḻe.

⁷Bayádon bo poguman, kon ki Allah in ḷagidon mamangoi momarenta saḷaku Datu.

⁸Undamaidon in intau notakit; biagdon bui in intau minatoi; undamai doman in intau inta pinanyaki kusta, bo untun in dimukud mita moraat. Naa komintan in inogoi pinonotabi kon i monimu. Manangka intua yo ponotabi domandon.

⁹Donaaidon in moiko modia kon buḷawan, saḷaka andeka tambaga.

¹⁰Donaai in moiko mobaḷun kon binayáan, donaaidon modia kon ḷambung doyowa no par, aip in sioḷ andeka tungkud, sin intau inta mogaid patusbí motarima kon boḻi in pinogaidannea.

¹¹Bo aka moiko mayá in tobatú kotá andeka ḻipú, yo potayak muna kon intau inta moibog motarima kon i monimu. Pogutundon kon tua modapot in moiko mobui.

¹²Bo aka moiko tumuot kon baḷoi intau, yo singog in nanaa, ‘Igumon mako barakatan i Tuhan in moiko.’

¹³Aka tarimaan monia, yo salammu tatua mobaḻí barakat kon i monia. Táe aka diá tarimaan monia, yo barakatnea in mobui kon inimu.

¹⁴Bo aka oyúon intau doí motarima kon i monimu bo doí doman mokidongog kon singogmu, yo ḷuai bo taḷaaidon in baḷoi bo kotá tatua bo topirai in ḷobud kon sioḷmu.

¹⁵Pogumanku kon i monimu! Kon singgai pohakiman, intau mita in Sodom bo Gomora in mogaa-gaan in hukumannea nongkon intau mita tatua!”

¹⁶“Tagú totok kon gina in singog-Ku: Akuoi in mopotabá kon i monimu, naonda bo domba dinia kon yua-yuak in serigala. Manangka intua mokopoingat totok naonda bo uḷag bo mokopotuḻid kon gina naonda bo ḷagapan paḷoma.

¹⁷Táe mokopoingat, sin oyúon in moposarakan kon i monimu kon itoi mita in agama. Bo sikisaan monia in moiko kon baḷoi pososambayangan.

¹⁸Moiko in diaan kon tayow in pongawasa mita bo datu mita popisí moiko in dumodudui-Ku. Bo tuata in kasampatanmu mobogoi in kosakusian soaḷ Akuoi kon i monia bo kon intau mita inta diá nonotaau kon i Allah.

¹⁹Táe aka moiko diaan sin adilon, yo donaaidon mohawatir bo momikir kon onu in singogon monimu kon tayowon monia. Sin komintan tua, in ogoi bidon kon i monimu aka wakutuneadon.

²⁰Sin deeman bidon moiko in mosingog, táe Rohobí i Amámu in mosingog kon bonu in ginamu.

²¹Bo nanaa in mobaḻí: Intau mita moposarakan kon i utatnea sin pokiḻimod. Aid natua in pomiaan doman in guyanga kon i adínea. Bo adí in monayowdon kon i iná bo i amánea, bo posarakannea sin ḻimodon.

²²Moiko in saturuon in bayongan intau sin moiko in murí-Ku. Táe ki ine in mokotahang modapot in kopaḷutannea, sia tua in mosaḷamat.

²³Aka moiko pogutúon monia kon tobatú kotá, yo poḷaguidon kon kotá ibanea. Sin poguman-Ku kon i monimu: Kon wakutu in diápa modait monimu kobayáan in ḻipu-ḻipúannea kon Israel, yo ki Adí Intau in namangoidon bui.

²⁴Diábí in murí moiḻiu kon gurunea, andeka simpaḷ moiḻiu kon i tuangnea.

²⁵Mobaḻídon aka tobatú murí motongkai in gurunea, andeka simpaḷ bo motongkai i tuangnea. Aka ki togi baḷoi bo tangoion ki Beelzebul, yo bambíkabí tombonu in baḷoinea tua.”

²⁶“Manangka intua donaaidon moiko moondok kon i monia. Sin diábí in tobatúmai inta noiḻingkop, in diá bukatan, bo diábí doman in tobatúmai inta noibuni in diá popotaau.

²⁷Onu inta pinoguman-Ku kon i monimu kon dodai in doḷom musti buion monimu poguman dodai in singgai mobayagdon, bo onu inta pinogombong kon bongoḷanmu, yo popotaaudon kon bayongan in intau!

²⁸Bo donaaibí moondok kon i monia inta moḻimod kon awak, táe diá inogoian in kawasa morabut kon nyawa. Kotoguondokbí kon i Allah inta kokawasa moḻimod kon awak bo morabut kon nyawa kon bonu in naraka.

²⁹Ḷagapan dui-duit doyowa boḻinea moyakag totok. Táe umpaka natua yo diábí tobatúmai in ḷagapan mita tatua in moḷabú kon butá aka deeman ibog i Amámu kon soroga.

³⁰Bá kotaauan monimu, kon bayongan buok kon uḷumu kinotaauan-Neabí in kobayongnea.

³¹Manangka intua donaaibí in moiko moondok. Sin moikobí in momaha-mahaḷ in ḷagapan dui-duit mita tatua!”

³²“Ki ine in diá mooyá in mongaku kon tayowon in intau moantó kon sia in dumodudui-Ku, yo sia in ḷabiton-Ku doman kon tayowon i Amá-Ku inta kon soroga.

³³Táe ki ine in momayow kon tayowon intau mobarong kon sia in dumodudui-Ku, yo sia in bayowan-Ku doman kon tayowon i Amá-Ku inta kon soroga.”

³⁴“Dikabí kon raionmai monimu Akuoi naa in mamangoi modia kon dodamean kon dunia naa. Akuoi in namangoi deemanbí modia kon dodamean, táe modiabí kon ropatoi.

³⁵Akuoi in mamangoi mopoyotondí kon adí ḷoḷaki nongkon i amánea, adí bobay nongkon i inánea, mototaka bobay nongkon i guyánea.

³⁶Tobaḷoian tua mobaḻí mogogimpongan.

³⁷Ki ine in motabi kon i amánea andeka kon i inánea moiḻiu kon tabinea kon i-Nakó sia tua in diá patus mobaḻí dumodudui-Ku. Natua doman ki ine in motabi kon i adínea ḷoḷaki andeka bobay bo moiḻiu kon tabinea kon i-Nakó, sia doman tua in diá patus mobaḻí dumodudui-Ku.

³⁸Bo ki ine in doí momotaan kon kayu pinoyotaḻempang bo dumudui kon i-Nakó, sia doman tua in diábí patus mobaḻí dumodudui-Ku.

³⁹Bo ki ine in moramuji mobiag yo sia in matoi, táe ki ine in matoi sin dinumudui kon i-Nakó, yo sia in mosaḷamat.”

⁴⁰“Ki ine in notarima kon i monimu, sia tua in notarima doman kon i-Nakó. Bo ki ine in notarima kon i-Nakó, sia in notarima doman kon i-Nia inta nopotabá kon i-Nakó.

⁴¹Ki ine in notarima kon tobatú nabi saḷaku nabi. Bo sia in motarima doman kon barakat in nabi, bo ki ine in motarima kon intau inta mobanar saḷaku intau mobanar, yo sia in motarima doman kon barakat in intau mobanar.

⁴²Bo ki ine in mobogoi in tubig noanai inumon, umpakabí tongá topalo kon intau inta bogá naa, sin sia in dumodudui-Ku, poguman-Ku kon i monimu, popirisayabí kon sia tua in mokouḻíbí kon boḻi in pinogaidannea!”