Read Mongondow MATIUS 21 Bible Online

MATIUS 21 - Mongondow bible

MATIUS 21

¹Naonda in ki Yesus bo murí-Nea mita nodiugdon kon Yerusalem bo noidapotdon in tampat inta sinangoi Betpage kon buḷud in Zaitun. Ki Yesus in nopotabá kon murí-Nea doyowa.

²Takin koyow nanaa, “Bayádon in ḻipú inta kon tayowonmai tanion, kon tua moiko mokodungkuḷ kon keledai kobaayan tobatú inta kotogo-togot bo ki adínea in tua kon diugneamai. Bukádon keledai tatua bo diadon mangoi kon i-Nakó in keledai doyowa tatua.

³Bo aka oyúon in intau in moḻibó kon i monimu, yo poguman nanaa, ‘Ki Tuhan[17] moparaḷu.’ Ḷagi-Neabí pobuion mangoi.”

⁴Soaḷ tatua in mobaḻí sinbá motompodon in Pirman inta pinoyaput i nabi nanaa,

⁵“Pogumandon kon bobay in Sion, Indoiai, Datumu namangoi kon inimu. Moompá in dodia-Nea bo sinumakoi kon keledai tobatú, tobatú keledai inta moguodpa.”

⁶Bo minayádon in murí-Nea taya dua tatua bo nogaid kon ná inta aindon pinoki aid i Yesus kon i monia.

⁷Dinia monia in keledai kobaayan tatua takin ki adínea. Bodongka inaipan monia in pakeang monia, onda intua ki Yesus sinumakoi kon keledai tatua.

⁸Intau inta nobarong totok kon tua nopoompat in pakeang mita monia kon yuak in daḷan, oyúon doman in nomongkó kon tanga mongointok bo pinonangket kon daḷan inta bayáan-Nea.

⁹Bo intau moantó inta minaya-mayá kon muna-Neamai bo inta dumuduianmai kon tumi-Nea sindaḷan nomaḷú, “Saḷamat kon i Adí i Daud! Binarakatandon in Sia inta namangoi kon bonu in tangoi Tuhan! Dayowdon in ki Allah Inta Totok Moḷantud!”

¹⁰Bo naonda in Sia sinumuot kon Yerusalem, nodowawádon totok in bayongan intau kon kotá tatua bo intau mita noḻibó. “Ki ine degá in intau tanaa?”

¹¹Intau moantó tatua notubag, “Naadon in ki Nabi Yesus nongkon Nazaret kon Galilea.”

¹²Kon tua ki Yesus sinumuot kon Baḷoi Tuhan bo noguntun kon intau mita inta nopotaḷui kon tua. Binaḻikuat-Nea mita in meja inta pononoḻiuan kon doit bo bangko mita in intau inta mopopotaḷui in ḷagapan paḷoma.

¹³Bo Sia in noguman kon i monia nanaa, “Aindon pinais kon Buk Motusi, ‘Baḷoi-Ku in tangoionbí Baḷoi Pososambayangan.’ Táe inaidanbí monimu pugad in mogogagow!”

¹⁴Bo kon tua namangoi domandon in intau mita bilog bo intau mita pelong kon i-Nia kon Baḷoi Tuhan bo inundaman-Nea in mosia.

¹⁵Táe naonda imang mita itoi bo mototundú mita kon agama nokoontong kon soaḷ mita mokoherang inta inaidan i Yesus tatua bo mokodongog kon mongoadí mita nomaḷú kon bonu in Baḷoi Tuhan, “Saḷamat kon i Adí i Daud!” Dá mosakí totok in gina monia.

¹⁶Bo mosia in noguman kon i-Nia, “Degá dinongog-Mu onu in siningog in mongoadí mita tanaa?” Ki Yesus in notubag kon i monia, “Dinongog-Ku intua! Degá diápa kinobacaan monimu inta pinais kon Buk Motusi nanaa: ‘Nongkon bibig in adí mita mointok bo mongoadí mita inta monetépa aindon sinundú-Mu in mosia mopoyaput in dodayow mita’?”

¹⁷Bo sinaḷaan-Neamai in mosia poḷat iḷumuai nongkon kotá tatua bo minayá in Betania nosiug kon tua.

¹⁸Kon wakutu in doḷo-doḷom kon binayáan-Nea nobui minayá in kotá, ki Yesus nokorasa kon gogoyon.

¹⁹Kon diugmai in daḷan oyúon pangkoi in ara inontong-Nea, dá Sia minayá notayak kon bungainea, táe diá nokouḻí kon tobatúmai koḻikudbí in daunnea mita kon tua. Dá siningog-Nea in pangkoi ara tatua, “Iko in diá bidon mopomunga-mungai!” Bo kon dodaipa doman tatua, pangkoi in ara tatua noingkag.

²⁰Nokoontongmai kon inta nobaḻí tatua, murí-Nea mita noherang totok bo noguman, “Naondabí sin pangkoi in ara tatua baya-bayábí noingkag komintan?”

²¹Ki Yesus notubag kon i monia, “Poguman-Ku kon i monimu, aka moiko bo totu-totuu mopirisaya bo diá mohawatir, yo moiko in deemanbí tongá motaau mogaid kon ná inta pinomia-Ku kon pangkoi in ara tatua, táe moiko motaaubí doman moguman kon buḷud tanaa, ‘Pobuatdon nongkon tampatmu tanion bo koḷabúdon kon bonu in dagat’; yo mobaḻíbí doman intua.

²²Bo onu kabí in poigumon monimu kon bonu in sambayang takin mopirisaya totok, yo moiko in motarimabí kon onu inta inigummu.”

²³Bo ki Yesus in sinumuot kon Baḷoi Tuhan, bo naonda in Sia notundú kon tua, namangoidon in imang mita itoi takin guhanga mita in ḻipú intau in Yahudi, bo noḻibó kon i-Nia, “Degá nongkon onda in kawasa inta pinogaid-Mu kon soaḷ mita tatua? Ki ine in nobogoi in kawasa tatua kon ini-Mu?”

²⁴Ki Yesus noguman kon i monia nanaa, “Akuoi in moḻibó doman kon i monimu bo aka kotubagan monimu onu in ḻibóon-Ku, yo poguman-Ku doman kon i monimu mongo kawasa i ine in pinogaid-Ku kon tua komintan.

²⁵Naa in ḻibóon-Ku, nongkon onda in kawasa inta pinaké i Yohanes nobaptis? Nongkon soroga andeka nongkon intau?” Mosia noyosingog mongo onu in pototubag monia, “Aka kai naton: ‘Nongkon soroga,’ yo Sia in moguman kon i naton, ‘Aka natua, yo nongonu sin moiko in diábí mopirisaya kon i-Nia?’

²⁶Tongá aka tubagan naton, ‘Nongkon intau,’ yo intau moantó tanion tumorú kon i naton sin inanggap monia in ki Yohanes tua in tobatúbí nabi.”

²⁷Dá mosia in notubag kon i Yesus, nanaa: “Diá kotaauan nami.” Dá ki Yesus in noguman doman kon i monia, “Aka natua, diá doman poguman-Ku kon i monimu mongo nongkon onda in kawasa inta pinaké-Ku nogaid kon tua komintan.”

²⁸“Aka podudui in raianmu yo naonda in ouman tanaa: Oyúon intau kogadí kon doyowa tumpaḷa ḷoḷaki; Sia minayá bo noguman kon adí guya-guyang, ‘Uḻe bayápa kon gobá in anggur bo pogaid singgai naa.’

²⁹Adí tatua in notubag, ‘Doíbí akuoi papa.’ Táe onda intua nobaḷui in raiannea bo minayádon in sia nogaid.

³⁰Dá guyanga tatua in minayá kon i adínea inta induanea bo noguman kon natua doman. Ki adínea tatua in notubag. ‘O, o papa,’ Táe diábí in sia minayá.

³¹Yo ki ine in kon sigad nayadua tua in nogaid kon inta kinoibog i amánea?” Tubag monia, “Inta guya-guyang.” “Poguman-Ku kon i monimu: Intau inta mononagi kon pajak bo bobay mita inta sundaḷ in moiuna kon i monimu tumuot mobaḻí anggota in umat i Allah.[18] “Inta induanea,” tubag in imang mita tongguḷunea bo itoi mita in Yahudi tatua.

³²Sin ki Yohanes ain namangoi mopoyotutui in daḷan inta totuu kon i monimu, táe diá pinirisaya monimu in sia. Táe mononagi mita kon pajak bo bobay mita inta sundaḷ nopirisaya kon inia. Sin umpakabí moiko ain nokoontong kon inia, táe moiko in diá angoian in panasaḷan bo moiko in diábí doman mopirisaya kon inia.”

³³“Indongogaidon in poumpamaan ibanea tanaa,” guman i Yesus. “Oyúon in tobatú ki togi butá, sia in nomuḷa kon anggur bo iḻibunea sinondok in gobá tatua. Sia nongaḻi doman kon bubú tampat pomomugutan kon bungai in anggur, bo noposindong doman in ḷangkeang poḷoḷukadan kon pinomuḷa tatua. Onda intua gobá tatua pinotomoyónea kon mototomoyó bo sia minayá in ḻipú ibanea.

³⁴Naonda i wakutuneadon mosipú kon bungainea, pinotabánea in bobantungnea mita minayá kon mototomoyónea mita sin mogamá kon silainea.

³⁵Táe mototomoyó mita kon gobá tatua nodomok kon bobantung mita inta pinotabá i togi gobá. Tobatú in binongkug monia, bo tobatú doman iḻimod monia, yo ibanea mako in sinoko-arab in batu.

³⁶Dá ki togi gobá nopotabá bui kon bobantungnea ibanea, moanto-antó nongkon inta muna, táe mosia pinomia doman monia ná yobayat mita monia muna.

³⁷Pangabisannea, sia in nopotabá kon i adínea tontaní minayá kon mototomoyó mita tatua, sin pinikirnea: ‘Mosia in moinsimbí kon i adíku.’

³⁸Táe naonda inontong in mototomoyó mita tatua in ki adínea tatua, mosia noguman, ‘Sia naa inta mowaris kon gobá tanaa, maní bo ḻimodon naton sia, sinbá gobá tanaa moiḷabúdon kon i naton!’

³⁹Dinomok monia in sia bo pinogarab kon ḷuai in gobá bodongka iḻimod monia.”

⁴⁰Dá noḻibó in ki Yesus, “Yo, aka kitogi gobá tatua in mamangoi, yo onuonnea in mototomoyó mita tatua?”

⁴¹Mosia in notubag kon i-Nia, “Toko putúannea in intau mita moraat tatua, bain tua bo gobá in anggurnea tatua potomoyóneadon bui kon mototomoyó ibanea, inta moibog mopoyosilai in bungainea aka wakutuneadon.”

⁴²Ki Yesus in noḻibó kon i monia, “Diápa kon dodai in onda degá in moiko nokobaca kon bonu in Buk Motusi inta pinais nanaa? ‘Batu inta iḷumbú in mogogaid mita kon bangunan ain nobaḻí batu inta baraguna totok. Oaidan mita inta mokoherang kon mata naton tatua; aindon inaidan i Tuhan!’ ”

⁴³“Dá toropdon,” guman i Yesus, “bayongan hak, saḷaku umat i Allah gamáan nongkon inimu bo ogoi kon bangusa inta moibog dumudui kon parenta mita i Allah. [

⁴⁴Bo ki ine in moḷabú kon tudu in batu tatua, yo morimumud in sia bo ki ine in koḷabúannea yo moputo-putoḷ in sia.]”

⁴⁵Naonda in imang mita itoi bo intau mita in Parisi nokodongog kon poumpamaan mita i Yesus kinomangaḻeandon monia, kon mosiabí tua in pinopomakusudan-Nea.

⁴⁶Dá ḷongasiondon monia domokon in Sia, táe mosia moondok kon intau moantó kon tua, sin inanggap in intau moantó tatua kon Sia tua in nabi.