Read Mongondow MATIUS 9 Bible Online

MATIUS 9 - Mongondow bible

MATIUS 9

¹Onda intua ki Yesus sinumakoidon kon uangga bo iḷumeag minayá in ḷoḷan danow. Bo noidapotdon in Sia kon ḻipú-Nea tontaní.[7]

²Bo intau nodia mangoi kon i-Nia in intau tobatú inta ḻempeng bo noitosiug mako kon tosiugannea. Naonda inontong i Yesus in pirisaya monia, Sia in noguman kon intau inta diá mokobayá tatua, “Popirisayadon, adí-Ku! Taḷámu aindon inampungan.”

³Nokodongogmai kon singog i Yesus natua, mototundú mita kon agama Yahudi nosingog kon bonu in gina, kai monia, “Sia in noningkuḻe kon i Allah!”

⁴Táe kinotaauandon i Yesus in raian monia tatua, tuamai Sia in noḻibó, “Nongonu sin moiko in moraibí kon soaḷ mita inta moraat kon bonu in ginamu?

⁵Onda degá i mogampa-gampang, moguman, ‘Taḷámu aindon inampungan’, andeka moguman: ‘Pobangondon bo bayádon’?

⁶Táe bá kotaauan monimu, kon Adí Intau in inogoian in kawasa mongampung kon taḷá kon dunia naa.” Bo Sia in noguman kon intau inta ḻempeng tatua, “Pobangondon, buatdon in tosiuganmu bo pobuidon kon baḷoimu!”

⁷Intau tatua bango-bangon bo nobui.

⁸Intau moantó inta nokoontong kon onu inta nobaḻí tatua noondok bo nodayow kon i Allah inta ain nobogoi in kawasa ná domai tua in koḷoben kon intau.

⁹Naonda in ki Yesus minayá nongkon tua, Sia nokoontong kon tobatú intau tangoinea in ki Matius inta iḻimitú mako kon kantor in pajak. Ki Yesus in noguman kon inia, “Duduidon kon i-Nakó.” Dá ki Matius in sinimindog doman bo dinumudui.

¹⁰Bo naonda in ki Yesus nongaan kon baḷoi i Matius,[8] namangoidon doman in intau mita ibanea inta mononagi kon pajak bo intau mita baradosa bo nongaan noyotakin i Yesus bo murí-Nea mita.

¹¹Tua mita inontong in intau mita in Parisi, dá mosia in noguman kon murí mita i Yesus, “Nongonu sin gurumu in nongaanbí moyotakin mononagi kon pajak bo intau baradosa?”

¹²Singog monia tua dinongog i Yesus, dá Sia in noguman kon i monia, “Deemanbí intau mosehat in moparaḷu kon dokter, táe intaubí nongotakit.

¹³Manangka intua, bayádon bo balajarpa bui mangaḻe in Pirman tanaa, ‘Koibog-Ku in totabianbí, deemanbí onu inta ogoi monimu’. Sin Akuoi namangoi deemanbí mogoiní kon intau noitutui, táe intaubí baradosa.”

¹⁴Onda intua namangoidon murí mita i Yohanes kon i Yesus bo noḻibó, “Nongonu sin kami bo intau mita in Parisi in mopuasabí, táe murí-Mu mita in diábí?”

¹⁵Ki Yesus noḻibó bui kon i monia, “Motaau degá aka nonikaan ḷoḷaki koyotaki-takinpa monia bo yobayatnea mita morobonoḷdon in dodob? Tantú diábí! Oyúonbí in wakutunea nonikaan tatua gamáan nongkon sigad monia. Bain kon wakutu intuata bo mopuasa in mosia.

¹⁶Diábí in tobatúmai in intau inta momerak kon ḷambung nobagu sin poduḷampong kon ḷambung inta ain nokoyongan. Sin aka berakonneadon in ḷambung nobagu, yo ḷambung nobagu tatua in mogoguyaat domandon.

¹⁷Ná doman tua, anggur inta nobagupa in diábí motaau bonuon kon botutunea inta ain nokoyongan. Sin aka bonuon yo botutu tatua in mobokatdon bo anggur tatua in moibutak doman, bo botutu tatua in mogoguyaatdon totok. Tuamai anggur inta mobagu in bonuonbí kon tampatnea inta nobagu doman, sinbá tumpaḷa diá mogoguyaat.”

¹⁸Koyogotpa in ki Yesus nongonguman natua kon i monia, namangoidon in tobatú itoi in baḷoi pososambayangan, bo nosumba kon i-Nia poḷat noguman, “Ki adíku bobay bagupa minatoi, táe akuoi mopoigum kon i Guru mamangoi bo mokadai kon inia, dá mobiagbí bui in sia.”

¹⁹Ki Yesus in sinimindog bo takin murí-Nea mita minayá noyotakin in intau tatua.

²⁰Kon dodai intua oyúon doman tobatú bobay inta aindon mopuḷú bodoyowá notaong koonggotnea notakit toḷoganmai in dugú, sia moḷongasi totok dimiug kon i Yesus nongkon tumi sin mokadai kon ubung in jubah-Nea. Sin nanaa in kon raiannea: “Umpakabí tongá koḻiaianku in jubah-Nea, yo mopiabí in akuoi.” Bo iḻiainea in popod in jubah i Yesus.

²²Dodai intua ki Yesus in nobobui bo noindoi kon inia poḷat noguman, “Koroton in ginamu, adí-Ku! Sin iko in mopirisaya kon i-Nakó.” Bo kon dodaipa doman tua bobay tatua nopia.

²³Naonda in ki Yesus noiyaput kon baḷoi in itoi in baḷoi pososambayangan tatua bo nokoontong kon intau mita inta nogirup kon bansí bo intau mobarong inta motombá mako,

²⁴Sia noguman kon i monia, “Bayádon, sin adí tanaa in diábí minatoi, tongábí nosiug in sia.” Táe kinosingan monia in ki Yesus.

²⁵Naonda intau mita tatua pinoḷuai-Nea komintan, ki Yesus sinumuot bo nokadai kon ḻima in adí tatua, bo adí tatua in nobangondon.

²⁶Habar kon soaḷ inta nobaḻí tatua noiwayadon kon bayongan in ḻipú kon tua.

²⁷Naonda in ki Yesus nongingguput kon bobayáan-Nea, intau bilog doyowa dumuduianmai kon i-Nia bo sindaḷan momaḷú kai monia, “Adí i Daud, kotabipa in kami naa!”

²⁸Bo naonda in ki Yesus sinumuot kon baḷoi tobatú namangoi domandon kon i-Nia in intau bilog taya dua tua, dá ki Yesus noḻibó kon i nayadua, “Eta mopirisaya in moiko kon Akuoi mokopia kon i monimu?” “Mopirisaya, Amá!” tubag monia.

²⁹Bo kinadaian i Yesus in mata monia poḷat nosingog, “Popisí in moiko mopirisaya dá kobaḻídon onu inta kinoibog monimu.”

³⁰Dá nokoontongdon in mosia. Bo ki Yesus nongoyow totok kon i monia, kon donaai oumanon kon i inekabí in onu inta ain nobaḻí tanaa.

³¹Táe iḷumuai in mosia bo nopotaa-taau mako kon onu inta inaidan i Yesus tatua kon bayongan in ḻipú kon tua.

³²Naonda in intau mita bilog tatua iḷumuai, diniadon mangoi kon i Yesus in intau bobó tobatú inta kinotoḷangan in dimukud moraat.

³³Bo naonda in dimukud moraat tatua inuntun-Nea, dodaipa doman tatua nokosingogdon in intau tatua. Intau moantó inta kon tua nongoherang bo nosingog, “Diápa kon dodai in onda in kami in nokoontong kon ná tanion kon Israel.”

³⁴Táe intau mita in Parisi in noguman, “Tongguḷubí in dimukud mita moraat in nobogoi in kawasa kon i-Nia moguntun kon dimukud mita moraat.”

³⁵Natuata in inaidan i Yesus kon wakutu in Sia minaya-mayá mako in bayongan kotá bo ḻipu-ḻipúannea. Sia in nobogoi in totundú kon bonu in baḷoi mita pososambayangan bo nopoyaput in Habar Mopia kon naonda in ki Allah momarenta saḷaku Datu. Sia in nongundam doman kon bayongan takit bo yoyiga.

³⁶Nokoontongmai kon intau moantó tatua, Sia inangoian totok in tabi kon i monia, sin mosia totokdon in moḷopí bo diádon kodaya, naonda bo domba inta diádon kogombala.

³⁷Dá Sia in noguman kon murí-Nea mita, “Inta koyuton totuu modamaḷ táe mokokoyut in tongá topiḻik.

³⁸Manangka intua poigumdon kon i togi gobá sinbá potabá-Neadon mangoi in mokokoyut mita kon onu inta paraḷu koyuton tua.”