Read Mongondow MATIUS 8 Bible Online

MATIUS 8 - Mongondow bible

MATIUS 8

¹Naonda in ki Yesus nosiḻig nongkon buḷud, intau mobarong dinumudui kon i-Nia.

²Kon sigad monia oyúon doman tobatú intau inta pinanyaki kuḻit inta mokorongó.[6] Sia in namangoi bo sinumungkud poḷat nosumba kon i Yesus, takin noguman, “Tuang, aka ki Tuang moibog mongundam, yo mopiabí in akuoi.”

³Bo kinadaian i Yesus in intau tatua bo noguman: “Moibog in Akuoi. Dá kopiadon in iko!” Bo kon dodaipa doman tuata panyaki kusta in intau tatua nopia.

⁴Bo ki Yesus in noguman kon inia, “Toropdon in singog-Ku naa! Donaai oumanon kon i inekabí in onu inta nobaḻí tanaa. Táe bayádon bo pokiindoi kon imang, bo pobogoidon iko in sosumba ná inta pinarenta i Musa, mobaḻí bukti kon i monia kon nopia in iko!”

⁵Naonda in ki Yesus tumuotdon kon Kapernaum, namangoi in tobatú porwira kon i-Nia poḷat nopoigum, kainia.

⁶“Tuang, bobantungku noitosiug mako kon baḷoi sin notakit diá mokobayá. Bo sia in moyoyigadon totok.”

⁷Dá ki Yesus noguman kon inia, “Bain angoion-Ku undaman in sia.”

⁸Táe porwira tatua in notubag: “Donaaidon Pak Guru, sin diá mokobaḻí in akuoi motarima kon i Pak Guru kon baḷoiku. Ogoiaidon in tosingogon tongákabí totontagá, yo notantú kon mopiabí in bobantungku tatua.

⁹Sin koḻimonikanku naa oyúon doman in itoiku. Táe koḻimonaganku oyúon doman in prajurit. Aka akuoi moguman kon prajurit tatua, bayá, dá mayábí doman in sia. Bo aka akuoi moguman kon prajurit ibanea, ‘Angoi!’ dá mamangoibí doman in sia, andeka akuoi mopotabá kon bobantungku, kon aidai in naa dá aidanneabí intua.”

¹⁰Naonda in dinongog i Yesus tosingogon in porwira tatua, noherang totok in Sia. Dá Sia in noguman kon intau mita inta dinumudui kon i-Nia, “Diápa kon dodai in onda in kinodungkuḷan-Ku in koḷoḷoben pirisaya ná tanaa kon sigad in intau in Israel!

¹¹Poguman-Ku kon i monimu! Mobayong in intau inta mamangoi nongkon pomukaan bo toyopan bo ḻimitú mongaan moyotakin i Abraham, i Ishak, bo i Yakub kon bonu in Dunia Mobagu i Allah.

¹²Táe intau mita inta sabanarnea mobaḻí tombonu in soroga toko pogonagdon kon tampat inta mosindip totok. Kon tua kodongogandon in ombaḷ bo roriga.”

¹³Nopaḷut mako nosingog kon tua, ki Yesus in noguman kon porwira tatua, “Pobuidon, onu inta pinirisayamu tatua in mobaḻí bidon kon inimu.” Dá kon dodaipa doman tatua bobantungnea nopia.

¹⁴Nodapotmai kon baḷoi i Petrus, inontong i Yesus in ki guyá i Petrus noitosiug mako sin pinonikan patú.

¹⁵Dá dinimiug in Sia bo nokadai kon ḻima in bobay tatua, bo poḷatdon nopia in patúnea. Dá bango-bangon in sia bo nobantung kon i-Nia.

¹⁶Naonda in noungkoḷomdon, mobarong in intau inta kinotoḷangan dimukud moraat in dinia mangoi kon i Yesus. Bo tongá takin tosingogon totontagá ki Yesus noguntun kon dimukud mita moraat tatua bo nongundam kon intau mita inta nongotakit.

¹⁷Tua mita in mobaḻí sinbá motompodon Pirman inta pinoyaput i Nabi Yesaya, nanaa, “Sia tua in nomotaan kon yoyiga bo mongundam kon panyaki naton.”

¹⁸Naonda in ki Yesus nokoontong kon intau moantó noḻipung kon i-Nia, Sia nonongganut minayá in ḷoḷan.

¹⁹Bo namangoidon in tobatú mototundú kon agama Yahudi noguman kon i-Nia: “Guru, akuoi in dumudui kon inimu, kon onda kabí in bayáan-Mu!”

²⁰Ki Yesus in noguman kon inia: “Serigala oyúon in bubúnea, bo ḷagapan oyúon in pugadnea, táe ki Adí Intau diá in tampat posiugan-Nea.”

²¹Bo dumodudui-Nea doman tobatú in noguman kon i-Nia: “Tuhan ogoiaipa in akuoi in wakutu mayá moḷobong kon i amáku.”

²²Táe ki Yesus in notubag: “Duduidon kon i-Nakó, bo pomayádon mako intau minatoi moḷobong kon intau minatoi monia.”

²³Ki Yesus sinumakoi kon uangga bo dumodudui-Nea mita in sinumakin doman kon i-Nia.

²⁴Bo dinaḻímai in tompot inirup noropot totok in danow tatua, dá nobokoḷ, bo bokoḷ kopiadon mondangat kon uangga inta sinakoian monia, táe wakutu intua ki Yesus nosiug noḷoḷot.

²⁵Bo namangoidon in murí-Nea mita noguḷung kon i-Nia, kai monia, “Tuhan Tuḷungaipa! Sin mobodito in kita.”

²⁶Sia in noguman kon i monia, “Nongonu sin moondokbí in moiko intau inta diá totok mopirisaya?” Onda intua nobangon in ki Yesus bo sinumorú kon tompot bo danow tatua, indoianmai yo diádon nogirup in tompot tatua bo danow in noḷonong totok.

²⁷Mosia in nongoherang bo noguman, “Ki inebí degá in Sia naa, sin tompot bo danow in dumuduibí kon tosingogon-Nea!”

²⁸Noiyaputmai in ḷoḷan kon ḻipú intau in Gadara, namangoidon kon i Yesus in intau taya dua inta kinotoḷangan in dimukud moraat, taya dua naa nongkon tampat poḷoḷobongan. Taya dua tua in totokdon in mokoondok sahingga intau mita diá mokobaḻí in mongin daḷan tatua.

²⁹Taya dua nomaḷú noropot, kai monia “Onuon-Mu in kami naa, ei Adí i Allah? Iko mamangoi degá mopoyoyiga kon inami umpaka deemanpa wakutunea?”

³⁰Diá noyayú kon i monia tua, oyúon in paanan boké inta koyogot motayakmai kon kaanonnea.

³¹Dá dimukud mita moraat tatua in nopoigum kon i Yesus, “Aka untunon-Mu in kami, yo potabádon kami tumuot kon boké mita tatua.”

³²Dá ki Yesus noguman kon i monia, “Bayádon!” Bo iḷumuaidon in mosia kon intau doyowa tatua bo sinumoḷang kon boké mita tatua. Bo paanan in boké tatua iḷumanduk kon pompang kon bonu in danow, bo noḷomot.

³³Bo moḷoḷukad mita kon boké tatua in noḷagui. Naonda in nodapotmai kon kotá nodait inouman monia in onu inta aindon nobaḻí. Inouman doman monia in intau mita inta kinotoḷangan in dimukud mita moraat tua.

³⁴Nokodongogmai kon tua, iḷumuaidon komintan in intau kon kotá tatua bo minayá kon i Yesus. Naonda in noyodungkuḷ i Yesus, mosia nopoigum totok kon i-Nia sinbá monaḷámaidon kon ḻipú tatua.