Read Mongondow MATIUS 7 Bible Online

MATIUS 7 - Mongondow bible

MATIUS 7

¹“Donaai moiko mohakim, sinbá moiko in diá doman hakimon.

²Sin naonda in pohohakimmu kon intau ibanea, tua doman in pohakim kon inimu.

³Nongonu sin puḻing i utatmu in ontongon monimu, táe kayu kon bonu in matamu in diábí kinotaauanmu?

⁴Naondabí iko motaau moguman kon i utatmu, ‘Igai bá inggamáanku in puḻingmu,’ bokaka kon matamu oyúon in kayu?

⁵Ei intau momunapik! Poḷuaipa muna in kayu kon bonu in matamu, sinbá motarang in matamu, bo motaaudon mopoḷuai in puḻing kon mata i utatmu.

⁶Donaaidon moiko mobogoi in barang inta mokudus kon ungkú. Bo donaai moiko mopogarab in mutiaramu kon boké, sinbá diá tongá rita-ritakannea mako intua bodongka mobuimai moyingki-yingkit kon i monimu.”

⁷“Poigumdon, dá ogoianbí in moiko. Potayakdon, dá mokouḻí bí in moiko. Ponangkokódon, dá pobukatanbí in moiko kon ḷoḻingkop.

⁸Sin pomuḷoi in intau inta moigum motarima; bo intau inta motayak in mokouḻí; bo intau inta monangkokó, pobukatan kon ḷoḻingkop.

⁹Oyúon degá in kon sigad monimu in mobogoi in batu kon i adínea, aka ki adínea moigum kon roti?

¹⁰Andeka mobogoi in uḷag kon i adínea, aka poiguman kon toyá?

¹¹Dá aka moiko inta moraat bo motaau mobogoi, kon inta mopia kon i adímu mita. Yo bambíkabí ki Amámu kon soroga! Sia in moiḻiubí kon tua, ogoian-Neabí inta mopia totok in ki ine inta moigum kon i-Nia.”

¹²Onu inta koibog monimu popoaid in intau kon i monimu yo popoaid domandon kon i monia intua. Tuadon bonu in bayongan atorang i Musa bo inta pinais kon buk in nabi mita.

¹³“Tuotdon pongin daḷan inta mointok, sin daḷan inta mopobayá in naraka moḷoben bo mobanat, bo mobarong in intau mongin tua.

¹⁴Táe daḷan inta mopobayá in tampat inta mokobiag in nointok bo tongá topiḻik in intau inta mokodapot kon tua.”

¹⁵“Mokopoingatdon kon nabi mita inta diá totuu. Nabi inta mamangoi kon inimu naonda bo intau inta mongopia, táe sabanarnea mosia tua intau bí moromú.

¹⁶Bagubí nongkon oaid monia tua ain kotaauan mongo ki ine i mosia. Degá oyúon in intau mosipú kon bungai in anggur kon pangkoi in díat, andeka ḷantat kon pangkoi in bo bonganga.

¹⁷Kotaauanbí aka pangkoinea, bo nopira yo mopira doman in bungainea táe aka pangkoinea diá nopira, yo tantú bungainea in diábí doman mopira.

¹⁸Sin diábí in aka pangkoinea mopira bo mopomungai in inta moraat, andeka pangkoinea inta diá mopira bo mopomungai inta mopira.

¹⁹Sin pomuḷoi in pangkoi inta mopomungai in diá mopira yo musti pupuḷon bo tubáan.

²⁰Nongkon oaidnea kotaauandon monimu in mosia.”

²¹“Diábí komintan intau inta mogoiní kon i-Nakó, ‘Tuhan, Tuhan,’ in mobaḻí umat-Ku, táe tongábí mosia inta dinumudui kon koibog i Amá-Ku inta kon soroga.

²²Kon Singgai Ponantúan moantó in intau inta mogoiní kon i-Nakó: ‘Tuhan, Tuhan, takin moguman; kami naa inta nopoyaput in habar nongkon ini-Mu? Bo inta nomaké in tangoi-Mu in noguntun kon dimukud mita moraat bo nomaké doman in tangoi-Mu nogaid kon inta mokoherang kon intau?’

²³Kon dodai intua, Akuoi in moguman taran-tarangan kon i monia, ‘Diábí kinotaauan-Ku in moiko! Bayádon pokoyayú kon i-Nakó, sin moiko komintan in intau inta nogaid kon inta moraat!’ ”

²⁴“Pomuḷoi in intau inta nokidongog kon singog-Ku bo aidannea intua komintan, yo sia tua in ibarat intau inta mopandoi, inta noposindog in baḷoinea kon tudu in batu.

²⁵Naonda in nonguyan, inuntag in ḷunud bo tompot in baḷoi tatua, táe baḷoi tatua diábí nongonumai sin ain pinoposindog kon tudu in batu.

²⁶Táe pomuḷoi intau inta nokidongog kon singog-Ku tongá doí dinumudui, yo sia tua in notongkai in intau bodok, inta noposindog in baḷoinea kon tudu in bungaion.

²⁷Onda in nonguyan, inuntag in ḷunud bo tompot in baḷoi tatua, dá noumpag bo nogoguyaat totok.”

²⁸Bo naonda in ki Yesus nonimpod kon singog-Nea tatua, nongoherang in intau nobarong kon tua in nokodongog kon pototundú-Nea.

²⁹Sin Sia in motundú takin kawasa, diá ná mototundú kon agama monia.