Read Mongondow MATIUS 5 Bible Online

MATIUS 5 - Mongondow bible

MATIUS 5

¹Naonda in ki Yesus nokoontong kon intau moantó tua, Sia notakod kon buḷud, bo naonda iḻimitú in Sia, murí-Nea mita in namangoidon kon i-Nia.

²Kon tua ki Yesus nomangkoi notundú kon i monia:

³“Pia in kamang in intau inta nobogá kon tayowon i Allah, sin mosia tua inta mobaḻí umat i Allah.

⁴Pia in kamang in intau inta nokuyang in gina, sin mosia tua iropotanbí in ginanea!

⁵Pia in kamang in intau inta moaḷus in oaid bo pososingog sin mosia tua i motarima kon dandi i Allah.

⁶Pia in kamang in intau inta moibog totok mogaid kon inta mobanar; sin bayongan tua in ogoibí i Allah.

⁷Pia in kamang in intau inta mopia in gina; sin mosia i motarima doman kon kopopia i Allah.

⁸Pia in kamang in intau inta motuḻid in ginanea; sin mosia tua inta mokoontong kon i Allah.

⁹Pia in kamang in intau inta moibog in dodamean; sin mosia tua in tangoion ki adí mita i Allah!

¹⁰Pia in kamang in intau inta pinogutú lantaran mogaid kon inta kinoibog i Allah; sin mosia doman tua inta moyotakin i Allah!

¹¹Pia in kamang i moiko, inta popisí in Akuoi, moiko siningkuḻe bo pinogutú takin pinoponapudan inta moraat.

¹²Koḷunganga bo kopiadon in gina monimu, sin moḷoben in mouḻímu kon soroga, sin nabi tungkuḷ intua in pinogutú doman monia natua.”

¹³“Moiko nion in simuton in dunia. Aka simuton tatua moḻiaudon, yo onu in pogibung kon inia? Diá bidon in baragunanea, dongka bidon ḷumbúon bo koritakan in intau.

¹⁴Moiko bayag in dunia. Ḻipú inta kon tudu in buḷud diábí moibuni.

¹⁵Apa doman diábí intau inta mopoyongkit mako in togá bo tungkubannea in belek, yo tantú tuduonneabí kon tampat pototuduan kon togá dá mokosimbayag kon bayongan intau inta kon bonu in baḷoi tatua.

¹⁶Natua doman bayagmu musti monindar kon tayowon in intau, sinbá ontongon monia in oaidmu mita inta mopia bo modayow kon i Amámu inta kon soroga.”

¹⁷“Donaaidon sangkaan monimu, kon Akuoi in mamangoi momopat kon hukum i Musa andeka buk mita in nabi. Akuoi in mamangoi deemanbí momopat kon tua, táe mogintompodbí.

¹⁸Poguman-Ku kon i monimu: Kon dodai in ḷangit bo butá naa diápa moingamá yo tobatúmai in hurup andeka titik kon hukum i Musa diábí in inggamáan, kon wakutu in bayongan tua diápa mobaḻí komintan![2]

¹⁹Tuamai, ki ine in monginggamá kon tobatúmai in parenta kon hukum i Musa, tongákabí topiḻik, bo motundú kon inta diá moitutui kon intau ibanea, yo sia tua in tampaton kon tampat inta moompá totok kon dodatuan i Allah. Táe, ki ine inta mogaid bo motundú kon bayongan inta parenta kon hukum i Musa, yo sia tua in mokouḻí kon tampat inta moḷantud kon dodatuan i Allah.

²⁰Tuamai, Akuoi in mosingog kon inimu: Aka iko bo diá mogaid kon onu inta kinoibog i Allah moiḻiu kon mototundú mita kon agama in Yahudi bo intau mita in Parisi, yo moiko in diábí mobaḻí umat i Allah.”

²¹“Moiko ain nokodongog kon onu inta ain pinoguman kon mogoguyang naton, nanaa: Donaai moḻimod; ki ine in moḻimod, yo hukumon.

²²Táe Akuoi in moguman kon i monimu, pomuḷoi intau inta tumorú[3] kon i utatnea, yo musti hukumon; bo ki ine in moguman kon i utatnea kaper yo musti popotayow kon Itoi in Agama. Bo ki ine in moguman, ‘Pompuḷong,’ yo musti (pogonag) kon naraka inta kodoko-dokot.

²³Manangka intua aka iko modia kon onu inta ogoi posumba kon i Allah bo wakutu intua moiko nokotorop kon oyúon ki utatmu mosakí in gina kon inimu,

²⁴yo taḷaaipa in onu inta diniamu posumba tatua kon tayowon in meja pogogukatan kon sosumba bo bayádon muna poyodame i utatmu tatua bain tua bo bayádon pobogoi kon onu in posumbamu kon i Allah.

²⁵Aka iko bo koyota-yotakin in saturumu, yo ḷagidon poramuji moyobayat kon dodai in kon daḷanpa, sinbá diá posarakannea in iko kon hakim, bo hakim tatua moposarakan kon moḷoḷukad kon ponjara, bodongka bonuon monia kon ponjara in iko.

²⁶Akuoi in moguman kon inimu: Iko in diápabí poḷuaion monia kon ponjara aka diápa kouboḻianmu in boḻimu kon inia.”

²⁷“Moiko ain nokodongog kon Pirman inta noguman nanaa: Donaai monuaḻing.

²⁸Táe Akuoi in moguman kon inimu: pomuḷoi in intau inta mokobobuimai kon bobay tobatú bo moibog kon inia, yo sia tua aindon nonuaḻing takin bobay tatua kon bonu in ginanea.

²⁹Manangka intua aka matamu koḷanan bo mokobaradosa kon inimu, yo maníka kuil bo ḷumbúdon intua, sin maníka bo koinggamáan in mata tosimpaḷ dika in awakmu komintan in pogonag kon bonu in naraka.

³⁰Ná tua doman aka ḻimamu koḷanan mokobaradosa kon inimu, yo pongkó mako bo ḷumbúdon intua! Sin maníka bo diá koḻima tosimpaḷ dika in awakmu komintan moibonu kon naraka.”

³¹“Ki Musa ain nomais nanaa: ki ine in mogaat kon i buḷoinea bobay musti mobogoi in surat talak kon i buḷoinea tua.

³²Táe Akuoi in moguman kon inimu: Pomuḷoi intau inta mogaat kon i buḷoinea koḻikudbí in nonuaḻing, yo siabí tua in nokopopisí kon i buḷoinea nonuaḻing, bo ki ine i motonibuḷoi takin bobay inta ain ginaat tua, yo sia doman noyotakin nonuaḻing.”

³³“Moiko ain nokodongog doman kon onu inta ain pinoguman i Tuhan kon mogoguyang naton: donaai moḷagui kon dandi, Onu inta ain pinodandimu takin ibot kon tayowon i Allah, musti aidaimu intua.

³⁴Táe Akuoi moguman kon inimu: dikadon mokoimontanmai in mongibot bo popodoyon kon ḷangit, sin ḷangit tua in tampat pomomarentaan i Allah,

³⁵andeka mongibot bo popodoyon kon butá sin butá naa in baya-bayáan-Nea mako; andeka mongibot popodoyon kon Yerusalem, sin Yerusalem tua in kotá i Datu Moḷoben.

³⁶Donaaidon doman iko mongibot podoyon kon uḷumu, sin diábí in kawasamu monginbudó andeka moginrondí, kon tougatmai in buokmu.

³⁷Aka totuu, yo poguman kon ‘totuu’, bo aka diá, yo poguman doman ‘diá’ — sin onu in noiḻiu kon tua yo nongkon inta moraatbí.”

³⁸“Moiko aindon doman nokodongog kon Pirman: Mata toḻiuan in mata, ingipon toḻiuan doman in ingipon.

³⁹Táe Akuoi in moguman kon inimu: Donaai moiko motuḻí kon intau inta nopoaid in moraat kon inimu. Táe nanaabí in aidai, aka ki ine in monokap kon putongimu koḷanan, yo ogoi doman in putongimu koḷoigi.

⁴⁰Bo kon intau inta moibog mopongadu kon inimu kon hakim, sin sia moibog in ḷambungmu, yo ogoidon doman in jubahmu.

⁴¹Bo ki inekabí in momakisa kon inimu mayá toribu nometer, yo dugangaidon mako mayá takinnea doyowa noribu nometer in koyayúnea.

⁴²Ogoiai monag in intau inta moigum bo donaaidon mogindoí kon intau inta mamangoi moḷuan kon inimu.”

⁴³“Aindon dinongog monimu in Pirman nanaa: kotabibí in yobayatmu bo kodoídon in saturumu.

⁴⁴Táe tanaa Akuoi in moguman kon inimu: kotabibí in saturumu bo sambayangaidon in mosia inta nomogutú kon inimu,

⁴⁵aka moiko mogaid kon natua yo moiko in mobaḻí ki adí mita i Amámu inta kon soroga. Sin ki Allah in mobogoi mata in singgai-Nea kon intau moraat bo kon intau mopia bo Sia doman inta mobogoi in uyan kon intau inta mobanar bo kon intau inta mouboḷ.

⁴⁶Táe aka moiko bo tongá motabi kon intau inta motabi doman kon inimu, onubí in mangaḻenea? Diá kinotaauan monimu degá kon mononagi mita doman kon pajak mogaid doman kon natua?

⁴⁷Bo aka moiko bo tongá doman mohoromat kon i utat mita, onubí in noiḻiu kon oaid in intau ibanea? Intau doman inta diá monotaau kon i Allah in mogaid doman kon natua!

⁴⁸Manangka intua moiko in musti mogaid kon inta totok in mopia ná ki Amámu inta kon soroga ain nogaid kon inta totok in mopia.”