Read Mongondow MATIUS 14 Bible Online

MATIUS 14 - Mongondow bible

MATIUS 14

¹Kon wakutu intua nodapotdon in habar mita kon i Herodes, datu in Galilea soaḷ bayongan inta inaidan i Yesus.

²Dá sia in noguman kon pogawainea mita, “Notantúbí in naa kon ki Yohanes mobobaptis in nobiagdon! Tuamai in oyúondon in kawasa kon i-Nia mogaid kon inta mokoherang.”

³Sin ki Yohanes ain pinoki domok bo pinoki tokig i Herodes bo binonunea kon ponjara. Soaḷ tatua noyotogot in persoalan i Herodias, ki buḷoi i Pilipus ki utatnea.

⁴Nokoimontandon in ki Yohanes nonoboḷow kon i Herodes, kai nia: “Diábí mopia aka iko motonibuḷoi i Herodias!”

⁵Sabanarnea ki Herodes in moibog moḻimod kon i Yohanes, táe sia in moondok kon intau moantó inta nonganggap kon ki Yohanes tua in tobatúbí nabi.

⁶Tongá kon dodai in kinotompodan umur i Herodes, adí bobay i Herodias nomanari kon yua-yuak in mokokiangoi bo noposanang kon gina i Herodes,

⁷dá ki Herodes in nongibot kon mobogoi in onukabí in igumonnea.

⁸Popisí in pinakisa i inánea, dá adí bobay tatua in noguman, “Tududon uḷu i Yohanes mobobaptis kon baki bo ogoidon kon inakó kon naa!”

⁹Nokodongogmai kon inta inigum in adí tatua, norobonoḷ totok in gina i Herodes. Táe lantaran sia nongibotdon muna kon tayowon mokokiangoinea mita, dá pinotabáneadon sinbá duduian in onu in pinoigum in adí tatua.

¹⁰Binayáneadon pinoki pongko in uḷu i Yohanes inta kon ponjara.

¹¹Uḷu tatua sinudu monia kon baki bo dinia inogoi kon adí tatua bodongka inogoi in adí tatua kon i inánea.

¹²Onda intua murí mita i Yohanes Mobobaptis namangoi nogamá kon awaknea bo binayá iḷobong. Nopaḷut mako noḷobong mosia minayá nopotaau in soaḷ tatua kon i Yesus.

¹³Naonda in ki Yesus nokodongog kon habar tatua, Sia nonaḷámaidon kon tampat tatua bo iyumayú, sinumakoi in Sia kon uangga bo minayá in tampat inta noingongow. Táe naonda in kinodongogan in intau moantó nomatuk in mosia, táe nongin toba nongkon ḻipú mita monia.

¹⁴Naonda in mosia sinumubu ki Yesus nokoontong kon intau nobarong totok, dá noḻiai in gina-Nea popisí in tabi-Nea kon i monia. Bo inundaman-Nea in mosia inta notakit.

¹⁵Naonda in singgai noungkoḷomdon, murí-Nea mita namangoi kon i-Nia, bo noguman, “Tampat tanaa noitontaní bo singgai noungkoḷomdon, dá pokipobuiaidon in intau mita tanion sinbá mosia mayá motaḷui kon kaanon kon ḻipú mita.”

¹⁶Táe ki Yesus in noguman kon i monia, “Diáka bidon mosia mayá, moikodon in mopokaan kon i monia.”

¹⁷Tubag monia, “Kami tongá nodia kon roti ḻima bo toyá doyowa.”

¹⁸Ki Yesus in noguman, “Diadon mangoi kon naa.”

¹⁹Bo pinoki ḻitúan-Nea in intau moantó tatua kon tudu in bonok. Bo naonda in ginamá-Nea in roti ḻima bo toyá doyowa tatua, iḷumangag in Sia kon ḷangit bo nomarakat. Bodongka nomonsi-monsig kon roti tatua bo inogoi kon murí-Nea mita pinoki silai kon i monia. Murí-Nea mita in nosilai magí mako kon intau moantó tua.

²⁰Mosia komintan in nongaan dapot in nobotug. Onda intua sinipun mita in intau in ki agat in roti tatua; nosipun magí mopuḷúpa bodoyowá nokompé in nopuḻing.

²¹Intau nongaan noyotakin dodai intua degá ḻimamai noribu in ḷoḷaki, diápa pinoyoiap in bobay bo mongoadí mita.

²²Onda intua ki Yesus ḷagi nopotabá kon murí-Nea mita sinumakoi kon uangga bo umuna kon i-Nia mayá in ḷoḷan, wakutu intua pinoki pobuian-Nea domandon in intau moantó tatua.

²³Bo naonda intau mita tatua nobui, ki Yesus notakod kon buḷud bo nosambayang tontaní. Bo naonda in singgai nodoḷomdon dongkadon Sia tontaní in kon tua.

²⁴Uangga inta sinakoian in murí-Nea mita ain noyayú kon pintad bo totokdon in dumpakon in bokoḷ, sin tompot moyodumpak.

²⁵Degá jam intoḷuneadon modiug mobayag namangoidon in ki Yesus kon i monia takin minaya-mayá kon tudu in tubig.

²⁶Naonda in murí-Nea mita nokoontong kon i-Nia minaya-mayá kon tudu in tubig, mosia noitaḻikokog bo poḷat nomaḷú, “Dimbuḷó intua!” mosia kopia kumarak sin moondok.

²⁷Táe ki Yesus ḷagi noguman kon i monia, “Pokopoonow! Sin Akuoibí in naa. Dika moondok!”

²⁸Bo ki Petrus in noguman, “Aka Iko bo totuu kon ki Yesus, yo oiníka in akuoi mamangoi kon ini-Mu mongin tudu in tubig.”

²⁹Ki Yesus notubag, “Angoidon!” Dá ki Petrus noponag kon uangga, bo minayá kon i Yesus nongin tudu in tubig.

³⁰Táe naonda in nokorasamai kon tompot nogirup, noondok in sia dá tumaḷom-tumaḷomdon in sia bo kinumarakdon in sia, “Tuhan, tuḷungaipa in akuoi!”

³¹Dá siningkap i Yesus in ḻima-Nea, bo poḷat noguman kon i Petrus nanaa, “Ei intau inta diá totok mopirisaya. Nongonu sin moḻia-ḻiawbí in ginamu?”

³²Onda intua sinumakoidon in taya dua kon uangga bo tompot nogogaidon.

³³Intau mita inta kon bonu in uangga nosumba kon i-Nia. Kai monia, “Totu-totuu kon Iko naa in ki Adíbí i Allah.”

³⁴Naonda in noiyaputmaidon kon ḷoḷan mosia sinumubu kon ḻipú in Genesaret.

³⁵Bo naonda intau mita kon tua nokotaaumai kon inta namangoi tua in ki Yesus dá pinotaa-taau mako monia kon ḻipú mita inta noyodiugmai kon tua. Bo komintan intau inta nongotakit dinia kon i-Nia.

³⁶Mosia nopoigum sinbá ogoi-Nea in mosia moḻiai kon ubung in jubah-Nea. Komintan intau inta noroḻiai kon i-Nia, nongopia.