Read Mongondow MATIUS 15 Bible Online

MATIUS 15 - Mongondow bible

MATIUS 15

¹Noiduduimai kon tua, tongonumai degá intau in Parisi bo mototundú mita kon agama, mosia in nongkon Yerusalem namangoi bo noḻibó kon i Yesus,

²“Nongonu sin murí-Mu mita in diábí dinumudui kon adat in mogoguyang naton? Mosia in diábí nonomok muna kon dodai in nongaan!”

³Táe ki Yesus notubag kon i monia, “Nongonu sin moiko in diábí doman dumudui kon parenta i Allah, tongá popisí in adat in mogoguyang?

⁴Ki Allah aindon noguman, ‘Horomatdon in ki amá bo ki inámu,’ bo ‘Ki ine in mogodi-godimai kon i amánea bo kon i inánea yo musti hukumon matoi.’

⁵Táe moiko in moguman nanaa, ki ine inta moguman kon i amánea andeka kon i inánea: ‘Onu inta musti ogoiku pobantung kon i amá bo kon i iná, aindon inogoiku pinosumba kon i Allah,’

⁶yo intau tatua in diá bidon patus mohoromat kon guyanganea.[13] Aka oaid monimu bo natua, yo inanggap monimu in Pirman i Allah in diádon baraguna sin popisí in adatmu tontaní in mobara-baraguna.

⁷Ei intau inta mongomunapik! Totuudon onu inta pinoguman muna i Nabi Yesaya soaḷ moiko,

⁸‘Nanaa in kai Allah: Intau mita tanaa moduí kon i-Nakó táe tongá kon bibig monia, sin gina monia in moyayú kon i-Nakó.

⁹Diábí in mangaḻenea posumbaan monia kon i-Nakó, sin onu in sinundú monia tua atorangbí in intau.’ ”

¹⁰Bo ki Yesus nogoiní kon intau moantó tatua bo noguman kon i monia, “Indongogai bo tagú kon bonu in gina!

¹¹Deemanbí inta kinaan in haram; táe inta siningogbí, tuatabí inta mokonajis kon intau.”

¹²Bo murí-Nea mita in nomangkoidon noḻibó kon i-Nia, kai monia, “Kinotaauan degá i Pak Guru kon singog i Pak Guru tanion totokbí in mokonanaḻi kon gina intau mita in Parisi?”

¹³Tubag i Yesus, “Pomuḷoi in pinomuḷa inta deeman ki Amá-Ku in nomuḷa, yo musti rabuton takin uakatnea mita.

¹⁴Pomayádon mako intau mita natua. Sin mosia tua in intau bilog inta motundú kon daḷan kon intau doman bilog. Sin aka intau bilog bo mokapit kon intau doman bilog, yo tumpaḷabí in taya dua moḷabú kon bubú.”

¹⁵Dá ki Petrus in noguman kon i-Nia, “Pak guru, tomangaḻeaika kon inami in poumpamaan tanion!”

¹⁶Táe ki Yesus in notubag, “Umpaka yo diápa doman komangaḻean monimu?

¹⁷Diá kotaauan degá monimu kon onu inta kinaan monimu komintanbí moidapot in sian bodongka pointaḷú bui?

¹⁸Táe onu in siningog monimu tua in komintanbí nongkon bonu in gina; bo tuatabí inta mokonajis kon intau.

¹⁹Sin nongkon bonu in gina momuká in bayongan raian inta moraat, poḷoḻimod, pononuaḻing, pogogaid kon inta moromú pononakow, ibot inta diá totuu bo rebeg.

²⁰Tua komintan inta mokokotor kon intau. Táe aka mongaan takin diá monomok muna tua in diábí mokokotor kon intau.”

²¹Nobuatmai nongkon tua in ki Yesus, Sia minayá kon ḻipú in Tirus bo Sidon.

²²Kon tua noiangoi in tobatú bobay intau in Kanaan inta nongkon ḻipú kon tua, bo nomaḷú, “Kotabipa in akuoi naa Tuhan Adí i Daud! Sin ki adíku bobay kinotoḷangan in dimukud moraat. Bo moyoyiga totok in sia.”

²³Tongá diá sinubagan i Yesus in sia, bo murí-Nea mita in namangoi bo noguman kon i-Nia, “Pokibayáaidon mako in sia, sin sia in umuran doman mako dumudui kon i naton bo momaḷú!”

²⁴Táe ki Yesus in notubag, “Akuoi pinotabá mamangoi sin motayak kon intau mita in Israel inta nongobuḻi.”

²⁵Bobay tatua in dinimiug bo nosumba kon i-Nia bo noguman bui, “Tuhan tuḷungaipa in akuoi.”

²⁶Ki Yesus in notubag, “Diá motaau in mogamá kon kaanon inta aindon sinadia kon adí mita bo ogoi kon ungku.”

²⁷Bobay tatua in notubag, “Totuubí intua Tuhan, táe ungkú tatua in nokaan doman kon muyo-muyok in kaanon inta noḷabú kon meja i tuangnea.”

²⁸Bo ki Yesus in notubag takin noguman kon i-Nia, “Uḻe iná, moḷoben totok in pirisayamu! Manangka intua yo mobaḻídon kon inimu ná inta kinoibogmu!” Bo dodaipa doman in tuata nopia in ki adínea.

²⁹Ki Yesus nonaḷámai kon tampat tatua, bo minayá nongin bingkí in pintad in Danow Galilea. Bodongka notakod kon buḷud bo iḻimitú kon tua.

³⁰Bo intau mita nodia mangoi kon i-Nia kon intau mita inta pelong, inta ḻempeng, inta bilog, inta bobó, bo takit mita ibanea. Inangoi monia inukat kon tayowonmai i Yesus bo komintan inundaman-Nea in mosia sahingga in nodait nopia.

³¹Intau mita nongoherang in nokoontong kon onu inta inaidan-Nea tatua, sin intau bobó nokosingog, intau pelong nopia, intau ḻempeng mokobayádon, intau bilog mokoindoi. Dá mosia nodayow kon i Allah Israel.

³²Ki Yesus nogoiní kon murí-Nea mita bo noguman, “Akuoi motabi totok in mokoontong kon intau mita tanion. Mosia aindon toḷu nosinggai in dinumudui kon i-Nakó bo mosia in diá nodia kon kaanon. Akuoi in doíbí mopobui kon i monia kon dodai in mosia gogoyon, sin dikabo moumpag kon daḷan.”

³³Murí-Nea mita in noguman kon i-Nia: “Kon ondabí in kouḻían naton kon kaanon inta tugat kaanon in intau mita tanion, apapa doman kita naa noyayú kon ḻipú?”

³⁴Ki Yesus in noḻibó kon i monia, “Tongonu in roti nion kon i monimu?” “Pitu”. tubag monia, “bo oyúon doman tongonumai in toyá inta mongointok.”

³⁵Bo pinoki ḻitúan mita i Yesus kon butá in mosia.

³⁶Onda intua ginamá-Nea in roti bo toyá mita tatua, bo nopoyaput in sukur. Bodongka nomonsi-monsig kon roti tatua bo inogoi kon murí-Nea pinoki silai, dá sinilai domandon in murí-Nea mita kon intau mobayong tatua.

³⁷Mosia nongaan komintan dapot in nobotug. Nopaḷut mako sinipun in murí-Nea mita in ki agat in roti tatua. Nosipun magí pitupa nokompé in nopuḻing.

³⁸Kobayong in intau inta nongaan noyotakin dodai intua opat noribu in ḷoḷaki, diápa pinoyoiap in bobay bo mongoadí mita.

³⁹Nopaḷut mako nongaan ki Yesus nopotabádon kon i monia nobui. Bo Sia in minayá sinumakoi kon uangga bo iḷumeag nopobayá in ḻipú in Magadan.