Read Mongondow MATIUS 25 Bible Online

MATIUS 25 - Mongondow bible

MATIUS 25

¹“Kon wakutu in koangoian i Allah saḷaku Datu, in naonda bo poumpamaan tanaa: Mopuḷú in mongodeaga nogamá kon togá, monia bo nonontomu kon nonikaan ḷoḷaki.

²Ḻima in kon sigad monia tua in nobodok, táe ḻima doman in mobijaksana.

³Mongodeaga mita inta bodok tua nodia kon togá, tongá diá nodia kon ḷana.

⁴Táe mongodeaga taya ḻima inta mobijaksana, mosia in nodia kon togá bo nodia doman kon ḷana kon botoḷ.

⁵Bo popisí in nonikaan ḷoḷaki tatua noonggotdon in pinogoḷatan mako táe diápa doman noiangoi, sinomposiug in mosia komintan, dá nosiugdon in mosia.

⁶Naonda in noonggotdon kon doḷom dinongogmai oyúon in singog noguman nanaa, ‘Nonikaan niondon! Tontomudon in sia!’

⁷Dá mongodeaga mita tatua norobangon bo noponugung in ḷana kon togá monia.

⁸Mongodeaga mita inta bodok noguman kon mongodeaga mita inta mobijaksana, ‘Ogoiaipa in ḷana monimu biar tongá topiḻik, sin togá nami aindon mopiong.’

⁹Táe mongodeaga mita inta mobijaksana mita tatua in notubag, ‘Diá motaau! sin dika bo diá doman tugat kon inami bo kon i monimu. Maníka bo bayádon in moiko potaḷui kon i monia inta mopopotaḷui in ḷana.’

¹⁰Táe wakutu in mosia minayá notaḷui kon ḷana. Noiangoidon in nonikaan tatua, bo mosia inta ain nobasadia in sinumuot noyotakinnea kon ruangan ponikaan tatua, bo iḻingkopandon in ḷoḻingkop!

¹¹Onda intua noiangoidon in mongodeaga mita inta bodok bo noguman, ‘Tuang, Tuang, bukataipa in ḷoḻingkop sin tuotan nami.’

¹²Tongá sia in notubag, ‘Diábí kotaauan-Ku mongó ki ine in moiko!’ ”

¹³Bo pangabisannea ki Yesus in noguman, “Manangka intua umuran kiḷuka-ḷukadmai, sin diábí kotaauan monimu in singgai bo wakutunea.”

¹⁴“Aka ki Allah mamangoi saḷaku Datu, yo kaadaannea in naonda bo intau inta moibog mayá in ḻipú ibanea. Sia in nogoiní kon simpaḷnea mita bo nosilai kon kapunyaannea sin pinoki ḷukad.

¹⁵Inta tobatú inogoiannea in ḻima noribu in doit buḷawan, tobatú inogoiannea in doyowa noribu, bo inta tobatú inogoiannea in toribu. Sia in nobogoi natua kon i monia pinodudui in komampuan monia tontaní. Nopaḷut mako nobogoi kon tua, sia minayá.

¹⁶Simpaḷ inta notarima kon ḻima noribu tua minayá, bo nopobaraguna in doit inta inogoi tatua dá nokouḻí in sia kon ḻima doman noribu bui.

¹⁷Ná doman tua in simpaḷ inta nokouḻí kon doyowa noribu, pinobaragunanea doman intua, sahingga in nokouḻí doman kon kauntungan doyowa noribu.

¹⁸Tongá simpaḷ inta notarima kon toribu, minayá in sia bo nongaḻi kon butá bodongka iḷobongnea in doit i tuangnea tatua.

¹⁹Noonggotmai kon tua nobuidon mangoi in ki tuang monia tatua bo nogiap kon onda inta nouḻí monia.

²⁰Simpaḷ inta notarima kon ḻima noribu, namangoi bo nodia kon kauntungan ḻima noribu doman, bo sia in noguman, ‘Tuang doit ḻima noribu inta pinoki kadai i tuang kon i nakó, indoiaika, aindon pinopobaragunaku dá nokouḻí kon kauntungan ḻima noribu doman.’

²¹Bo ki tuangnea tatua in noguman kon i nia, ‘Tua in nopia, iko in simpaḷku inta mopia bo mojujur; iko aindon nogaid kon oaidan inta mointok inta pinoki aid kon inimu, manangka intua iko in ogoiankudon in tanggung jawab mogaid kon oaidan moḷoben. Angoidon bo duduidon mobarasanang takinku!’

²²Bo namangoi domandon in simpaḷ inta notarima kon doit doyowa noribu bo noguman, ‘Tuang, doit doyowa noribu inta pinoki kadai i tuang kon inakó, Indoiaika, aindon pinobaragunaku dá nokouḻídon kon kauntungan doyowa doman noribu.’

²³Dá ki tuangnea tua in noguman kon inia, ‘Tua in nopia, iko simpaḷku inta mopia bo motuḻid in gina. Popisí in iko aindon nogaid kon oaidan inta mointok takin gina motuḻid, dá iko ogoiankudon in tanggung jawab mogaid kon oaidan moḷoben. Tuot bo pobarasanangdon takinku!’

²⁴Kon tua namangoidon doman in simpaḷ inta inogoian in doit buḷawan toribu, sia noguman, ‘Tuang, kinotaauanku iko in intau inta morogi totok bo inta nokoyut kon gobá inta deeman binunakanmu bo nopuyut kon bungai in inta deeman pinomuḷamu.

²⁵Tuamai akuoi in moondok dá doit buḷawan toribu inta inogoi i tuang kon inakó binayáku iḷobong kon butá! Bo naa, pobuionkudon bui in kapunyaan i Tuang.’

²⁶Dá ki tuang tatua noguman kon inia, ‘Ei iko, simpaḷ inta moraat bo maḷat! Kinotaaunmu bidon kon akuoi in mokokoyut kon gobá inta deeman binunakanku bo nopuyut kon bungai in inta deeman pinomuḷa-Ku?

²⁷Tuamai, maní inogoiku in doitku tanion kon intau inta moibog mopobaraguna, sinbá aka akuoi mobui mangoi yo motarima kon kauntungannea.

²⁸Tuamai in gamádon in doit buḷawan inta kon inia bo ogoidon kon intau inta aindon mopuḷú in doit buḷawannea.

²⁹Sin pomuḷoi intau inta nooyúondon yo duganganbí bui, sinbá kalebeannea in mobarong totok. Táe ki ine inta diá nooyúon, yo onupa doman inta oyúon kon inia tua yo gamáandon doman nongkon inia.

³⁰Bo simpaḷ tanion inta diá in baragunanea pogarabdon mako kon bonu in tampat inta sindip totok. Kon tua sia in mongombaḷ bo mororiga!’ ”

³¹“Aka ki Adí Intau mamangoi saḷaku Datu bo sinakinan in malaekat mita, yo Sia in ḻimitú kon tampat pomarentaan-Nea.

³²Bo bayongan intau in sipunon kon tayowon-Nea bo poyotontaníon-Nea i mosia naonda gombala mopoyotontaní in domba bo bembé.

³³Domba mita in tampaton-Nea kon dotá in koḷanan-Nea, yo bembé mita in kon dotá in koḷoigi-Nea.

³⁴Bo Datu tatua in moguman kon i monia inta kon dotá in koḷanan-Nea, ‘Igai, in moiko inta binarakatan i Amá-Ku, tuotdon kon dodatuan inta aindon sinadia kon i monimu kon wakutupa in dunia naa bagupa binaḻí.

³⁵Sin wakutu in akuoi ginogoy, inogoian monimu Akuoi in kaanon, wakutu in Akuoi noyogang, inogoian monimu in Akuoi in inumon; wakutu in Akuoi nobaḻí intau mokokiangoi sinarima monimu in Akuoi kon baḷoimu.

³⁶Wakutu in Akuoi diá koḷambung; inogoian monimu in Akuoi in pakeang; wakutu in Akuoi notakit, sinompia monimu; wakutu in Akuoi kon bonu in ponjara, inangoi inindoian monimu.’

³⁷Dá intau mita mongopia tatua in noḻibó kon i-Nia, ‘Tuhan, kon dodaibí in onda inontong nami ki Tuhan in ginogoy bo inogoian nami in kaanon, andeka noyogang bo inogoian nami in inumon?

³⁸Bo dodaibí in onda in inontong nami in ki Tuhan saḷaku intau mokokiangoi, bo sinarima nami in ki Tuhan kon baḷoi nami andeka diá nogiḷambung bo inogoian nami in pakeang?

³⁹Kon dodai doman in onda inontong nami in ki Tuhan notakit andeka kon bonu in ponjara bo binayá nami inindoian?’

⁴⁰Datu tatua in motubag kon i monia, ‘Bá poguman-Kudon kon i monimu: onu inta aindon inaidan monimu kon i utat-Ku mita inta totok in bogá tanaa, yo tua in notongkaibí in pinogaid monimu kon i-Nakó!’

⁴¹Bo Sia in noguman doman kon i monia inta kon dotá in koḷoigi-Nea, ‘Bayádon in moiko nongkon tayowonku, sin moiko in intau mita inta binaḷa! Bayádon bo tuotdon kon bonu in tuḷu inta diá mopio-piong sin tua in sinadia in Ibilis bo malaekatnea kon i monimu!

⁴²Sin wakutu in Akuoi ginogoy, diá inogoian monimu in kaanon in Akuoi, wakutu in Akuoi noyogang, diá inogoian monimu in inumon.

⁴³Wakutu in Akuoi nobaḻí intau mokokiangoi, diá inogoi monimu in Akuoi sinumuot kon baḷoi. Wakutu in Akuoi diá koḷambu-ḷambung, diá inogoian monimu in pakeang wakutu in Akuoi notakit bo kon bonu in ponjara, diá binayá inindoian monimu.’

⁴⁴Bo mosia in noḻibó kon i-Nia, ‘Tuhan, kon dodaibí in onda inontong nami in ki Tuhan ginogoy andeka noyogang, andeka namangoi saḷaku intau mokokiangoi, andeka diá nogiḷambung andeka notakit, andeka kon bonu in ponjara bo diá inangoi sinompia nami in ki Tuhan?’

⁴⁵Bo Sia notubag kon i monia, ‘Bá poguman-Ku kon i monimu: aka tua komintan bo diá pinopoaid monimu kon intau inta totok in bogá tanaa, yo tua in notongkai doman in diá pinopoaid kon i-Nakó.’

⁴⁶Bo mosia naa in bonuon kon tampat pohohukuman mononoi, táe intau inta mopia in mokouḻí kon kobiagan inta mononoi.”