Read Mongondow MARKUS 10 Bible Online

MARKUS 10 - Mongondow bible

MARKUS 10

¹Nongkon tua, ki Yesus nobuat bo minayá in butá in Yudea bo kon daerah inta kon ḷoḷan Ongkag in Yordan. Intau in nobayong doman in namangoi noyosipun kon diugmai Yesus. Bo ná biasamai ki Yesus mobogoi in totundú kon i monia.

²Kon tua, oyúon doman in tongonumai intau in Parisi. Mosia namangoi doman sin motayak kon taḷá i Yesus. Dá mosia in noḻibó, “Podudui in agama naton, motaau degá intau in mogaat kon i buḷoinea?”

³Táe bui iḻibó i Yesus kon i monia, “Onu in parenta i Musa kon i monimu?”

⁴Dá kai monia doman, “Ki Musa nobogoi in kasampatan kon intau mogaat kon i buḷoinea, táe musti oyúon in surat talak.”

⁵Táe ki Yesus in noguman kon i monia, “Ki Musa nomais kon parenta tatua popisíbí in togat in gina monimu.

⁶Bokaka nongkon pinomangkoianmai, wakutu in ki Allah nomia kon intau, noguman in Sia nanaa, ‘Ki Allah nomia kon i monia ḷoḷaki bo bobay.

⁷Manangka intua ḷoḷaki monaḷámai kon i iná bo kon i amánea bo motobatúdon i buḷoinea bobay, [16]

⁸dá taya dua in nobaḻí bidon tobatú.’ Taya dua in deeman bidon doyowa táe tobatú bidon.

⁹Tuamai onu inta sinobatú i Allah diá motaau in poyogaaton in intau!”

¹⁰Naonda in mosia sinumuotdon kon baḷoi, iḻibó bui in murí mita i Yesus kon i-Nia in soaḷ tatua.

¹¹Dá ki Yesus in noguman nanaa kon i monia, “Ki ine in mogaat kon i buḷoinea bobay bo mobuḷoi bui takin bobay ibanea, yo nonuaḻing in sia kon i buḷoinea inta muna.[17]

¹²Ná doman tua, aka bobay mogaat kon i buḷoinea ḷoḷaki bo motonibuḷoi bui in ḷoḷaki ibanea, yo nonuaḻing doman in sia.”

¹³Noidudui kon tua, intau mita nodia kon mongoadí mita kon i Yesus sinbá barakatan-Nea in mosia. Táe sinorúan in murí-Nea mita in intau mita tatua.

¹⁴Nokoontongmai kon aid in murí-Nea mita natua, sinumorú in ki Yesus bo noguman kon i monia, “Pomayádon mako in mongoadí mita tanion in mamangoi kon i-Nakó! Dika ḷamboian in mosia, sin intaubí mita ná mosia naa in mobaḻí anggota in umat i Allah.

¹⁵Torop in naa! Ki ine in mayá tumayow kon i Allah bo diá ná mongoadí mita tanaa, yo sia in diábí mobaḻí umat i Allah.”

¹⁶Nosingog mako kon tua, ki Yesus in nokoyot kon mongoadí mita tatua, onda intua pinoukat-Nea in ḻimanea kon i monia bo nomarakat.

¹⁷Wakutu in ki Yesus nongingguput kon bobayáan bui, oyúon in intau tobatú noribatuk nopoangoi kon i-Nia. Intau tatua sinumungkud kon tayowon i Yesus bo noḻibó, “Guru inta mopia, onu in musti aidanku sinbá akuoi in motarima kon kobiagan inta mopia bo mononoi?”

¹⁸Dá ki Yesus in noḻibó kon inia, “Nongonu sin iko in mogumanbí kon Akuoi in mopia? Diábí in mopia, koḻikudbí in ki Allah tontaní.

¹⁹Tantú kinotaauanmu bidon in parenta i Allah tanaa, ‘Dika moḻimod, dika monuaḻing ande mokituaḻing, dika monakow, dika moposakusi in inta diá totuu bo dika monguboḷ, horomatbí in ki amá bo ki inámu.’ ”

²⁰“Pak Guru,” kain intau tatua, “bayongan in parenta tatua aindon dinuduianku nongkon noguodpamai akuoi.”

²¹Dá ki Yesus inimindoi kon intau tatua takin tabi bo noguman nanaa, “Dongkadon tobatú in paraḷumu aidan. Bayádon potaḷui in bayongan kapunyaanmu; bo ogoi kon intau nobogá in boḻinea tatua, dá mokouḻídon iko kon kapunyaan kon soroga. Onda intua angoidon dudui kon i-Nakó.”

²²Nokodongogmai kon singog i Yesus natua, nokecewa in intau tatua, bo sinaḷáanneadon in tampat tatua takin gina mobogat sin nooyúon totok in sia.

²³Dá nobobui in ki Yesus kon murí-Nea mita bo noguman kon i monia, “Moyoyiga totok in intau nooyúon tumuot mobaḻí umat i Allah!”

²⁴Noherang totok in murí-Nea mita in nokodongog kon singog i Yesus tatua. Táe ki Yesus noguman doman kon i monia, “Adí-Ku mita, totuubí kon moyoyigabí in mobaḻí anggota umat i Allah!

²⁵Mogampa-gampangbí kon tobatú unta tumuot kon bubú in dodagum dika in tobatú intau nooyúon tumuot kon dunia nobagu i Allah.”

²⁶Tosingogon i Yesus tatua nokotoboḻingo kon murí-Nea mita, dá mosia in nosiḻibóandon, kai monia, “Aka natua yo ki ine in motaau posaḷamaton?”

²⁷Ki Yesus inimindoi kon i monia bo noguman, “Aka kon intau, tua in diábí kumaan kon akaḷ, táe aka kon i Allah, komintanbí kumaan kon akaḷ; diábí in diá motaau-Nea aidan.”

²⁸Bo ki Petrus in noguman, “Pak Guru, indoiaika kami aindon nonaḷámai kon bayongan yagi-yagi sin dinumudui kon i Pak Guru.”

²⁹Dá kai Yesus doman, “Popirisayabí: intau inta ain nonaḷámai kon tombonu in baḷoinea, ande kon i utatnea ḷoḷaki, ande kon i utatnea bobay, ande kon i inánea, ande kon i amánea, ande kon i adínea mita, ande kon gobánea popisí in Akuoi bo popisí doman in Habar Mopia nongkon i Allah,

³⁰yo intau tatua in motarimabí kon moanto-antó nongkon inta oyúon masa inta naa. Sia in bui mokouḻí kon kogatut noguntuḷ in kobayong baḷoi, utat ḷoḷaki, utat bobay, iná, adí mita, gobá, bo umpakabí koantugan doman in roriga pomogutúan. Táe kon singgai moiduduimai intau tatua motarima kon kobiagan mopia bo mononoi.

³¹Táe mobayong in intau inta tanaa mako noiuna, mobaḻí moitontumi, bo mobayong intau inta masa in naa noitontumi in mobaḻíbí moiuna.”

³²Ki Yesus takin murí-Nea mita nopobayá in Yerusalem. Ki Yesus in kon muna bo murí-Nea mita in dumuduianmai kon i-Nia takin hawatir. Ná doman tua intau mita inta dumuduianmai kon i monia mongoondok doman. Noiduduimai kon tua inoiní i Yesus in murí-Nea mita bo pinopotaauan in soaḷ inta moiantug kon i-Nia.

³³Ki Yesus in noguman, “Indongogai in naa, tanaa kita mopobayádon in Yerusalem. Kon tua Adí Intau posarakandon kon imang mita itoi bo kon mototundú mita kon agama. Sia in hukumon matoi, onda intua posarakan kon intau mita deeman Yahudi.

³⁴Poyambáan monia in Sia, duyáan, yoyigaan bo popopakú monia kon kayu pinoyotaḻempang. Táe kon singgai intoḷunea bui mobiag in Sia.”

³⁵Ki Yakobus bo ki Yohanes inta ki adí mita i Zebedeus in namangoi dinimiug kon i Yesus bo noguman, “Pak Guru, oyúon in poigumon nami aidan i Amá kon inami.”

³⁶Iḻibó i Yesus, “Onu in koibog monimu aidan-Ku?”

³⁷Tubag monia, “Kami in moibog ḻimitú kon dotá in koḷanan bo koḷoigi i Amá, aka ki Amá mamangoidon momarenta takin kamuliaan.”

³⁸Táe guman i Yesus kon i monia, “Uḻe diábí kinotaauan monimu onu in pinoigum monimu nion. Degá mokosanggup in moiko in monginum nongkon palo in roriga inta bain inumon-Ku bo roriga inta bain moiantug kon i-Nakó?”

³⁹Dá kai nayadua doman, “Mokosanggup”. Dá ki Yesus in noguman bui kon i monia, “Memang moiko i monginumbí nongkon palo in roriga inta inumon-Ku, bo tumuotbí doman kon roriga inta moiantug kon i-Nakó.

⁴⁰Táe aka soaḷ ki ine in ḻimitú kon dotá in koḷanan ande kon dotá in koḷoigi-Ku, tua diábí in hak-Ku monantú. Ki Allahbí in monantú mongo ki ine in ḻimitú kon tampat mita tatua.”

⁴¹Naonda in dinongog in murí mita i Yesus taya mopuḷú ibanea intua, mosia sinumorú kon i Yakobus bo kon i Yohanes.

⁴²Dá inoiní i Yesus in mosia komintan bo sinongginaan, “Uḻe kinotaauanbí monimu kon itoi mita in bangusa mita inta diá monotaau kon i Allah in mondorot kon rayatnea. Bo intau mita moḷoben moritak kon i monia.

⁴³Táe moiko in diábí motaau momia natua! Táe aidai in naa, intau inta moibog mobaḻí moḷoben kon sigad monimu, sia in musti mobaḻí bobantungmu.

⁴⁴Bo intau inta moibog mobaḻí moiuna totok kon sigad monimu, musti in sia mobaḻí ata kon i monimu komintan.

⁴⁵Sin ki Adí Intau deemanbí namangoi sinbá bantungan, táe mamangoibí sin mobantung bo moposarakan in kobiagan-Nea sin mopobebas kon intau mobayong.”

⁴⁶Bo noidapotdon in mosia in Yerikho. Wakutu in ki Yesus bo murí-Nea mita takin intau moantó inta dinumudui kon i-Nia, nonaḷámaidon kon kotá tatua oyúon tobatú intau bilog inta ḻimitú mako kon daḷan sin moigum kon totabi in intau inta moitaḻibmai. Ki Bartimeus in tangoi intau bilog tatua, sia ki adí i Timeus.

⁴⁷Naonda in kinodongogannea kon inta moitaḻib tua in ki Yesus intau Nazaret dá nomaḷú in sia, “Yesus, Adí i Daud! Kotabipa in akuoi naa!”

⁴⁸Táe sinorúan in intau moantó in sia bo diá inogoi momaḷú. Táe diábí pinandungneamai, tangábí nokodugang kon ropotnea nomaḷú, “Adí i Daud, kotabipa in akuoi!”

⁴⁹Dá sinumogon in ki Yesus bo noguman, “Oiní mangoi in sia.” Dá inoiní doman monia in intau bilog tatua. Bo mosia in noguman kon intau bilog tatua, “Koroton in ginamu! Sin pinoki oiní i Yesus in iko, pobuatdon!”

⁵⁰Pinogarab in intau bilog tatua in jubahnea bo iḻimikat sinimindog minayá kon i Yesus.

⁵¹Iḻibó i Yesus kon inia, “Onu in koibogmu aidan-Ku kon inimu?” Intau bilog tatua in noguman, “Pak Guru, akuoi moibog mokoontong.”

⁵²Guman i Yesus kon inia, “Bayádon, sin iko mopirisaya kon i-Nakó dá nopiadon in iko.” Bo kon dodaipa doman tatua, nokoontongdon in intau bilog tatua. Bo dinumudui in sia kon i Yesus kon binayáan.