Read Mongondow MATIUS 27 Bible Online

MATIUS 27 - Mongondow bible

MATIUS 27

¹Naonda in modiugdon mobayag, bayongan imang itoi bo guhanga in ḻipú intau in Yahudi noyosipun bo nonantúdon kon moḻimod kon i Yesus.

²Sinogot monia in Sia, bo dinia pinosarakan kon i Pilatus, gubernur kon butá tatua.

³Kon wakutu in ki Yudas inta noposarakan kon i Yesus nokoontong kon ki Yesus in sinantúdon hukumon dapot matoi, nomanasaḷ in sia. Bo binayánea pinobui in doit saḷaka toḷu nopuḷú tatua kon i imang mita itoi bo guhanga mita in ḻipú.

⁴Bo noguman, “Binaradosadon in akuoi sin noposarakan in dugú in intau inta diá kotaḷá!” Táe mosia notubag, “Deemanbí urusan nami intua? Tua in urusanmubí tontaní!”

⁵Bo pinogarabnea in doit tatua kon bonu in Baḷoi Tuhan, bo minayá ginumantong.

⁶Imang mita itoi in nogamá kon doit tatua bo nosingog, “Doit tanaa in diábí motaau posumba kon i Allah, sin doit tanaa in boḻibí in nyawa.”

⁷Naonda in mosia noyosingog, nobaḻímai doit tatua pinotaḷuidon monia kon butá inta sinangoian. Butá in mogogaid kon kuyon sin baḻíon monia poḷoḷobongan kon intau mokokiangoi.

⁸Tuamai butá tatua dapot in singgai naa sinangoian intau “Butá boḻi in dugú”.

⁹Naonda intua nobaḻí, dá notompodon Pirman inta pinoyaput i Nabi Yeremia, “Mosia in notarima kon doit saḷaka toḷu nopuḷú, boḻi inta ain sinantú kon sigad in intau Israel, inta pas poguboḻi kon i-Nia.

¹⁰Bo doit tatua pinoguboḻi monia kon butá intau inta mogogaid kon kuyon butá ná inta pinongoyow i Tuhan kon inakó.”

¹¹Wakutu in ki Yesus dinia kon tayowon i gubernur. Ki gubernur noḻibó kon i-Nia, “Degá Iko Datu intau Yahudi?” Ki Yesus notubag, “Ikodon tontaní in noguman kon tua.”

¹²Táe wakutu in imang mita itoi bo guhanga mita in ḻipú noponapud in tosingogon kon i-Nia, diábí sinokotubagan-Nea.

¹³Dá ki Pilatus in noḻibó kon i-Nia, “Degá diá dinongogmu in bayongan inta pinonapud in intau mita kon ini-Mu?”

¹⁴Tongá diá inabatan-Nea totontagámai, sahingga in noherang totok in ki Gubernur tatua.

¹⁵Ain noibiasa kon i gubernur kon aka singgai moḷoben mopoḷuai in sia in tobatú intau kon ponjara, táe pokipiḻí kon intau moantó.

¹⁶Kon wakutu intua kon ponjara oyúon tobatú intau inta totok in moraat, tangoinea in ki Yesus Barabas.

¹⁷Popisí in mosia noyosipundon kon tua, dá ki Pilatus in noḻibó kon i monia, “Ki ine in koibog monimu poḷuaionku, ki Yesus Barabas andeka ki Yesus inta sinangoi ki Kristus?”

¹⁸Ki Pilatus in noḻibó natua sin kinotaauanneadon kon dinia mangoi monia in ki Yesus bo pinosarakan popisíbí in mosia mointoi kon i-Nia.

¹⁹Wakutu in ki Pilatus ḻimitúpa mako kon baḷoi pongadilan, ki buḷoinea nongoyow kon inia, “Donaai iko dumugang kon pelekara in intau mopia tanion, sin lantaran Sia yo akuoi in sinumogoindop kon diá mopia in kogobíi.”

²⁰Táe lantaran pinakisa saḷaḷu in imang mita itoi bo guhanga in ḻipú, dá intau mita kon tua nonantúdon kon mopoigum sinbá poḷuaiondon in ki Barabas bo ki Yesus in hukumon matoi.

²¹Ki gubernur noḻibó bui kon i monia, “Ki ine in kon ibog monimu poḷuaionku bo ogoi kon i monimu?” Mosia nomaḷú, “Ki Barabas.”

²²Dá guman i Pilatus kon i monia, “Aka natua, yo onuonku in ki Yesus inta sinangoi ki Kristus?” Mosia in nomaḷú komintan, “Sia musti popopakú kon kayu pinoyotaḻempang!”

²³Sia in bui noḻibó, “Táe oaid moraat naonda inta aindon inaidan-Nea?” Táe mosia in kopiadon momaḷú in moguman, “Popopakú in Sia kon kayu pinoyotaḻempang!”

²⁴Naonda in kinotaauan i Pilatus kon diádon sia mokobayow kon i monia tua, nodapot in momangkoidon mokacau totok, dá sia in nogamá kon tubig bo nonomok kon tayowon in intau moantó bo noguman, “Diábí in taḷáku kon dugú in intau tanaa! Tua in urusanbí monimu tontaní!”

²⁵Bayongan in intau inta kon tua in notubag, “Pomayádon mako bain kami bo ki adí nami in motarima kon hukuman kon kopatoian-Nea!”

²⁶Bo ki Barabas in pinoḷuaineadon bo inogoi kon i monia, táe ki Yesus in sinambokneapa muna; bodongka pinosarakannea sin pokipopakúdon kon kayu pinoyotaḻempang.

²⁷Onda intua tontara mita i gubernur nodia kon i Yesus pinobayá in baḷoi pongadilan, bo bayongan in tontara noyosipun kon ḻibumai i Yesus.

²⁸Iḷongkut monia in ḷambung-Nea bo pinakéan monia in jubah nokasumba.

²⁹Mosia in noraot doman kon kawa dodugian, bo pinopobandow kon uḷu-Nea. Mosia in nopokadai doman in aog kon ḻima-Nea koḷanan, onda intua sinumungkud in mosia kon tayowon-Neamai bo mopoyagi-yagimai kon i-Nia, kai monia, “Salam, ei Datu intau Yahudi!”

³⁰Mosia in nonduyá doman kon i-Nia, bo nogamá kon aog bo pinomobak kon uḷu-Nea.

³¹Nopaḷut mako nopoyagi-yagimai kon i-Nia, iḷongkutdon bui monia in jubah inta pinopopaké monia kon i-Nia, bo bui iḷambungan monia in ḷambung-Nea tontaní. Noiduduimai kon tua diniadon monia pinoḷuai in Sia bo pinopopakú kon kayu pinoyotaḻempang.

³²Naonda in mosia kon ḷuai in kotá, mosia noyodungkuḷ in tobatú intau inta nongkon Kirene ki Simon in tangoinea. Pinakisa monia in intau tatua pinoki potaanan in kayu pinoyotaḻempang inta popopakúan kon i Yesus.

³³Bo nodapotdon in mosia in tampat inta sinangoian Joljuta, mangaḻenea, “Tampat in Ḷungkaká.”

³⁴Kon tua Sia pinoinum monia in anggur inta binaukan in ompodu. Naonda in kinonanaman-Nea, doídon in Sia nonginum.

³⁵Nopaḷut mako pinopopakú monia kon kayu pinoyotaḻempang, ḷambung-Nea in sinila-silai mako monia. Mosia nosilai kon ḷambung-Nea tatua takin nomaké in lot.

³⁶Onda intua mosia iḻimitú kon tua noḷukad kon i-Nia.

³⁷Bo kon ḻimonik in uḷu-Nea pinopopakuan monia in dopí inta pinaisan in pais inta binaḻí dodoyonan pinohukuman kon i-Nia: “Naadon in ki Yesus Datu intau Yahudi.”

³⁸Kon tua oyúon doman in doyowa intau mononakow inta pinopopakú doman kon kayu pinoyotaḻempang noyotakin-Nea, tobatú kon dotá in koḷanan, bo tobatú kon dotá in koḷoigi-Nea.

³⁹Intau mita inta noitaḻib kon tua moningkuḻe, bo momombiḻing[27] kon i Yesus.

⁴⁰Mosia in noguman, “Ei iko inta moibog mogumpag kon Baḷoi Tuhan, bo bui moposindog kon daḷom in toḷu nosinggai, aka Iko ki Adí i Allah, yo posaḷamatdon in awak-Mu tontaní bo poponagdon nongkon kayu pinoyotaḻempang tanion!”

⁴¹Natua doman in imang mita itoi, mototundú mita kon agama bo guhanga mita in ḻipú moyotakin doman moningkuḻe kon i-Nia takin mosingog,

⁴²“Sia moposaḷamat kon intau ibanea, táe awak-Nea tontaní diá koposaḷamatan-Nea! Sia Datu in Israel, aka Sia moponag nongkon kayu pinoyotaḻempang tatua yo kami in mopirisayabí kon i-Nia.

⁴³Sia moharap mako kon i Allah mamangoi. Pomayá mako sinbá ki Allah in mamangoi bo moposaḷamat kon i-Nia, aka koibog i Allah in Sia! Sin Sia aindon nongaku kon Sia kaín in ki Adí i Allah.”

⁴⁴Intau mononakow inta pinopopakú doman kon kayu pinoyotaḻempang noyotakin-Nea noningkuḻe doman natua kon i-Nia.

⁴⁵Pinangkoi kon jam mopuḷú bodoyowá moutu in singgai nodapot in jam nogintoḷu sinimindip in ḻipú tatua.

⁴⁶Degá jam nogintoḷudon ki Yesus in nomaḷú noropot, kai-Nia, “Eli, Eli, lama Sabaktani?” mangaḻenea, “Allah-Ku, Allah-Ku nongonu sin sinaḷáan-Mubí in Akuoi?”

⁴⁷Nokodongogmai kon tua intau mita inta sinimindog mako, noguman, “Sia in nokuuk kon i Elia!”

⁴⁸Bo namangoi in tobatú nongkon i monia tua, bo nogamá kon bungang karang bo pinoḷodok kon anggur boil bo pinopoturak kon aog bo pinopodiug kon bibig i Yesus.

⁴⁹Táe intau mita ibanea in noguman, “Donaai, maníka bo indoian naton mongo ki Elia in mamangoi moposaḷamat kon i-Nia!”

⁵⁰Ki Yesus in nomaḷú bui noḷangon bodongka noposarakan in nyawa-Nea.

⁵¹Bo indoiainmai, gorden in Baḷoi Allah nobisik nosilai doyowa nongkon ḻimonikannea nodapot in ḻimonagannea. Bo dinandúan bo buḷud mita in batu nongobotak.

⁵²Bo poḷoḷobonganan mita nongobukat bo nobayong in intau mita inta mopia bo mopirisaya kon i Allah inta aindon minatoi in nobiag bui.

⁵³Bo naonda in ki Yesus nobiagdon bui, mosia iḷumuai nongkon poḷoḷobongan, bo sinumuot kon kotá in Yerusalem. Bo noantó intau nokoontong kon i monia.

⁵⁴Itoi in tontara takin prajurit-Nea inta noḷukad kon i Yesus noondokdon totok naonda in nokoontong kon ḻinug bo onu inta aindon nobaḻí tatua, bo mosia nosingog, “Totuubí, kon Sia naa in ki Adíbí i Allah!”

⁵⁵Bo kon tua nobayong doman in bobay inta noindoi nongkon noyayú, mosia tua in bobay mita inta dinumudui kon i Yesus nongkon Galilea sin mobantung kon i-Nia.

⁵⁶Kon sigad monia tua, oyúon doman in ki Maria Magdalena, bo ki Maria inta ki iná i Yakobus bo i Yusup, bo ki buḷoi i Zebedeus.

⁵⁷Naonda in noungkoḷomdon, oyúon in intau inta nooyúon nongkon Arimatea, tangoinea in ki Yusup, sia in nobaḻídon murí i Yesus.

⁵⁸Sia minayá kon tayowon i Pilatus bo noigum kon mayat i Yesus. Bo ki Pilatus nomarentadon kon i monia kon ogoi in mayat tatua kon inia.

⁵⁹Bo dinia i Yusup in mayat tatua, binakutnea in pusi noaḷus bo nodarit totok.

⁶⁰Bodongka pinopouḻidnea kon poḷoḷobongan nobagu, inta kinaḻinea kon bonu in buḷud batu. Nopaḷut mako iḻingkopannea in batu moḷoben, bodongka minayá.

⁶¹Táe ki Maria Magdalena bo ki Maria ibanea kon tuapa ḻimitú mako kon tayowon poḷoḷobongan tatua.

⁶²Nopoikoḷomai kon singgai, singgai in Sabat, imang mita itoi bo intau mita in Parisi noyotakin minayá kon i Pilatus,

⁶³bo noguman, “Tuang, kinotoropan nami, Intau mouboḷ tatua kon wakutu in nobiagpa, perna noguman, ‘Naonda in toḷu nosinggai mobiag in Akuoi bui.’

⁶⁴Manangka intua pokiḷukadon kon moḷoḷukad mita in poḷoḷobongan tatua modapot in singgai intoḷunea; sin dika bo angoion in murí-Nea mita takowon in mayat-Nea, bo poguman monia kon Sia aindon nobiag bui kon sigad in intau mita minatoi. Sahingga in uboḷ kon singgai tumi in moraa-raatdon nongkon inta muna.”

⁶⁵Dá ki Pilatus in noguman kon i monia, “Naa in moḷoḷukad mita, bayá bo ḷukadaidon kopira in poḷoḷobongan tatua.”

⁶⁶Mosia in minayá in poḷoḷobongan tatua bo sinilotan monia bodongka iḷukadan.