Read Mongondow MARKUS 11 Bible Online

MARKUS 11 - Mongondow bible

MARKUS 11

¹Wakutu in mosia nodiugdon kon Yerusalem, mosia noiyaputdon in kotá in Betpage bo Betania, kon oyuk in buḷud in Zaitun. Kon tua ki Yesus nopotabá in murí-Nea doyowa,

²takin koyow, “Bayádon kon ḻipú inta kon tayowonmai tatua. Naonda in moiko tumuot kon ḻipú tatua, moiko in mokoontong kon tobatú ki adí in keledai inta kotogo-togot. Keledai tatua diápa dodai onda in sinakoian intau. Bukádon togot in keledai tatua bo dia mangoi.

³Bo aka oyúon intau in moḻibó mongo nongonu sin bukaanbí monimu in keledai tatua? dá poguman, ‘Ki Tuhan[18] moparaḷu, bo ḷagion-Neabí pobuion.’ ”

⁴Dá minayá in murí-Nea taya dua tua bo nokodungkuḷ kon ki adí in keledai inta sinogot kon tayowon baḷoi kon bingkí in daḷan. Dá binukádon monia in keledai tatua.

⁵Bo intau inta sinimindog mako kon tua in noḻibó kon i monia, “Ei! Mongonu in moiko? Nongonu sin bukaanbí monimu in keledai tanion?”

⁶Bo sinubagan monia ná singog inta pinoguman i Yesus kon i monia. Dá pinomayádon mako in intau mita tatua in pinodiaan monia kon keledai tatua.

⁷Wakutu in noiyaputdon kon i Yesus in keledai tatua, inaipandon monia in jubah in ḻikud in keledai tatua, bo sinumakoidon in ki Yesus kon keledai tatua.

⁸Mobayong intau in mopoompat in jubah monia kon daḷan, oyúon doman in moporarit in tanga mita mongointok kon daḷan, tanga inta ginamá monia nongkon gobá.

⁹Mosia inta kon muna bo inta dumuduianmai nongkon tumi Yesus komintan mopobaḷú, “Dinayo-dayowdon in ki Allah! Binarakatandon in Sia inta namangoi kon bonu in tangoi Tuhan!

¹⁰Mobiagdon in pomarentaan-Nea kon singgai moiduduimai — pinomarentaan i Daud mogoguyang naton! Dinayo-dayowdon in ki Allah Inta Totok Moḷantud!”

¹¹Noiyaputmai kon Yerusalem sinumuot in ki Yesus kon Baḷoi i Allah. Kon tua Sia nonarukira kon bayongan yagi-yagi. Táe popisí in noungkoḷomdon dá sia takin murí-Nea mopuḷú bodoyowá minayádon in Betania.

¹²Nopoikoḷomai kon singgai, naonda in ḷumuaidon mosia kon Betania inangoian gogoy in ki Yesus.

¹³Nongkon moyayúpa inontong-Neadon in pangkoi in ara inta nobambar. Dá nongandupa in Sia notayak kon ḷabú in bungainea. Táe diábí tobatúmai in nouḻí-Nea, koḻikud in daunnea mita, sin dodai intua deemanpabí doman pomomungai in ara.

¹⁴Bo ki Yesus in noguman kon pangkoi in ara tatua, “Pinangkoi kon tanaa mako diá bidon tobatúmai intau in mokaanpa bui kon bungaimu!” Dinongog in murí-Nea mita in singog-Nea tatua.

¹⁵Onda intua mosia noiyaputdon kon Yerusalem, bo ki Yesus minayá bui in Baḷoi Tuhan. Kon tua Sia noguntun kon intau mita inta morodagang kon palas in Baḷoi Tuhan tatua. Binaḻintuang-Nea in meja mita monia inta pononoḻiuan kon doit, bo bangko mita in intau mopopotaḷui in paḷoma.

¹⁶Bo diá tobatúmai intau in ogoi-Nea modia kon onukadon in tumaḻib mongin palas in Baḷoi Tuhan tatua.

¹⁷Noiduduimai kon tua ki Yesus nobogoi in totundú kon intau mita kon tua. Sia in noguman, “Kon bonu in Buk Motusi ain pinais: Ki Allah in noguman, ‘Baḷoi-Ku in tangoionbí Baḷoi Pososambayangan in bayongan bangusa.’ Táe tanaa in binaḻí bidon monimu pugad in mogogagow!”

¹⁸Singog-Nea tatua dinongog in imang mita itoi bo mototundú mita kon agama in Yahudi. Dá nomangkoidon in mosia motayak kon naonda in poḷoḻimod kon i Yesus. Mosia in moondok kon i-Nia sin bayongan intau mopia in gina mokodongog kon totundú-Nea.

¹⁹Naonda in noungkoḷomdon, ki Yesus bo murí-Nea mita iḷumuaidon kon kotá tatua.

²⁰Doḷo-doḷom nobangon monik, wakutu in mosia noitaḻib kon pangkoi in ara tatua, inontong monia minatoidon pangkoi in ara tatua nodapot in uakatnea mita.

²¹Bo kinotoropan bui i Petrus onu inta nobaḻí koḷabung. Dá ki Petrus in noguman kon i Yesus, “Pak Guru, indoiaika! Pangkoi in ara inta inodi-odian i Pak Guru tua aindon minatoi!”

²²Kai Yesus, “Popirisayadon kon i Allah.

²³Dá totuu kon moiko in motaaubí moguman kon buḷud tanaa, ‘Pobuatdon bo ḷabúdon kon bonu in dagat!’ bo mobaḻíbí doman intua kon i monimu; asaḷ bo diá moḻia-ḻiaw in gina monimu, bo mopirisaya in moiko kon onu inta siningog monimu tua in totu-totuubí mobaḻí.

²⁴Manangka intua yo torop in naa: Aka moiko mosambayang bo oyúon in igumon, yo popirisayabí kon inogoibí i Allah kon inimu onu inigum monimu tua, dá tarimaanbí monimu intua.

²⁵Bo aka moiko mosambayang, táe oyúonpa intau diá kinosanang in ginamu, yo ampungaipa muna in intau tatua, sinbá ampungan doman i Amámu inta kon soroga in bayongan dosamu. [

²⁶Aka diá ampunganmu intau ibanea, yo diá doman ampungan i Amámu kon soroga in bayongan dosamu.]”

²⁷Mosia in namangoi bui in Yerusalem. Bo wakutu in ki Yesus minayá noḻibu kon bonu in Baḷoi Tuhan, imang mita itoi, mototundú mita kon agama bo itoi mita intau in Yahudi namangoi kon i-Nia.

²⁸Mosia noḻibó, “Onu in dodoyonanmu mogaid kon naa komintan? Ki ine in nobogoi in hak tatua kon ini-Mu?”

²⁹Ki Yesus in noguman, “Akuoi in moḻibó doman kon i monimu. Bo musti tubagan monimu sinbá poguman-Ku doman kon i monimu mongo hak i ine in pinaké-Ku nogaid kon soaḷ mita tanaa.

³⁰Ki ine in nobogoi in hak kon i Yohanes Mobobaptis, ki Allah andeka intau?”

³¹Dá nomangkoidon noyosingog in imang mita itoi bo itoi mita intau Yahudi. Mosia in noguman, “Aka kai naton, ‘Nongkon i Allah,’ Yo ḻibóon-Nea bui, ‘Aka natua yo nongonu sin moiko in diábí mopirisaya kon i Yohanes?’

³²Táe moyoyigabí doman aka poguman naton, ‘Hak nongkon intau.’ ” Sin mosia moondok kon intau mobarong, sin intau mobarong tatua nonganggapdon kon ki Yohanes tua in nabibí.

³³Dá tuamai mosia notubag, “Diá kotaauan nami.” Ki Yesus in noguman kon i monia, “Aka natua, yo diábí doman poguman-Ku kon i monimu, mongo hak i ine in pinaké-Ku nomia kon tua komintan.”