Read Mongondow MARKUS 15 Bible Online

MARKUS 15 - Mongondow bible

MARKUS 15

¹Subupa totok, bayongan Mahkama Agama, imang mita itoi bo itoi mita intau in Yahudi bo mototundú mita kon agama nogaid kon pinoyodungkuḷan motoyong. Onda intua sinogot monia in ḻima i Yesus bo dinia pinosarakan kon i Pilatus.

²Ki Pilatus in noḻibó kon i Yesus, “Totuu degá kon Iko nion Datu Intau in Yahudi?” Ki Yesus in notubag, “Natua in gumanmu.”

³Imang mita itoi in noguman doman kon bayongan inta pinonapud monia kon i Yesus.

⁴Bui in ki Pilatus noḻibó kon i Yesus, “Degá diá tubagan-Mu in pinonapud monia tua? Indongogaika mobayong totok in pinonapud monia kon ini-Mu!”

⁵Táe tongádon kibio-biómai in ki Yesus, dá noherang in ki Pilatus.

⁶Pomuḷoi in Porayaan kon Singgai in Paska, biasamai ki Pilatus mopoḷuai in tobatú tahanan inta pokipiḻí kon intau mobayong.

⁷Kon bonu in ponjara tatua oyúon intau tangoinea ki Barabas. Sia in pinonjara takin tongonumai intau inta nomarontak wakutu in korusuhan sin mosia tua in noḻimod.

⁸Nomangkoidon nosipun intau mobayong bo nopoigum kon i Pilatus sinbá sia in mopoḷuaidon in tobatú tahanan ná biasamai.

⁹Dá iḻibó i Pilatus kon i monia, “Moibog degá in moiko aka poḷuaionku kon i monimu in Datu Intau Yahudi tanaa?”

¹⁰Sin kinotaauandon i Pilatus kon imang mita itoi tatua in noposarakan kon i Yesus popisíbí in mointoi kon i-Nia.

¹¹Táe imang mita itoi nondodak totok kon intau moantó tatua sinbá ki Pilatus mopoḷuaidon kon i Barabas bo ogoi kon i monia.

¹²Dá iḻibó bui i Pilatus kon intau moantó tatua, “Aka natua yo onu in aidanku kon intau inta sinangoi monimu Datu Intau in Yahudi?”

¹³Mosia in nomaḷú, “Popopakúdon in Sia kon kayu pinoyotaḻempang!”

¹⁴Táe iḻibó i Pilatus kon i monia, “Aid moraat onu in inaidan-Nea?” Bo mosia in totokdon in nomaḷú, “Popopakúdon kon kayu pinoyotaḻempang in Sia!”

¹⁵Moibog in ki Pilatus moposanang gina intau moantó tatua, dá pinoḷuaineadon in ki Barabas kon i monia. Onda intua sia nopotabá in intau nosambok kon i Yesus, bodongka pinosarakan sin popopakúdon kon kayu pinoyotaḻempang.

¹⁶Ki Yesus dinia in tontara mita kon baḷoi pongadilan kon komaḻig i gubernur. Onda intua tontara mita inoiní noyosipun.

¹⁷Bo ki Yesus iḷambungan monia in jubah nopars bo pinogaidan kon mahkota dodugian bo pinopobandow kon uḷu i Yesus.

¹⁸Nopaḷut mako sinalam monia in Sia, kai monia: “Salam kon i Datu Intau in Yahudi!”

¹⁹Onda intua binobakan monia in tungkud kon uḷu in ki Yesus bo poḷat dinuyáan. Onda intua tumungkud in mosia mosumba kon tayowon-Nea.

²⁰Onda in pinoyambá mako monia natua in ki Yesus, iḷongkutdon bui monia in jubah nopars tatua bo pinoḷutudon bui in ḷambung-Nea tontaní. Onda intua dinia pinoḷuai sin popopakúdon kon kayu pinoyotaḻempang.

²¹Kon daḷan mosia noyodungkuḷ in intau. (Ki Simon in tangoinea, — nongkon Kirene — ki amá i Aleksander bo i Rupus.) Noitongkanábí in sia nongkon ḻipú bo mopobayá in kotá. Intau tatua pinakisa monia pinoki potaanan in kayu pinoyotaḻempang inta popopakúan kon i Yesus.

²²Ki Yesus in dinia monia pinobayá in tobatú tampat inta sinangoian Joljuta “Tampat in Ḷungkaká”.

²³Bo inogoian monia in anggur inta binaukan in taḷong mobondu, táe doí in Sia nonginum.

²⁴Onda intua pinopopakúdon monia in Sia kon kayu pinoyotaḻempang, bo mosia in nosilai kon ḷambung i Yesus táe muna norabut kon undi sin monantú kon silai monia tontaní.

²⁵Jam insiowneadon doḷo-doḷom in pinopopakúan monia kon i Yesus kon kayu pinoyotaḻempang dodai intua.

²⁶Bo kon ḻimonik in kayu pinoyotaḻempang tatua pinopopakúan doman monia in pais inta binaḻí monia dodoyonan pinopopakúan monia kon i-Nia. Nanaa in pinais tua: “Datu Intau in Yahudi”.

²⁷Dodai intua doyowa doman intau mogogagow in pinopopakú kon kayu pinoyotaḻempang noyotakin i Yesus. Tobatú kon dotá in koḷanan, tobatú kon dotá in koḷoigi Yesus. [

²⁸Tua in moponiata kon nobaḻídon onu inta ain pinais kon bonu in Buk Motusi, nanaa: “Sia in pinoyoiap in intau mita moraat.”]

²⁹Bayongan intau inta noitaḻib kon tua momombiḻing[26] bo moningkuḻe kon i Yesus. Mosia in mosingog, “Ei, Iko inta moibog mogumpag kon Baḷoi i Allah bo bui moposindog kon daḷom in toḷu nosinggai.

³⁰Poponagka kon kayu pinoyotaḻempang tanion bo posaḷamatdon in awak-Mu!”

³¹Ná doman tua imang mita itoi bo mototundú mita kon agama in Yahudi moningkuḻe kon i Yesus. Mosia in nosigumanan, “Sia moposaḷamat kon intau ibanea, táe awak-Nea tontaní in diábí koposaḷamatan-Nea!

³²Aka totuu in Sia Datu in Israel, Datu Mopoposaḷamat, yo pomayádon mako in tanaa Sia in moponag nongkon kayu pinoyotaḻempang tatua, sinbá ontongon nami bo mopirisaya domandon in kami kon i-Nia!” Intau mita inta pinopopakú kon kayu pinoyotaḻempang noyotakin i Yesus noningkuḻe doman kon i Yesus.

³³Naonda in noutudon in singgai, dunia sinimindip toḷu no jam in koonggotnea.

³⁴Bo wakutu in jam nogintoḷudon ḷoḷabungnea, ki Yesus nomaḷú noropot, “Eloi, Eloi, lama sabaktani?” inta mangaḻenea, “O Allah-Ku, o Allah-Ku, nongonu sin taḷaan-Mubí in Akuoi?”

³⁵Tongonumai in intau kon tua in nokodongog kon pinomaḷúan-Nea tatua, dá mosia in noguman, “Indongogaika, Sia in nogoiní kon i Elia!”

³⁶Dá tobatú intau kon sigad monia tua iḻimikat minayá nogamá kon gabus bo pinoḷodok kon anggur boil. Gabus tatua pinoturaknea kon kayu topongkó, bo sinonggó pinodiug kon bibig i Yesus, poḷat noguman, “Oḷatdon mongo moiangoi in ki Elia bo mopoponag kon i-Nia kon kayu pinoyotaḻempang tatua.”

³⁷Onda intua nomaḷú in ki Yesus bodongka minatoi.

³⁸Bo kon dodai doman tuata gorden kon bonu in Baḷoi Tuhan noberak nosilai doyowa nongkon omonikanea noidapot in ḻimonagannea totok.

³⁹Tobatú porwira inta sinimindog mako kon tayowon kayu pinoyotaḻempang tatua, nokoontong kon naonda in ki Yesus minatoi.[27] Bo noguman in sia, “Totuubí kon ki Adíbí i Allah in Sia naa!”

⁴⁰Kon tua oyúon doman tongonumai in bobay inta noindoi nongkon noyayú kon bayongan inta nobaḻí tatua. Kon sigad monia tua oyúon in ki Salome, ki Maria Magdalena bo ki Maria ki iná i Yakobus inta nobagupa bo i Yoses.

⁴¹Mosia tuata in bobay mita inta dinumudui bo biasamai motuḷung kon i Yesus wakutu in Sia kon Galilea. Bo nobayongpa doman in bobay mita ibanea in kon tua inta namangoi in Yerusalem noyotakin i Yesus.

⁴²Noungkoḷomdon in singgai kon dodai in ki Yusup nongkon Arimatea noiangoi. Ki Yusup naa in tobatú anggota in Mahkama Agama inta ihoromatmai in intau. Sia naa inta mogoḷatmai kon wakutu ki Allah mamangoi momarenta saḷaku Datu. Singgai intua singgaidon Pobasadiaan (tuata in singgaidon inta mopoikoḷom kon singgai in Sabat). Tuamai in ki Yusup nokopobarani in minayá in tayowon i Pilatus bo noigum kon mayat i Yesus.

⁴³

⁴⁴Noherang in ki Pilatus nokodongog kon ki Yesus in minatoidon. Dá tuamai pinoki oinínea itoi in tontara bo pinoḻibóan mongo noonggotdon degá minatoi in ki Yesus.

⁴⁵Naonda nokodongog kon lapuran in itoi in tontara tatua, dá inogoidon i Pilatus in ki Yusup mogamá kon mayat i Yesus.

⁴⁶Bo notaḷui in ki Yusup kon kaeng noaḷus inta nomahaḷ sin pinobakut. Onda intua pinoponagdon mayat i Yesus tatua bodongka binakutnea in kaeng tatua. Nopaḷut mako inukatneadon in mayat i Yesus kon tobatú poḷoḷobonganan inta inaidan kon bonu in buḷud batu. Onda intua iḻitoi monia in tobatú batu moḷoben bo pinoḻingkop kon ngara in poḷoḷobongan tatua.

⁴⁷Wakutu intua ki Maria Magdalena bo ki Maria ki iná i Yoses nonarukiramai mongo pinouḻid naonda in mayat i Yesus.