Read Mongondow MATIUS 28 Bible Online

MATIUS 28 - Mongondow bible

MATIUS 28

¹Naonda in singgai in Sabat noitaḻibdon, subupa totok kon singgai dungkuḷ Diminggu tatua, ki Maria Magdalena bo ki Maria ibanea minayá in poḷoḷobongan tatua noindoi.

²Bo daḻíbí dinandúan noropot totok. Tobatú malaekat i Tuhan noponag nongkon soroga bo noḻitoi kon batu inta pinonaḷob tatua, bodongka iḻitúannea.

³Pogot in malaekat tatua mopouḻi-uḻinag, ḷambungnea in nobudó totok naonda bo salju.

⁴Moḷoḷukad mita kon poḷoḷobongan tatua in gugur mako sin noondok totok, mosia tua nádon intau mita minatoi.

⁵Táe malaekat tatua in noguman kon bobay mita tatua, “Dikadon moondok in moiko! Sin kinotaauankubí kon moiko in mamangoi motayak kon i Yesus inta ain pinopopakú kon kayu pinoyotaḻempang.

⁶Sia in diá bidon kon naa, sin Sia in nobiagdon bui, ná inta ain pinoguman-Nea, angoi bo indoiaika in tampat inta pinopouḻidan kon i-Nia.

⁷Ḷagidon bayá bo pogumandon kon murí-Nea, ‘Kon ki Yesus in nobiagdon bui nongkon sigad in intau mita minatoi. Sia aindon inumuna kon i monimu minayá in Galilea; bain kon tua bo ontongon monimu in Sia!’ Akuoi in moguman kon i monimu kon onu inta totuu.”

⁸Mosia ḷagi minayá nongkon poḷoḷobongan tatua, takin ondok bo pia in gina. Mosia noribatuk in minayá nopotaau kon murí mita i Yesus.

⁹Bo ki Yesus in noyodungkuḷ monia bo noguman, “Salam kon inimu!” Dinimiug in mosia kon i-Nia bo ginumakap kon sioḷ-Nea bo nosumba doman kon i-Nia.

¹⁰Bo ki Yesus in noguman kon i monia, “Dika moondok! Bayádon bo poguman kon i utat-Ku mita sinbá mosia in mayádon in Galilea; bain kon tua bo ontongon monia in Akuoi.”

¹¹Naonda in mosia kon yuakdon in daḷan, namangoidon in intau mita inta noḷukad kon poḷoḷobongan. Mosia minayá in kotá bo nopotaau kon imang mita itoi kon bayongan inta ain nobaḻí.

¹²Bo naonda in mosia noyosingog takin guhanga mita in ḻipú, mosia in nonantúdon kon uboḻianan monia in tontara mita inta noḷukad tatua kon poḷoḷobongan

¹³takin koyow nanaa, “Poguman kon intau mita, nanaa, kon tungkuḷ in doḷom moiko nosiug noḷoḷot. Bo Murí-Nea mita namangoi bo nogamá kon mayat-Nea.

¹⁴Bo aka kotaauandon i gubernur in soaḷ tanaa, yo bain kami in moyosingognea, dá in moiko in diábí potaḷáan.”

¹⁵Sinarima monia in doit tatua bo dinuduian monia onu inta pinoguman bo pinoki aid kon i monia. Bo ouman tanaa aindon nodapot kon intau mita in Yahudi dapot masa in tanaa.

¹⁶Murí-Nea mita inta mopuḷú bomitá tatua nobuat bo minayá in Galilea, kon tampat inta ain sinundú i Yesus kon i monia.

¹⁷Naonda in inontong monia, sinumba monia in Sia, táe oyúon in topiḻik diá mopirisaya.

¹⁸Dá ki Yesus in dinimiug kon i monia bo noguman, “Akuoi in inogoiandon in bayongan kawasa kon soroga bo kon dunia.

¹⁹Tuamai, bayádon, bo baḻídon in bayongan intau dumodudui-Ku, bo baptisdon in mosia podoyon kon tangoi i Amá, Adí, bo in Roho i Allah.

²⁰Bo tundú in mosia mogaid kon onu inta aindon pinoguman-Ku kon i monimu. Bo bá kotaauan monimu, kon Akuoi in umuranbí kotaki-takin monimu modapot in singgai pangabisan.”