Read Mongondow MARKUS 8 Bible Online

MARKUS 8 - Mongondow bible

MARKUS 8

¹Diá noonggot kon tua namangoi domandon in intau nobayong bo noyosipun. Popisí in mosia diá kokaanon, dá inoiní i Yesus in murí-Nea mita bo noguman,

²“Akuoi in motabi kon intau nobayong tanion. Toḷudon nosinggai in mosia kotaki-takin-Ku, bo tanaa mosia in diádon kokaanon.

³Aka pokipobuian-Kudon in mosia takin diá in bonu in sian, yo mopusingbí in mosia kon daḷan. Bokaka oyúon doman in sigad monia tua in namangoi nongkon noyayú.”

⁴Dá murí-Nea mita in noguman, “Guru, tampat tanaa noitontaní, kon onda in kouḻían naton kon kaanon inta tugat kon i monia tanion?”

⁵Ki Yesus in noḻibó, “Tongonupa in roti nion kon i monimu?” “Pitupa,” tubag i murí-Nea mita.

⁶Dá pinoki ḻitúan i Yesus in intau moantó tatua kon butá, bodongka nogamá kon roti pitu tatua bo nopoyaput in sukur kon i Allah. Onda intua binosi-bonsig-Nea in roti tatua bo inogoi kon murí-Nea mita pinoki silai kon intau mita tatua. Dá sinilai domandon in murí-Nea mita.

⁷Kon i monia oyúon doman in toyá nongoaḷus. Ginamá i Yesus in toyá tatua bo nosukur kon i Allah bodongka pinoki sila-silai-Nea doman magí-mako kon murí-Nea mita tatua.

⁸Mosia komintan in nongaan nobotug. Degá opatmai noribu intau nongaan. Nopaḷut mako kon tua sinipun in murí-Nea mita in kiagat in kaanon tatua — bo pitupa nokompé in nopuḻing. Onda intua pinotabádon i Yesus nobui in intau mita tatua

¹⁰Bo Sia takin murí-Nea mita ḷagidon sinumakoi kon uangga bo minayá in daerah Dalmanuta.

¹¹Tongonumai intau in Parisi namangoi kon i Yesus bo nomangkoidon nosi-soaḷan-Nea sin potayakan monia kon taḷá-Nea. Mosia in nopoigum sinbá ki Yesus mogaid kon soaḷ inta mokoherang kon intau saḷaku tanda kon Sia tua in totuu nongkon i Allah.

¹²Táe noajar in gina i Yesus, dá Sia in noḻibó, “Nongonu sin intau mita masa in naa mopoigumbí sinbá Akuoi mogaid kon inta mokoherang? Diábí ah! Doíbí in Akuoi mopoontong in tobatúmai in tanda kon i monia!”

¹³Bo sinaḷáanmaidon i Yesus in mosia bo minayá sinumakoi kon uangga bodongka nopobayá in ḷoḷan in danow tatua.

¹⁴Murí mita i Yesus nokoḻiong in nodia kon roti, koḻikudbí in roti tobatú inta koyongan kon uangga.

¹⁵Ki Yesus in noguman kon i monia, “Mokopoingat in moiko kon ragi in intau mita in Parisi bo ragi i Herodes.”

¹⁶Dá murí-Nea mita mulaidon nongonguman kon soaḷ tatua. Kai monia, “Noguman in Sia natua sin kita in diá nodia kon roti.”

¹⁷Kinotaauan i Yesus onu in pinobobayowan monia tua, tuamai iḻibó-Nea kon i monia, “Nongonu sin mobobayowanbí in moiko kon soaḷ diá in roti? Degá diápa doman kinotaauan bo kinomangaḻean monimu? Eta ná domaidon tua in kobobodok bodok in pororai monimu?

¹⁸Komata in moiko, táe nongonu sin diábí moindoi? Kobongoḷan moiko, táe nongonu sin diábí mokidongog? Diádon degá kinotoropan monimu

¹⁹in roti ḻima inta binonsi-bonsig-Ku bo pinokaan kon intau ḻima noribu? Tongonupa nokompé in kiagat in kaanon tatua naonda in sinipun magí?” Tubag monia, “Mopuḷú bodoyowá.”

²⁰Ki Yesus in noḻibó doman bui, “Wakutu in Akuoi nomonsi-monsig kon roti pitu sin pinokaan kon intau opat noribu, tongonupa nokompé in kiagat in kaanon tatua in sinipun magí monimu?” “Pitu,” tubag monia.

²¹Ki Yesus in noguman, “Degá diápa doman komangaḻean monimu?”

²²Mosia noiyaputdon kon Betsaida. Kon tua oyúon in intau tobatú nodia mangoi kon intau tobatú bilog kon i Yesus. Sia nopoigum kon i Yesus sinbá yapuon-Nea in intau bilog tatua bá mopia.

²³Kinadaian i Yesus intau bilog tatua bo kinapit-Nea minayá kon ḷuai in kotá. Onda intua dinuyáan i Yesus mata intau bilog tatua, bo kinadaian-Nea doman kon mata poḷat noḻibó, “Oyúondon degá in ontongonmu in tanaa mako?”

²⁴Intau tatua inimindoi ná muna, bo noguman, “Oo. Akuoi in nokoontong kon intau minayá, táe ontongonku naonda in mosia tua bo pangkoi in kayu.”

²⁵Bui iyapu i Yesus mata intau tatua, dá totu-totuudon nokoontong in intau tatua bo nopiadon, sahingga in nodaitneadon ontongon motarang.

²⁶Ki Yesus in noguman, “Pobuidon bo dikadon mobui kon kotá tatua.”

²⁷Onda intua ki Yesus bo murí-Nea mita minayá in ḻipu-ḻipúannea inta kon diugmai in Kaisarea Pilipi. Kon daḷan ki Yesus noḻibó kon i monia, “Aka podudui in guman intau, ki ine in Akuoi naa?”

²⁸Tubag monia, “Oyúon in noguman: Ki Yohanes Mobobaptis, oyúon doman in noguman ki Elia, bo ibanea in noguman: tobatú nabi.”

²⁹“Yo aka podudui in raian monimu tontaní, Ki ine in Akuoi naa?” Tua in ḷoḻibó i Yesus. Ki Petrus in notubag, “Ki Pak Guru naa in Datu Mopoposaḷamat!”

³⁰Dá ki Yesus nopotoingatdon kon i monia, sinbá diá mopotaau kon i inekadon in soaḷ Sia.

³¹Noiduduimai kon tua nomangkoidon in ki Yesus nobogoi in totundú kon murí-Nea mita, kon Adí Intau in musti mokorasa kon roriga mobayong, bo bayowan in itoi mita, imang mita itoi bo in mototundú mita kon agama. Ḻimodon in Sia, táe kon singgai intoḷunea biagon bui.

³²Nosilangbí totok in pinongonguman i Yesus kon murí-Nea mita soaḷ tatua. Dá inugut pinosí i Petrus bo sinogurnea in ki Yesus.

³³Táe ki Yesus nobobui bo inimindoi kon murí-Nea mita bo nonogur bui kon i Petrus, “Bayádon nongkon naa, ei mogogoda! Raianmu nion in raianbí in intau, deemanbí raian i Allah!”

³⁴Onda intua ki Yesus nogoiní kon intau moantó inta noyotakin murí-Nea mita bo noguman kon i monia, “Intau inta moibog dumudui kon i-Nakó musti ḻiongonnea in kopontingannea tontaní bo momotaan kon kayu pinoyotaḻempang bo umuran dumudui kon i-Nakó.

³⁵Sin intau inta moibog moposaḷamat in kobiagannea, kobuḻianbí in kobiagannea. Táe intau inta moposarakan kobiagannea sin kopontingan-Ku bo kopontingan in Habar Mopia inta nongkon i Allah, yo tuabí in mokosaḷamat kon inia.

³⁶Onubí in baragunanea kon intau, aka dunia naa nobaḻídon kapunyaannea, táe sia in kobuḻian in kobiagannea?

³⁷Motaau degá in kobiagan naa toḻiuan in onukadon?

³⁸Sin ki inekabí in mooyá popisí Akuoi bo popisí in singog-Ku kon yua-yuak in intau mita inta diá mosatia bo binaradosa naa, yo ki Adí intau mooyá doman popisí in intau tatua aka Sia mamangoidon bui kon bonu in kamuliaan i Amá-Nea takin malaekat mita mokudus.”