Read Mongondow MARKUS 16 Bible Online

MARKUS 16 - Mongondow bible

MARKUS 16

¹Naonda in noitaḻibdon in singgai in Sabat, ki Maria Magdalena, ki Maria ki iná i Yakobus bo i Salome minayá notaḷui kon toyokayu mita sin poḷana kon mayat i Yesus.

²Totokpa in subu kon singgai dungkuḷ kon diminggu tatua mosia minayá in poḷoḷobongan.

³Kon daḷan mosia nosiḻibóan, “Ki ine in motuḷung kon inaton moḻiḻid kon batu inta pinoḻingkop kon pinoḷobongan?” Sin noḷoben totok in batu tatua. Táe noiyaputmai in pinoḷobongan tatua indoianmai batu inta pinoḻingkop kon bubú in poḷoḷobongan noḻitoidon.

⁵Bo mosia in sinumuot kon bonu in pinoḷobongan tatua. Kon bonu in pinoḷobongan dotá in koḷanan inontong monia tobatú tayowmobiag inta nogi jubah nobudó iḻimitú mako, bo noitaḻikokog in mosia.

⁶Táe tayowmobiag tatua in noguman kon i monia, “Dika moondok! Kinotaauankubí kon moiko in motayak kon i Yesus intau Nazaret inta ain pinopopakú kon kayu pinoyotaḻempang. Diábí in Sia in kon naa. Sia ain nobiag! Indoiaidon naa in tampat pinoguḻidan monia kon i Yesus.

⁷Dá bayádon tanaa mako bo potaau in habar tanaa kon murí-Nea mita, kon i Petrus doman. Poguman nanaa, ‘Sia inumunadon kon i monimu minayá in Galilea. Bain kon tua bo ontongon monimu in Sia, ná inta ain pinoguman-Nea kon i monimu.’ ”

⁸Dá iḷumuaidon in mosia nongkon pinoḷobongan tatua bo noribatuk lantaran noitaḻikokog bo noondok. Mosia in diábí nongonguman kon i inekadon popisí in noondok. [

⁹Naonda in ki Yesus nobiag nongkon kinopatoian-Nea, doḷo-doḷom kon singgai in Diminggu, muna-munamai nokipogontong in Sia kon i Maria Magdalena. (Ki Maria naa inta pinopoḷuaian i Yesus in dimukud moraat taya pitu.)

¹⁰Dá ki Maria Magdalena in minayá nopotaau in onu inta nobaḻí tatua kon intau inta dumuduimai kon i-Nia inta koyogot monahangmai, kon gina bo mongombaḷmai popisí in kinopatoian i Yesus.

¹¹Táe naonda in kinodongogan monia kon ki Yesus in nobiag, bo ki Maria in nokoontongdon kon i-Nia, diábí in mosia nopirisaya.

¹²Noiduduimai kon tua ki Yesus nokipogontong kon murí-Nea doyowa takin aid ibanea. Tua in nobaḻí wakutu in murí-Nea taya dua kon daḷan mopobayá in ḻipú tobatú.

¹³Dá nobui in mosia bo nopotaau in soaḷ tatua kon murí mita i Yesus ibanea. Táe diá in mosia mopirisaya.

¹⁴Pangabisannea, ki Yesus nokipogontong kon murí-Nea mita mopuḷú bomitá tatua, wakutu in mosia koyogot mongaan. Sinorúan-Nea in murí-Nea mita tatua sin diá totok mopirisaya bo motogat totok in gina sahingga in diá mopirisaya kon intau mita inta ain nokoontong kon ki Yesus in nobiagdon bui.

¹⁵Guman i Yesus kon i monia, “Bayádon in bayongan dunia naa bo potaaudon in Habar Mopia nongkon i Allah kon bayongan intau.

¹⁶Intau inta diá mopirisaya hukumon. Táe intau inta mopirisaya bo binaptis in posaḷamaton.

¹⁷Naa in tanda mita inta moyotakin kon i monia inta mopirisaya, mosia in moguntun kon dimukud mita moraat podoyon kon tangoi-Ku; mosia in mosingog kon bonu in bahasa inta diá kinotaauan monia.

¹⁸Aka mosia mokadai kon uḷag andeka monginum kon rasum, diábí mobodito in mosia. Bo aka kadaian monia in intau mita motakit yo mongopia.”

¹⁹Naonda in ki Yesus nopaḷut nongonguman monia, Sia sinintakdon minayá in soroga. Kon tua, Sia momarenta takin i Allah.

²⁰Dá murí-Nea mita minayá nopotaa-taau mako in habar nongkon i Allah. Bo mosia in sinakinan i Tuhan kon bonu in binaya-bayáan mako monia. Tua pinoniata i Tuhan kon oaid mita inta mokoherang kon totuubí in pinotaau monia tua.] [SIMPOD IN NASKA DUNGKUḶMAI IBANEA [28] Bobay mita tatua minayá kon i Petrus bo kon yobayatnea mita bodongka nongonguman notoyong kon bayongan inta ain pinotaau kon i monia i intau tayowmobiag tatua. Nopaḷut mako kon tua, ki Yesus tontaní pinongin murí-Nea nopotaau pinangkoi kon pomukaan nopobayá in toyopan in habar inta motusi bo mononoi soaḷ kasaḷamatan inta mononoi.]