Read Mongondow MATIUS 23 Bible Online

MATIUS 23 - Mongondow bible

MATIUS 23

¹Ki Yesus in noguman kon intau mobayong bo kon murí-Nea mita,

²“Mototundú mita kon agama Yahudi bo intau mita in Parisi aindon inogoian in kawasa monotaau kon hukum i Musa.

³Manangka intua yo aidaibí in bayongan inta sinundú monia kon inimu. Táe donaai dumudui kon oaid monia, sin mosia in motundú tongá diá aidan monia onu inta sinundú monia.

⁴Mosia in nobogot kon diaan kinosibuḷ totok, bo mopopotaan kon obaga intau ibanea, táe mosia tontaní in doíbí moḻiai.

⁵Onu inta inaidan monia in tangábí popoontong kon intau. Mosia in momaké in tali moḷoben inta pakéonmai mosambayang bo inta rumbainea mongoḷanggó mita![20]

⁶Mosia in moibog totok ḻimitú kon muna totok aka mayá in rame andeka kon baḷoi pososambayangan.

⁷Mosia in moibog doman totok horomaton kon pasar, bo moibog doman totok oiníon ki ‘Pak Guru’.

⁸Tongá moiko in dika mokioiní ki ‘Pak Guru’, sin tongábí tobatú in Gurumu bo moiko komintan in ginaḷum.

⁹Bo dikadon in moiko monangoi ki ‘Amá’, kon i inekadon in kon dunia naa sin tongábí tobatú in ki Amámu, Sia tuata inta kon soroga.

¹⁰Bo donaaidon doman in moiko moibog tangoian ‘Itoi’, sin tongábí tobatú in itoimu, tuata in ki Mesias.

¹¹Ki ine inta moḷobe-ḷoben kon sigad monimu, sia mustibí moibog mobaḻí bobantungmu.

¹²Bo ki ine in mosiḷantud, yo sia in poompáan bo ki ine moompá in dodia yo sia tua in poḷantudon.”

¹³“Koboditodon in moiko, ei mototundú kon agama Yahudi! Ei moiko intau inta mongomunapik. Sin moiko in moḷamboi kon intau inta mamangoi kon i Allah. Moiko tontaní in doíbí mobaḻí umat i Allah, bo intau ibanea inta moibog in ḷamboianbí monimu. [

¹⁴Koboditodon in moiko, mototundú mita kon agama bo intau mita in Parisi: Moiko in intau mita inta mongomunapik. Moiko monguboḷ kon intau mita inta dongkadon boba-bobay bo mogagow kon baḷoi monia. Moiko in mosambayang koḷanggo-ḷanggóon sin ponaḷob kon oaid monimu inta moraat tatua. Tuamain hukuman i Allah kon i monimu in pastibí kon moboga-bogat nongkon intau ibanea!]

¹⁵Koboditodon in moiko mototundú mita kon agama bo intau mita in Parisi! Moiko in intau mita inta mongomunapik! Sin moiko in ḷumoḷan magí mako kon dagat, bo maya-mayá mako kon dunia naa sin motayak kon intau tobatú bo baḻíon dumodudui kon agamamu. Bo naonda in sia mogogai mogaid kon inta moraat, aidan monimu in sia intau in naraka, inta kodua ná moraat monimu tontaní!

¹⁶Koboditodon in moiko itoi mita inta bilog! Bo inta noguman, ‘Aka intau bo mongibot podoyon kon Baḷoi Tuhan, intau tatua in diábí noitogot kon ibotnea; táe aka sia bo mongibot podoyon kon buḷawan inta kon bonu in Baḷoi Tuhan, yo tua in noitogot in sia kon ibotnea.’

¹⁷Ei moiko intau mita pompuḷong bo intau mita bilog! Onu degá in moponti-ponting: buḷawan, andeka Baḷoi Tuhan inta nokokudus kon buḷawan tatua?

¹⁸Moiko in motundú, ‘Aka mongibot podoyon kon meja pototuduan kon sosumba, yo intau tatua in diábí noitogot kon ibotnea tatua; táe aka sia bo mongibot podoyon kon sosumba inta kon tudu in pototuduan kon sosumba tatua, yo sia in noitogot kon ibotnea tatua.’

¹⁹Ei moiko intau mita bilog! Onu degá in moponti-ponting barang pinosumba andeka meja inta nokokudus kon inta pinosumba tatua?

²⁰Manangka intua ki ine in nongibot pinodoyon kon meja tatua, yo sia in nongibot pinodoyon kon meja tatua, bo pinodoyon doman kon bayongan inta sinudu kon meja tatua.

²¹Bo ki ine inta nongibot pinodoyon kon Baḷoi Tuhan, yo sia in nongibot pinodoyon kon Baḷoi Tuhan bo pinodoyon doman kon i-Nia inta nogutun kon tua.

²²Bo ki ine in nongibot pinodoyon kon soroga, yo sia tua in nongibot doman pinodoyon kon tampat ḷoḻitúan i Allah bo pinodoyon doman kon i-Nia, inta nogutun kon soroga tatua.

²³Koboditodon ei moiko mototundú kon agama bo intau mita in Parisi! Ei moiko in intau mita inta mongomunapik. Pododungú in pogamaan monimu kon mopuḷú noporosen, tongá inta moponting totok kon bonu in hukum i Musa ḻiongon monimu.

²⁴Ei moiko itoi mita inta bilog! Yongit in tapison monimu kon oinumon monimu, táe unta inta kon bonunea in ḻiomon monimu!

²⁵Koboditodon in moiko ei mototundú mita kon agama bo intau mita in Parisi! Ei moiko intau mita inta mongomunapik! Sin pongonginuman bo pongongaanan yuyúan monimu in ḷuainea, táe kon bonunea in binonuan monimu in barang inta sinoko agow sin popisí in sigogow monimu.

²⁶Ei intau mita in Parisi inta bilog! Yuyúaipa muna in bonu in pongonginuman tatua, dá kon dotá in ḷuainea modaritbí doman!

²⁷Koboditodon in moiko, ei mototundú mita kon agama in Yahudi bo intau mita in Parisi! Ei intau mita inta mongomunapik! Moiko in naonda bo poḷoḷobongan inta cinet nobudó; kon dotá in ḷuainea ontongan mopira bo modarit, táe kon bonunea nopuḻing in tuḷan bo noyagi-yagimai in kotoran.

²⁸Ná doman tua in moiko. Kon ḷuai koontongan intau mobanar; táe kon bonu in ginamu nopuḻing in oaid diá totuu bo moraat.”

²⁹“Koboditodon moiko ei mototundú mita kon agama bo intau mita in Parisi! Ei intau inta mongo munapik! Moiko in nogaid kon poḷoḷobonganan in nabi mita bo nonompia kon tugu in intau mita inta mopirisaya.

³⁰Takin mosingog nanaa, ‘Aka kami nobiag kon tungkuḷ i ḷaki bo ibaay naton, yo tantú diábí in kami dinumudui kon oaid monia inta moibog moḻimod kon nabi mita tatua.’

³¹Táe diábí kinotaauan monimu kon oaid monimu tatua in sabanarnea noginsilangbí kon i monimu tontaní, kon moiko in buíbí in moḷoḻimod kon nabi mita tatua!

³²Dá duduiandon doman in oaid in mogoguyang monimu!

³³Ei intau mongoromú moiko in buí in intau moraat! Moiko in diábí mokoḷagui kon pohukuman kon bonu in naraka?

³⁴Sin tuamai indongogai kopira: Akuoi in nopotabá mangoi kon i monimu in nabi mita, intau mita inta mongobijaksana, bo intau mita inta motundú kon inta kinoibog i Tuhan. Ibanea in ḻimodon monimu, ibanea in popopakú monimu kon kayu pinoyotaḻempang bo ibanea in pogutúon monimu nongkon kotá tobatú modapot in kotá ibanea.

³⁵Tuamai, moiko in motanggung kon oaid monimu inta moḷoḻimod kon intau mita inta diá kotaḷá, pinangkoipamai kon i Habel intau inta mopia tua, modapot kon i Zakharia ki adí i Berekhya, inta iḻimod monimu kon sigad in tampat mokudus bo meja pototuduan kon sosumba.

³⁶Poguman-Ku kon i monimu: Oaidmu mita tanaa in korasaanbí in intau mita masa in tanaa!”

³⁷“Yerusalem, Yerusalem! Nabi mita iḻimodmu. Totabá mita i Allah inandurmu in batu nodapot in minatoi. Nokakitdon in Akuoi moibog totok mosipun kon i adímu mita naonda bo ki iná in manuk mosipun kon i adínea mita kon koḻikipnea, tongá doí in moiko!

³⁸Tuamai in diádon takinan i Allah in moiko.

³⁹Bo Akuoi in moguman kon inimu: Pinangkoi kon tanaa iko in diá bidon mokoontong kon i-Nakó bui, modapot in moiko moguman, ‘Binarakatandon in Sia inta namangoi kon bonu in tangoi Tuhan.’ ”