Read Mongondow MARKUS 3 Bible Online

MARKUS 3 - Mongondow bible

MARKUS 3

¹Ki Yesus sinumuot bui kon baḷoi pososambayangan. Kon tua oyúon tobatú intau inta ḻimanea tosimpaḷ noḻempeng.

²Kon baḷoi pososambayangan tatua oyúon doman in intau mita inta moibog motayak kon taḷá i Yesus, sinbá oyúon in baḻíon monia dodoyonan popongaduan kon i-Nia. Tuamai in umuran tarukiraan mako monia mongo mongundam doman in ki Yesus kon singgai in Sabat.

³Dá ki Yesus in noguman kon intau inta noḻempeng in ḻimanea tosimpaḷ tua, “Koḻigai kon naa bo sindog kon tayowon intau mita tanaa.”

⁴Onda intua iḻibó i Yesus kon intau mita kon tua, “Aka podudui in agama, onu in motaau aidan naton kon singgai in Sabat? Momia kon mopia andeka moraat? Moposaḷamat kon intau andeka moḻimod?” Mosia komintan nongobió.

⁵Korogi-rogi in ki Yesus nobobui magí-mako kon intau mita inta kon tua, táe moajar doman totok in gina-Nea sin totuu motogat in gina monia tua. Onda intua Sia in noguman kon intau inta noḻempeng in ḻima tatua, “Sintakdon in ḻimamu.” Dá sinintak doman in intau tatua in ḻimanea, bo baḷú domandon nopia in ḻimanea tatua.

⁶Dá intau mita in Parisi nonaḷámaidon kon baḷoi pososambayangan tatua, bo minayá noyosingog takin intau mita i Herodes, kon naonda in poḷoḻimod kon i Yesus.

⁷Noiduduimai kon tua, ki Yesus takin murí-Nea mita sinimípa bo nopobayá in Danow Galilea. Táe nobayong totok in intau nongkon Galilea in dinumudui kon i Yesus. Nobayong doman in namangoi nongkon Yudea,

⁸nongkon Yerusalem, nongkon butá Idumea, nongkon dotá in pomukaan kon Yordan, bo nongkon butá in Tirus bo Sidon. Mosia komintan in namangoi kon i Yesus, sin kinodongogandon monia in bayongan inta inaidan-Nea.

⁹Mobayong totok in intau, manangka intua ki Yesus nokitayak in uangga kon murí-Nea mita, sinbá diá kogupitan monia in Sia.

¹⁰Bo nobayong totok in intau inundaman-Nea, dá bayongan in intau notakit komintan moḷongasi dimiug kon i Yesus bo moḻiai kon i-Nia.

¹¹Bo intau mita inta kinotoḷangan in dimukud moraat, pomuḷoi in mokoontong kon i-Nia baḷú tumungkud kon tayowon-Nea bo momaḷú in moguman, “Ikobí nion in ki Adí i Allah!”

¹²Táe ilarang totok i Yesus in dimukud mita moraat tatua in mopotaau kon ki ine in Sia.

¹³Onda intua ki Yesus notakod kon buḷud tobatú, bo nogoiní kon intau mita inta kinoibog-Nea. Intau mita tatua in namangoi,

¹⁴bo Sia nonantúdon kon intau mopuḷú bodoyowá takin singog nanaa, “Akuoi in momiḻí kon i monimu, sinbá moiko in tumakin kon i-Nakó. Potabá-Ku in moiko mopotaa-taau mako in Habar Mopia nongkon i Allah,

¹⁵bo moiko in ogoian-Ku in kawasa moguntun kon dimukud mita moraat.”

¹⁶Naa in tangoi monia mopuḷú bodoyowá tua: Ki Simon (inta dinonoi doman ki Petrus),

¹⁷ki Yakobus bo ki Yohanes ki utatnea. Taya dua naa ki adí mita i Zebedeus (mosia in sinangoian ki Boanerges, inta mangaḻenea, “ki adí in gotup”),

¹⁸ki Andreas, ki Pilipus, ki Bartolomeus, ki Matius, ki Tomas, ki Yakobus ki adí i Alpeus, ki Tadeus, ki Simon intau in Zelot,

¹⁹bo ki Yudas Iskariot inta nomalidawan kon i Yesus.

²⁰Onda intua ki Yesus nobuidon kon baḷoi. Táe intau nobayong buipabí namangoi noyosipun, sahingga in ki Yesus bo murí-Nea mita diádon nokopongaan.

²¹Intau mita in noguman, “Nobundaidon in Sia nion!” Bo naonda in kinodongogan in ginaḷum-Nea in singog monia tua, binayádon monia ginamá in ki Yesus.

²²Mototundú mita kon agama Yahudi inta namangoi nongkon Yerusalem noguman, “Kinotoḷangan i Beelzebul in Sia! Itoi in dimukud mita moraat tatua in nobogoi in kawasa kon i-Nia moguntun kon dimukud moraat.”

²³Dá ki Yesus nogoiní kon intau inta mobayong tua bo nongonguman kon poumpamaan mita. Kai-Nia, “Uḻe, diábí kumaan kon akaḷ aka dimukud moraat moguntun kon dimukud doman moraat.

²⁴Sin aka tobatú dodatuan bo mosilai mokolo-kolompó inta mososaturuan, yo diábí mononoi in dodatuan tatua.

²⁵Ande, aka motoḷuadí diá motobatú bo mosisaturuan doman yo mogoguyaatbí in motoḷuadí tatua.

²⁶Dá natuabí doman kon bonu in dodatuan in Ibilis aka mosia mosisaturuan bo moyosilai, diábí doman monahang moonggot bo moyoyang.

²⁷Diábí doman tobatúmai intau in mokotuot kon bonu in baḷoi intau moropot bo mogagow kon kapunyaan in intau moropot tatua, aka diáneapa muna togoton in intau moropot tatua. Tantú munaneapabí togoton bodongka kogamaannea in kapunyaan in intau moropot tatua.

²⁸Pokotaaudon! Aka intau mogaid kon dosa bo mohojat,[7] yo motaaupabí ampungan in sia.

²⁹Táe aka mohojat in sia kon Roho i Allah, yo intau tatua in diábí motaau ampungan! Sin hojatan tatua in dosabí mononoi.” (

³⁰Ki Yesus in noguman natua sin oyúon in intau in noguman kon Sia in kinotoḷangan in dimukud moraat.)

³¹Noiduduimai kon tua, ki iná bo ki utat mita i Yesus namangoi. Mosia in sinimindog kon ḷuai bo nopotabá kon intau mogoiní kon i Yesus.

³²Dodai intua nobarong intau in iḻimitú kon ḻibumai Yesus. Dá mosia in noguman kon i-Nia, “Pak Guru, ki iná bo ki utat mita i Pak Guru, tua kon ḷuai. Mosia notayak kon i Pak Guru.”

³³Táe ki Yesus in notubag, “Ki inebí in ki iná-Ku? Ki inebí in ki utat-Ku mita?”

³⁴Onda intua ki Yesus nobobui magí-mako kon i monia inta iḻimitú kon ḻibu-Neamai bo noguman, “Naabí in ki iná bo ki utat-Ku mita!

³⁵Intau inta dinumudui kon ibog i Allah, siabí tua in ki utat-Ku ḷoḷaki bo ki utat-Ku mita bobay bo ki iná-Ku.”