Read Mongondow MATIUS 24 Bible Online

MATIUS 24 - Mongondow bible

MATIUS 24

¹Nopaḷut mako nosingog kon natua, ki Yesus iḷumuai kon Baḷoi Tuhan, bo minayá. Murí-Nea mita namangoi bo notundú kon bangunan Baḷoi Tuhan tatua.

²Ki Yesus in noḻibó kon i monia, “Inontongdon monimu in nion komintan? Poguman-Kudon kon i monimu, diábí tobatúmai in batu kon naa in pomayá mako moitudu motompia kon batu ibanea. Tua komintan daitonbí uuyon.”

³Wakutu in ki Yesus iḻimitú kon tudu in Buḷud Zaitun, murí-Nea mita namangoidon kon i-Nia bo nongonguman-Neamai. Kai monia. “Pogumandon kon inami, mongó toonu in tua komintan mobaḻí bo onu in tanda kon koangoian-Mu bo tanda in kopaḷutan dunia naa?”

⁴Dá ki Yesus in noguman kon i monia, “Mokopoingat sinbá diá in moiko koakaḷan.

⁵Sin mobayong in intau in mamangoi bo momaké in tangoi-Ku bo mosia in moguman, ‘Akuoi in ki Mesias!’ Bo mosia naa inta mokopopisí kon mobayong in intau dumudui kon soaḷ inta noitaḷá.

⁶Kondongogan monimu in tombá poparangan andeka habar mita moparang, táe dika moondok. Sin tua komintan in mobaḻíbí tongá deemanpabí singgainea.

⁷Sin bangusa bo bangusa mosiparangan bo dodatuan moparang doman takin dodatuan. Moiangoi in wakutu kon bayongan intau kodaitan in kaanon bo ḻinug kon bayongan tampat.

⁸Tongá tua komintan in bagubí pomangkoian in roriga kon wakutu in diápa modapot in zaman inta mobagu.

⁹Kon wakutu intua moiko in poposarakan sinbá rorigaan, bo moiko in ḻimodon bo saturuon in bayongan intau sin moiko in dumodudui-Ku.

¹⁰Bo moantó intau in momayow kon i-Nakó, bo mosia in mosiposarakan bo poḷat mosisaturuan.

¹¹Moantó in intau inta deeman totuu nabi in mamangoi, bo motundú kon inta noitaḷá kon moantó intau.

¹²Bo lantaran kodugang-kodugang in oaid moraat, dá tabi kon tumpaḷa intau in modaitdon.

¹³Tongá intau inta monahang modapot in kopaḷutan tua komintan mosia in mosaḷamat.

¹⁴Bo Habar Mopia kon ki Allah in mamangoi momarenta saḷaku Datu in popotaaudon kon bayongan intau kon dunia naa, sinbá bayongan in intau mokodongogdon kon tua. Bain mobaḻí komintan intua bo moiangoidon in kiamat.”

¹⁵“Moiko in mokoontongbí kon ‘aid moraat inta mokorimumud’, ná inta pinoguman i Nabi Daniel, simindog kon tampat motusi. (Paraḷu indoian in intau mita inta mobaca: tarukira totok in mangaḻenea!)

¹⁶Kon dodai intua intau mita inta kon Yudea in mustibí moḷagui mopobayá in buḷud.

¹⁷Intau inta kon tampat pobobarasanangan donaaidon bui moponag bo mogamá kon pakakat mita kon bonu in baḷoinea.

¹⁸Bo intau inta kon gobá in dikadon in sia mobui mogamá kon pakeangnea.

¹⁹Moboditodon guyanga mita bobay inta sidia andeka inta koyogotpa in nopoteté in adí kon dodai intua!

²⁰Posambayangdon, sinbá kon dodai in moiko moḷagui deeman kon sempo in tumping bo deeman kon singgai in Sabat!

²¹Sin kon wakutu intua koangoian in roriga totok, roriga tatua in diápa kon dodai in onda in nobaḻí nongkon pinangkoipamai in dunia naa pinomia nodapot masa in tanaa, bo roriga tatua in diá bidon bui mobaḻí.

²²Bo aka kuma bo wakutunea naa bo diá impoḷokan; yo kon bayongan inta nobiag diábí in mosaḷamat. Tongá popisí in intau mita inta sinokopiḻídon dá wakutu tatua inimpoḷokandon.

²³Kon wakutu intua aka oyúon intau moguman kon i monimu, ‘Indoiai, ki Mesias kon naa!’ andeka ‘Ki Mesias kon tua!’ — dika mopirisaya in moiko.

²⁴Sin oyúon in mongaku ki Mesias bo mongaku nabi táe mosia tua intaubí mongongakaḷ, tongá mosia in mogaid doman kon tanda mita inta moḷoben bo soaḷ mita inta mokoherang sahingga in aka mobaḻí, yo mosia in mokoakaḷ doman kon intau mita inta ain piniḻí.

²⁵Tarukira inta pinoguman-Ku muna kon i monimu.

²⁶Aka intau moguman kon i monimu, ‘Indoiai, Sia intua kon Padang gurun!’ — dikabí moiko mayá intua. Andeka, kai monia, ‘Indoiai, Sia intua kon bonu in yuang!’ — dikabí in moiko mopirisaya.

²⁷Sin naonda bo kilat inta monindar nongkon dotá in pomukaan bo noisindar nodapot kon dotá in toyopan, natuadon doman in aka koangoian i Adí Intau.

²⁸Kon onda oyúon mahaḷuk minatoi, kon tua doman in ḷagapan mokokaan kon mahaḷuk minatoi moyosipun.”

²⁹“Naonda in mopaḷutdon roriga wakutu intua, yo mata in singgai mosindip, bo buḷan diádon monindar. Bo tundi mita in mongoḷabú nongkon ḷangit, bo kawasa mita kon baḷangon moirangkap.

³⁰Kon wakutu intua ontongondon in tanda in Adí Intau kon ḷangit. Bo komintan intau kon dunia naa mogamui bo mosia in mokoontong kon Adí Intau tatua mamangoi mongin ḻimonik in goḷom kon ḷangit takin bayongan kawasa bo kamuliaan-Nea.

³¹Bo Sia in mopotabá kon malaekat-Nea mita ḷumuai, bo mogirup kon bansí inta mopia totok in singognea sin mosia mosipun kon intau mita inta aindon piniḻí-Nea nongkon popod mita in dunia, bo nongkon popod in ḷangit tobotak modapot popod in ḷangit tobotak doman.”

³²“Manangka intua yo indoiai in mangaḻe in totundú inta nongkon poumpamaan pangkoi in ara. Aka tanganea bo ḷumukó bo momangkoidon momoḻimping, yo kotaauan monimu kon diádon moonggot bo sempo in poninggai.

³³Ná doman tua aka moiko bo mokoontong kon naa komintan, yo pokotaaudon kon wakutunea in diádon moonggot.[21]

³⁴Poguman-Ku kon i monimu! Tua komintan in mobaḻídon kon wakutu in intau mita masa in naa diápa matoi modait.

³⁵Ḷangit bo butá in moyoyangbí, táe singog-Ku naa in mononoibí.”

³⁶“Tongá wakutu in kobaḻían tua in diábí tobatúmai intau in nokotaau, umpakabí malaekat kon soroga yo diábí doman, umpaka ki Adí Allah yo diábí doman[22], tongábí ki Amá kon soroga in nonotaau.

³⁷Sin ná inta nobaḻí kon masa i Nuh, yo natua doman in mobaḻí kon masa in koangoian i Adí Intau.

³⁸Kon wakutu in diápa in ḷunud moḷoben namangoi, mosia in nongaan bo nonginum, nobuḷoi bo pinobuḷoi nodapot kon singgai ki Nuh sinumuot kon bonu in kapaḷ.

³⁹Bo diábí kinotaauan monia in onu inta nobaḻí, wakutu in ḷunud diápa noiangoi bo nomutú kon i monia komintan. Natua doman in mobaḻí kon masa in koangoian i Adí Intau.

⁴⁰Kon wakutu intua, aka doyowa intau kon gobá, yo tobatú in diaan, tobatú in taḷaan.

⁴¹Aka doyowa in bobay inta koyogot mogiḻing; yo tobatú in diaan, tobatú in taḷaan.

⁴²Manangka intua umuran kiḷuka-ḷukadmai, sin diábí kotaauan monimu mongo toonu in ki Tuhan mamangoi.

⁴³Tongá bá kotaauan monimu in nanaa: Aka kitogi baḷoi bo mokotaau kon toonu in mononakow mamangoi, tantú moḷukadbí in sia, sin diábí pomayánea mako in baḷoinea tua in bongkaron.

⁴⁴Tuamai in moiko umurandon pobasadia, sin Adí Intau in mamangoi kon wakutu inta diá monimu sinangka-sangka.”

⁴⁵Ki Yesus in noguman, “Ki ine in simpaḷ inta mopia bo mopandoi? Inta aindon inaidan i tuangnea itoi in simpaḷ ibanea, sinbá sia in mobogoi in kaanon kon wakutunea.

⁴⁶Yo kosanangdon totok in simpaḷ inta kinotambakan mangoi i tuangnea koyogot in nogaid kon oaidannea tua, wakutu in ki tuangnea nobuidon mangoi.

⁴⁷Poguman-Ku kon inimu, simpaḷ natua in baḻíonbí i tuangnea moḷoḷukad kon bayongan kapunyaannea.

⁴⁸Tongá aka simpaḷ moraat, inta mosingog kon bonu in ginanea nanaa,

⁴⁹‘Ki Tuangku in moonggotpabí in mamangoi,’ bo mulai in sia momongkug kon simpaḷ ibanea, bo sia tongábí monginum bo mongaan moyotakin in intau mita nongoḷoḷangu,

⁵⁰Bo ki tuangnea in namangoi kon singgai inta diá sinangka-sangkanea bo kon wakutu inta diá kinotaauannea.

⁵¹Dá bobantung tatua in totok binout[23] i tuangnea, bo ḷumbúonnea kon tampat in intau mita inta mongomunapik. Mosia in mongombaḷ bo mororiga kon tua.”