Read Mongondow MATIUS 13 Bible Online

MATIUS 13 - Mongondow bible

MATIUS 13

¹Kon singgai tua ki Yesus iḷumuai nongkon baḷoi tatua bo minayá iḻimitú kon bingkí in danow.

²Kon tua intau noroangoi bo noḻipung kon i-Nia, dá minayá in Sia sinumakoi kon uangga bo iḻimitú kon tua, intau moantó sinimindog komintan kon pintad.

³Bo mobarong in sinundú-Nea kon i monia táe nomaké in poumpamaan. Sia in nongonguman nanaa. “Tobatú intau monononggobá minayá bo nogambor.

⁴Kon wakutu in sia nogambor oyúon batoḷ in noḷabú kon bingkí in daḷan. Bo ḷagapan in namangoi bo kinaannea nodait intua.

⁵Oyúon doman in noḷabú kon butá inta noantó in batu. Batoḷ tatua in ḷagi nobiag sin nonipit in butánea.

⁶Táe naonda in nomukádon mata in singgai, biagnea tatua in noḷaḷow bo noingkag sin diá nonguakat.

⁷Oyúon doman in noḷabú kon yua-yuak in díat. Dugi tatua nobiag bo nonisí kon biag in pinomuḷa tatua dapot in minatoi.

⁸Táe oyúon doman in noḷabú kon butá inta nopia bo sia in nomungai; oyúon mogatut noguntuḷ, oyúon in onom nopuḷú noguntuḷ, oyúon doman in toḷu nopuḷú noguntuḷ in bungainea.”

⁹“Aka kobongoḷan, yo indongogai!”

¹⁰Bo murí-Nea mita in namangoi bo noḻibó kon i-Nia, “Nongonu sin ki Pak Guru in motundú kon in monia in momakébí in poumpamaan?”

¹¹Ki Yesus notubag, “Moiko aindon inogoian in totabi monotaau kon rahasia kon naonda in ki Allah momarenta, táe mosia tua in diábí.

¹²Intau inta oyúondon kon inia in duganganbí ogoian, sinbá sia in mokouḻí kon moiḻiu in kobayongnea. Táe intau inta diá in kon inia yo onupa inta kon inia yo daitondon gamáan.

¹³Manangka intua Akuoi motundú kon i monia nomaké in poumpamaan, sinbá umpaka nokoontong, táe mosia in naonda bo intau inta diá nokoontong; bo umpaka in mosia nokodongog, táe mosia in naonda bo intau inta diá nokodongog sahingga in diá kotaauan monia in mangaḻenea.

¹⁴Mosia tua in pinonompodan kon onu inta pinoguman i Nabi Yesaya, nanaa, ‘Ki Allah in noguman: Mosia in umuran mokidongog, táe diá momangaḻe; mosia in umuran monarukiramai táe diá monotaau kon onu inta nobaḻí.

¹⁵Sin gina in intau mita tanaa ain sinimimbunod, bo bongoḷan monia in bongoḷan bo mata monia ain binilogan. Sinbá mata monia in diá mokoontong, bo bongoḷan monia in diá mokodongog, sin dikabo komangaḻeandon monia in onu inta pinoguman bo mosia in mobui mangoi kon i-Nakó, bo posaḷamaton-Ku in mosia.’ ”

¹⁶“Táe mopia totok in matamu sin nokoontong bo bongoḷanmu sin nokodongog.”

¹⁷Sin poguman-Ku kon i monimu, “Mobarong in nabi bo intau inta mobanar in moibog mokoontong kon onu inta inontongdon monimu, táe mosia in diá nokoontong, bo mosia in moibog doman mokidongog kon onu inta aindon dinongog monimu, táe mosia in diá nokodongog.”

¹⁸“Manangka intua indongogai in mangaḻe in poumpamaan tatua.

¹⁹Batoḷ inta noḷabú kon daḷan tua mangaḻenea in intau inta nokodongog kon Pirman kon naonda in ki Allah momarenta, táe diá kinomangaḻean monia. Kon tua namangoidon in Ibilis bo nogagow kon inta ain inambor kon bonu in gina monia.

²⁰Yo aka batoḷ inta noḷabú kon sigad in butá inta mobarong in batu, tua in mangaḻenea, intau inta nokodongog kon pirman tatua, bo baḷunea sinarima takin pia in gina.

²¹Táe Pirman tatua in diá nonguakat kon bonu in ginanea, sahingga in diá nonahang. Aka koantugan in yoyiga andeka pomogutúan popisí in Pirman tatua, yo intau tatua in baḷú mobaḷui in pirisaya monia kon i Yesus.

²²Bibit inta noḷabú kon yua-yuak in díat, tua in mangaḻenea, intau inta nokodongog kon Pirman tatua tongá mohawatir kon kapunyaan kon dunia naa bo moibog mobiag mooyúon. Ibog monia kon in dunia tua in monisí kon Pirman tatua, dá diá momungai.

²³Bibit inta noḷabú kon butá mopia, tua in mangaḻenea intau inta nokodongog kon Pirman bo nonotaau kon mangaḻenea. Manangka intua sia nomungai, oyúon inta mogatut noguntuḷ, oyúon in onom nopuḷú noguntuḷ, bo oyúon doman in toḷu nopuḷú noguntuḷ.”

²⁴Ki Yesus in bui nongonguman kon i monia, kon tobatú poumpamaan, kai-Nia, “Aka ki Allah momarenta, yo naonda bo intau inta nogambor kon bibit inta mopia kon gobánea.

²⁵Táe kon dodai in intau norosiugdon, namangoi in saturunea bo noporangkap in bibit in padang kon sigad in gandum mita tatua, nopaḷut mako sia minayá.

²⁶Naonda in gandum tatua moḷobendon bo nomangkoidon ḷumondut kinoontongandon doman in padang mita tatua.

²⁷Dá namangoidon in simpaḷ mita i togi gobá tatua bo noguman, ‘Tuang, kinotaauan nami in bibitbí inta nopira in inambor i tuang kon gobá? Dá degá nongkon ondabí in padang mita tatua?’

²⁸Ki togi gobá tatua notubag, ‘Oyúon intau mosaturu in namangoi bo noporarit intua.’ Dá bobantungnea mita tatua in noḻibó, ‘Tuang, motaau degá bayáan nami rabuton in padang mita tatua?’

²⁹‘Táe,’ sia noguman, ‘donaai sin dika bo moitakin doman in gandumnea kon wakutu in porabutan kon padang tatua.

³⁰Pomayá mako in kobiagannea modapot in wakutu porataban. Sin kon wakutu in porataban pogumankudon kon intau mita inta mororatab: Tokosipundon muna in padang mita tatua bo bogot kon pangkoinea mita, sin tubáan. Onda intua sipundon in gandum mita, tatua kon ontagku.’ ”

³¹Ki Yesus nongonguman bui kon poumpamaan ibanea kon i monia, “Aka ki Allah in momarenta, yo ná umpama batoḷ: In sesawi[12] inta ginamá in intau bo pinomuḷa kon gobánea.

³²Totuu kon batoḷ tatua in totok in mointok nongkon bayongan batoḷ. Táe aka sia in mobiagdon, sesawi tatua in moḷobe-ḷoben nongkon kuyat mita ibanea. Sia in sinimimpangkoi sahingga in ḷagapan mita in mamangoi bo monompugad kon tanganea mita.”

³³Onda intua ki Yesus nongonguman doman kon poumpamaan nanaa kon i monia. “Aka ki Allah mamangoi momarenta, yo ná umpama ragi inta ginamá in bobay, bo pinobauk kon topong torigu opat nopuḷú noliter nodapot in kinumutad komintan!”

³⁴Tua komintan sinundú i Yesus kon intau moantó tongá nomaké in poumpamaan. Bo Sia in notundú diábí in diá nomaké in poumpamaan.

³⁵Makusud-Nea, bá motompodon Pirman inta pinoguman in nabi nanaa, “Akuoi in moibog motundú táe momaké in poumpamaan; Akuoi in moibog mongonguman kon inta nongoibuni pinangkoipamai kon dunia naa binaḻí.”

³⁶Bo ki Yesus nonaḷámaidon kon intau mobayong tatua, bo nobui. Murí-Nea mita in namangoi bo noguman kon i-Nia nanaa: “Insilangaidon kon inami in mangaḻe in poumpamaan padang kon yua-yuak in gandum.”

³⁷Sia in notubag, “Intau inta nogambor kon bibit mopia tua in ki Adí Intau.

³⁸Gobá tua in dunia. Bibit tatua in intau mita inta ain nobaḻí umat i Allah. Yo padang tatua in intau mita inta diá mopia.

³⁹Yo saturu inta noporarit in bibit in padang tatua, siata in Ibilis. Bo aka wakutu moratab, yo tua in Singgai Pangabisannea, bo inta mororatab mita tua in malaekat.

⁴⁰Naonda bo padang tatua sinipun bo sinubá kon bonu in tuḷu natua doman kon Singgai Tumi.

⁴¹Adí Intau nopotabá kon malaekat-Nea mita mosipun kon bayongan inta mokopoḷaḻe, bo komintan intau inta nogaid kon moraat kon bonu in Dodatuan-Nea.

⁴²Bayongan tua in daiton pogonag kon bonu in tuḷu; kon tua kodongogan in amui bo roriga.

⁴³Kon wakutu intuata intau mita inta nogaid kon onu in kinoibog i Allah monindar ná mata in singgai kon bonu in Dunia Mobagu i Allah, ki Amá monia. Aka oyúon in bongoḷan yo indongogai!”

⁴⁴“Aka ki Allah momarenta, yo naonda: Bo kapunyaan inta noiḷobong kon gobá inta nouḻí in intau, bodongka iḷobongnea bui. Popisí in pia in ginanea, dá minayádon in sia bo nopotaḷui in bayongan kapunyaannea bo sinaḷuineadon in gobá tatua.”

⁴⁵“Ná doman tua, aka ki Allah momarenta yo naonda bo tobatú: Intau inta notayak kon mutiara inta mogaga.

⁴⁶Naonda in nouḻínea in mutiara inta totok in mogaga tatua, ḷagi in sia minayá bo nopotaḷui in bayongan kapunyaannea, bodongka notaḷui kon mutiara tatua.”

⁴⁷“Natua doman, aka ki Allah momarenta yo naonda bo landará inta binukayad kon danow, bo nokosipun kon norupa-rupamai in toyá.

⁴⁸Naonda in nopuḻing, landará tatua inugut pinobayá in pintad. Bo mosia iḻimitú bo nopoyotondí in toyá mita tatua: Inta nongopira in binonu kon tampayang táe inta diá nongopira in iḷumbú.

⁴⁹Natua doman mobaḻí kon Singgai Tumi, malaekat mita in mamangoi bo mopoyotondí kon intau mita inta moromú bo intau inta mopia.

⁵⁰Bo intau mita inta moraat tokoḷumbúon-Nea kon yuak in tuḷu; kon tua mongombaḷ in mosia bo mororiga.”

⁵¹“Komangaḻean monimu in singog-Ku tua?” Mosia notubag: “Oo, komangaḻean nami!”

⁵²Dá ki Yesus in noguman kon i monia, “Pomuḷoi in intau inta monotaau totok kon atorang i Musa bo notarima kon totundú kon naonda in ki Allah momarenta tua, yo sia in naonda bo ki togi baḷoi inta nopoḷuai in pakakatnea nobagu bo inta nokoyongan nongkon tampat inta pinotagúannea.”

⁵³Naonda in ki Yesus nopaḷut nongonguman kon poumpamaan mita tatua, minayádon Sia nongkon tua.

⁵⁴Noiyaputmai in ḻipú-Nea. Sia minayá notundú kon intau mita kon tua kon bonu in baḷoi pososambayangan monia, intau mita nongoherang in nokoontong kon inta pinomia-Nea. Sahingga mosia in noḻibó nanaa, “Degá nouḻí-Nea kon onda in hikmat ná tatua? Bo nouḻí-Nea kon onda in kawasa inta pinogaid-Nea kon mokoherang mita tatua?

⁵⁵Aka diá moyotaḷá yo Siabí naa inta ki Adí i bas? Bo ki iná-Nea in ki Maria degá; ki utat-Nea in ki Yakobus, ki Yusup, ki Simon, bo ki Yudas?

⁵⁶Bo ki utat-Nea mita bobay in koyota-yotakin naton? Dá degá kon onda in kinouḻían-Nea kon tua mita?”

⁵⁷Dá mosia nokecewa bo doídon mosia notarima kon i-Nia. Dá ki Yesus in noguman kon i monia, “Tobatú nabi in horomaton kon onda kabí koḻikudbí in koḻipú-Nea tontaní bo kon baḷoi-Nea.”

⁵⁸Bo popisí in diá in pirisaya monia, dá diá nobayong in soaḷ inta mokoherang in pinomia-Nea kon tua.