Read Mongondow MATIUS 22 Bible Online

MATIUS 22 - Mongondow bible

MATIUS 22

¹Ki Yesus in nongonguman bui kon poumpamaan kon i monia, kai-Nia,

²“Aka ki Allah in momarenta, yo naonda bo poumpamaan tanaa: Tobatú datu inta nogaid kon rame sin ponikaan i adínea.

³Sia in nopotabá kon bobantungnea mita mogoiní kon intau mita inta aindon sinoko oiní kon rame ponikaan tatua, táe intau mita tatua in doí mamangoi.

⁴Sia in nopotabá bui kon bobantungnea mita ibanea, takin koyow, ‘Pogumandon kon intau mita inta ain sinoko oiní tatua: Kon bayongan kaanon aindon sinadiaku. Sapi mita koḷakian, bo biag inta sinokopiaraku aindon iratá. Bo komintan tua aindon sinadia kon meja. Angoidon in rame ponikaan i adíku singgai in naa!’

⁵Táe diá in pandung in intau mita inta sinoko oiní tatua. Oyúon inta minayá in gobá, oyúon doman minayá nogaid kon oaidannea;

⁶bo oyúon doman in nodomok kon bobantungnea mita bo pinogutú poḷat iḻimod.

⁷Bo datu tatua totok in sinumorú. Pinotabánea in tontaranea minayá nomutú kon moḷoḻimod, bo nonurub kon kotá monia tua.

⁸Nopaḷut mako, sia in noguman kon bobantungnea mita, ‘Rame ponikaan i adíku naa aindon sinadia komintan, tongá intau mita inta inoiní koina in diádon motaau mamangoi kon rame tanaa.

⁹Manangka intua bayádon kon pinoyotangaan daḷan bo oinídon in intau mita inta moyodungkuḷ monimu kon tua, bo dia mamangoi kon rame ponikaan tanaa.’

¹⁰Dá bobantung mita tatua in minayá bo nosipun kon bayongan in intau inta noyodungkuḷ monia kon daḷan. Intau mita moraat bo intau mita mopia, sahingga nopuḻingdon intau in ruangan pinonikaan tatua.

¹¹Naonda in datu tatua sinumuot sin mokipodungkuḷ kon mokokiangoi mita tatua. Sia nokoontong kon intau tobatú inta diá nogiḷambung in ḷambung pororame.

¹²Dá sia in noḻibó kon intau tatua, ‘Ei utat, nongonu sin iko in sinumuot mangoi táe diábí nomaké in ḷambung inta pororame?’ Intau tatua in tongá kibio-biómai.

¹³Dá datu tatua in noguman kon bobantungnea mita, ‘Tokig in sioḷ bo ḻimanea bo pogarab in intau tanion kon tampat inta nosindip totok, kon tua kodongogan in amui bo rokokot in ingipon.’ ”

¹⁴Bo pangabisannea ki Yesus in noguman, “Nobarong in inoiní, táe noyakag in piniḻí.”

¹⁵Intau mita in Parisi minayádon nongkon tua, bo noyosingog kon naonda sinbá kouḻían monia kon taḷá in ki Yesus podoyon kon onu inta ḻibóon monia.

¹⁶Mosia nopotabá kon dumodudui mita monia noyotakin in intau mita i Herodes sin moḻibó kon i Yesus nanaa, “Pak Guru, kinotaauan nami ki Pak Guru intau inta motuḻid in gina bo takin gina motuḻid doman ki Pak Guru moguman kon daḷan i Allah, bo diá doman ki Pak Guru moondok kon i ine kabí sin diábí poyoposion i Guru in intau.

¹⁷Dá pogumanka kon inami: Mongo motaau degá in moguboḻi kon pajak kon i Kaisar andeka diá motaau? Aka podudui in raian-Mu yo naonda?”

¹⁸Ki Yesus nonotaau kon raian monia inta diá mopia tatua, dá Sia in noḻibó, “Nongonu sin moiko in monungkuḷbí kon i-Nakó? Ei moiko intau mita inta diá motuḻid in gina?

¹⁹Yo poontongka kon i-Nakó in doit inta poguboḻi monimu kon pajak tua!” Mosia nopoontong in doit dinar kon i-Nia.

²⁰Bo iḻibó-Nea kon i monia, “Gambar bo pais i ine in tanaa?”

²¹Mosia notubag, “Gambar bo pais i Kaisar.” Dá ki Yesus in noguman kon i monia, “Ogoidon kon i Kaisar onu inta musti ogoi monimu kon i Kaisar, bo ogoi kon i Allah inta musti ogoi monimu kon i Allah.”

²²Nokodongog kon tubag-Nea natua noherang totok in mosia bo sinaḷáandon monia in ki Yesus.

²³Kon singgai tatua doman, tongonumai intau in Saduki namangoi kon i Yesus. Mosia naa inta noguman kon intau matoi in diá bidon mobiag bui. Mosia in noḻibó kon i Yesus nanaa.

²⁴“Pak Guru, ki Musa in noguman, kon aka tobatú intau bo minatoi bo sia in diápa kogadí, dá ki utatnea in musti mobuḷoi kon i baḷunea tatua sinbá oyúon in buí i utatnea tatua.

²⁵Nokoimontandon in nobaḻí nanaa: Oyúon pitu mogutat, komintan ḷoḷaki. Inta guya-guyang nobuḷoi, táe diá noonggot bo minatoi. Bo popisí in diápa in buínea dá kibaḷunea tatua pinoki pobuḷoinea kon i utatnea.

²⁶Ki utatnea tatua minatoi doman takin diápa kogadí. Tua in nobaḻí doman kon i utatnea mita nodapot kon i utatnea impitunea.

²⁷Bo pangabisannea, bobay tatua minatoi domandon.

²⁸Yo ki ine in kon sigad nayapitu tatua in mobaḻí ki buḷoi in bobay tatua kon wakutu in singgai kobiagan? Sin mosia komintan bidon notonibuḷoi takinnea.”

²⁹Ki Yesus in noguman kon i monia nanaa: “Moiko nion noitaḷá in pororai monimu, sin diá kinomangaḻean monimu in bonu in Buk Motusi, bo kawasa i Allah.

³⁰Kon wakutu in kobiagan bui intau, diábí in mobuḷoi bo diábí in pobuḷoion sin mosia in mobiag naonda bo malaekat kon soroga.

³¹Diápa degá kinobacaan monimu onu inta pinoguman i Allah soaḷ intau minatoi inta biniag bui? Ki Allah in noguman nanaa,

³²‘Akuoi in ki Allah i Abraham, ki Allah i Ishak bo ki Allah i Yakub.’ Sia deemanbí ki Allah in intau minatoi, táe ki Allah in intau nobiag!”

³³Intau moantó inta nokodongog kon tua in noibog totok kon onu inta sinundú-Nea.

³⁴Naonda intau mita in Parisi nokodongog, kon intau mita in Saduki inaidan i Yesus diá nokobuká kon bibig monia, mosia noyosipun.

³⁵Bo tobatú kon sigad monia, inta totok in nonotaau kon hukum i Musa, noḻibó sin monungkuḷ kon i-Nia,

³⁶“Pak Guru, hukum táonda degá inta totok in moponting kon bonu in hukum i Musa?”

³⁷Tubag i Yesus kon inia, “Kotabidon in ki Tuhan, ki Allahmu bo tongádon Sia in musti sumbaan monimu totu-totuu.

³⁸Tuata in hukum inta totok in moponting!

³⁹Bo hukum induanea, inta notongkai intua: Kotabidon in tumpaḷa intau naonda bo kotabimu kon awakmu tontaní.

⁴⁰Hukum doyowa tanaa inta nobaḻí dodoyonan in bayongan hukum i Musa bo buk in nabi mita.”

⁴¹Wakutu intau mita in Parisi noyosipunpa mako ki Yesus in noḻibó kon i monia,

⁴²“Aka podudui in raian monimu yo buí i ine in ki Mesias? Ki Adí i ine in Sia?” Tubag monia kon i-Nia, “Buí i Daud.”

⁴³Dá Sia in noguman, “Aka natua, yo nongonu sin ki Daud inta kinawasaan in Roho i Allah monangoi kon i-Nia, ‘Ki Tuangnea,’ kon wakutu in sia nosingog,

⁴⁴‘Ki Tuhan aindon nobogoi in Pirman-Nea kon i Tuangku: ḻitúdon kon dotá in koḷanan-Ku,[19] modapot in bayongan saturumu daiton-Ku potungkud kon tayowon-Mu.’

⁴⁵Dá aka ki Daud bo monangoi kon i-Nia, ‘Ki Tuang’, yo diábí kumaan kon akaḷ aka Sia bo buí i Daud?”

⁴⁶Diá tobatúmai in nokotubag kon singog-Nea tatua. Bo mulai singgai tua, diádon in tobatúmai in mokobaḻí mopoḻibó-ḻibómai kon i-Nia.